30
Kulanda kwa kulonga malumbo
(Zabuli ya Daudi. Lwimbo lwa kuiwika chiuyeng'ha ng'handa ya Nguluwi.)
1 Gwa Mkulu Nguluwi, ndangukutogola kwa vila nakunyinula kulawa kuli ikulubila,
huwalechile wang'honyo wa heni wasangalale kwa kusumya heni.
2 Gwa Mkulu Nguluwi, Nguluwi wa heni,
nandikulilila unhanze, nagwe nakumhonya.
3 Gwa Mkulu Nguluwi, nakundohola kulawa kuli isi ya wabagame,
nakumha kahi heni ukomu,
nakundavya hali walinguluta kuli vilaga.
4 Mumwimbile Mkulu Nguluwi lutogo, hemwe wa kukundigwa wa heye,
mkumbuchile welile wa heye na kumlonjela malumbo.
5 Ng'halazi ya heye yangikala kwa mhela udo,
kukundigwa kwa heye kwangikala mazuwa gose.
Chililo choweza kuwa baho mbaka nechilo,
ila mitondo usangalalo wanguya.
6 Mbuli za heni hoziwele zilutilila goya, nandonga,
“Silemwela hebu.”
7 Kwa kunoga kwa hegwe, gwa Mkulu Nguluwi,
nakunyimiza nzinzili kota chidunda chikulu.
Ila louwele wivisile kutali na heni,
nandumba ng'hatu.
8 Gwa Nguluwi, nandikulilila hegwe,
ena nandikudedeza, gwa Mkulu Nguluwi, kwa isungu.
9 “Ndaze, kopegwa choni hondibagama,
na kudulika mbaka kuli wabagame?
Ndaze, nhimbwisi ya wabagame yoweza kukutogola?
Ndaze, yoweza kusimila kukundigwa kwa hegwe?
10 Unyhulichize, gwa Mkulu Nguluwi na kumbonela isungu,
gwa Mkulu Nguluwi, unhanze.”
11 Hegwe nakugalula kulombocheza kwa heni kuwa ngoma ya kusangalala,
nakumbusila masinzo ga heni, nakunzungulusila usangalalo.
12 Ndokutogola hambe nyamalile.
Gwa Mkulu Nguluwi, Nguluwi wa heni ndokulonjela malumbo mazuwa gose.