32
Kulonga malumbo kwa chiwalo cha kulechelwa gehile
(Ilanguso lya Daudi.)
1 Nakatambichizwa munhu yalechelwe nongwa ya heye,
munhu yawele gehile ga heye nagosigwa ng'hatu.
2 Nakatambichizwa munhu yawele Mkulu Nguluwi hambe yamuwazile nongwa,
munhu yawele muhe wa heye wahela uhadi.
3 Mhela lombele ndilutilila kuleka kulonga gehile ga heni,
nandali ng'hochele kwa kulila nemisi yeng'ha.
4 Nemisi na nechilo moko wa hegwe naunhunya,
mong'ho wa heni nawali wusigwe,
kota mazi mhela wa chipalangule.
5 Hamba nandonga gehile ga heni kwa hegwe,
siuvisile wihe wa heni.
Nandonga, “Ndangulonga wihe wa heni gwa Mkulu Nguluwi.”
Aho ndo nagwe loumbusile gehile ga heni.
6 Ahyo, chila yalingukundigwa yakulande,
mhela houwa baho,
kukomya mazi makulu hogomema,
hagomfichila heye.
7 Hegwe ndo honhu ha heni ha kivisa,
kombika kutali na magazo,
na kunzunguluta kwa nzimbo za ulohozi.
8 Nguluwi kangulonga, “Ndokulangusa
na kukulajila nzila youlinguganigwa kuwinza.
Ndokulonjela mbuli na kukulola ng'hatu.
9 Uleche kuwa mpoka kota falasi ama falasi-idogowi,
jiwele janguganigwa jikowelwe lijamu na hatamu,
ama hebu hawokuhejelela.”
10 Wanhu wehile wofichigwa na magazo menji,
ila walingumtumbila Mkulu Nguluwi wanguzungulutwa na igano lya heye lya kwimilila.
11 Mtowe luchenze na kusangalala kwa chiwalo cha Mkulu Nguluwi hemwe watanganiche,
mtowe luchenze lwa kusangalala hemwe mgoloche nhumbula!