22
Chililo
(Kwa yalingwaluchiza kwimba. Kwimba kwa lwimbo lwa chifuno chidala cha lufuku. Zabuli ya Daudi.)
1 Nguluwi wa heni, Nguluwi wa heni, lekachoni nakundeka?
Lekachoni kwa kutali ng'hatu kundohola,
kutali na chililo cha heni cha magazo?
2 Gwa Nguluwi wa heni, ndangulila nemisi ila hambe widichile,
ndangutowa iyowe nechilo, ila siweza kwesela.
3 Ila, hegwe kwa yelile,
hegwe kwangulongoza kulawa kuli chigoda cha hegwe cha undewa na kutogoligwa na Waisilaeli.
4 Wasekulu wa hetwe nawetumbila kwa hegwe,
nawetumbila kwa hegwe, nagwe nakuwalohola.
5 Nawakulilila hegwe, nawaloholigwa,
nawakutumbila nawo hawabasigwe soni.
6 Ila heni nda linhu hela, siwele munhu,
ndemigwa na kubezigwa na wanhu weng'ha.
7 Weng'ha walingumbona wangumbeza,
wangufyonya na kutigasa vitwi vya hewo.
8 Wangulongaga, “Nakamtumbila Mkulu Nguluwi,
lelo, Nguluwi yamgombole.
Wone Nguluwi kangunojezwa na heye,
lelo, yamlohole.”
9 Ila hegwe ndo undavile mmunda mwa mayangu,
nakumbika hanojile kuli mhambaga ya mayangu.
10 Nandikutumbila kulawa kupondigwa kwa heni.
Kulawa lomhondigwe, hegwe nawali Nguluwi wa heni.
11 Uleche kuwa kutali na heni,
kwa vila magazo ga habehi,
haduhu wa kunhanza.
12 Wang'honyo wenji nawanzunguluta kota mibuguma,
wamema chila ubanzi wa heni kota mibuguma jing'hang'hale ja Bashani.
13 Wangugabula milomo ja hewo kota isimba,
liwele goya kuvaba heni na kundadula.
14 Namala kota mazi gabohoche,
mizeje ja heni najiseleuka,
nhumbula ya heni ndo kota ihota,
yangusungulumuka mgati mwa heni.
15 Ikolomelo lya heni nalikala ng'hatu,
umyango wa heni wangunanahila kumlomo kwa heni.
Nakundeka kuli nimbwisi ya kubagama.
16 Chilundo cha wehile nachinzunguluta,
nawanzunguluta kota chilundo cha mibwa,
kota isimba, nawandadula kuli moko na magulu ga heni.
17 Mhona mizeje hela,
wang'honyo wa heni wangundola na kundonga vibi.
18 Wangigawila nguwo za heni,
wangulitowela simbi ivalo lya heni.
19 Ila hegwe gwa Mkulu Nguluwi, uleche kuwa kutali na heni.
Hegwe mong'ho wa heni, uye himahima kunhanza.
20 Undohole kulawa kuli ipanga,
ulohole ukomu wa heni mli ndole za mibwa ajo.
21 Undohole kumlomo mwa isimba,
undohole kulawa kuli mbalati za mibogo ajo.
Lwimbo lwa kulonga malumbo
22 Ndowasimila wang'holozangu itagwa lya hegwe,
ndokutogola hali nhing'hano ya hewo.
23 “Hemwe mlingumdumba Mkulu Nguluwi, mumtogole.
Mumhulichize hemwe walelwa weng'ha wa Yakobo.
Mumfugamile Nguluwi hemwe walelwa weng'ha wa Isilaeli.
24 Kwa vila heye halingubeza ne kuzudila ung'hochele wa ng'hochele,
ne kivisa kutali na heye,
ila kangumhulika hoyomlanda utanzi.”
25 Kwa chiwalo cha hegwe ndokutogola,
hali nhing'hano ng'hulu ya wanhu,
ndokweneza chilaho cha heni hali hewo walingukudumba.
26 Wazunwa wolya na kiguta,
walingumpala Mkulu Nguluwi womtogola.
Nguluwi yawatambichize kikala mazuwa gose.
27 Isi zeng'ha zokumbuchila na kumhiluchila Mkulu Nguluwi,
wanhu wa isi zeng'ha womfugamila,
28 kwa vila Mkulu Nguluwi ndo mndewa,
heye kanguwalongoza wanhu wa isi zeng'ha.
29 Wawele na lufufu weng'ha muisi, wofugama hali heye,
weng'ha wawele wobagama wofugama hali heye,
weng'ha wohambe waweze kulutiliza ukomu wa hewo.
30 Lulelo lulinguya lwomkolela mijito,
wanhu wolusimila mbuli za Nguluwi,
31 wowikula madito ga heye ga hachi.
Wanhu wowawele wang'hali kupondigwa wolonjelwa,
“Mkulu Nguluwi nakadita kwa hachi.”