36
Kunoga kwa Mkulu Nguluwi kwanguusumya wihe wa munhu
(Kwa yalingwaluchiza kwimba. Zabuli ya Daudi, chitumagwa wa Mkulu Nguluwi.)
1 Gehile gangulongaga na munhu mwihe,
mgati ng'hatu mwa nhumbula ya heye,
mbuli ya kumdumba Nguluwi ya haduhu ng'hatu kwa heye.
2 Mwihe kangiganililaga yuye,
mbaka kangulemwela kuvizela na kugazudila gehile ga heye.
3 Chila choyalingulonga ndo wihe na udesi,
nakaleka kuwa na luhala na kudita ganojile.
4 Hoyowasa kangijesaga kudita wihe,
kangiwikaga kuli nzila yohaiwele inojile,
halingileka na wihe hebu.
5 Igano lya hegwe lya kwimilila, gwa Mkulu Nguluwi lyangwenela mbaka kilanga,
kukundigwa kwa hegwe kwangufika mbaka kuli ng'hungugu.
6 Kutanganika kwa hegwe ndo kota vidunda vikulu,
utaguso wa hegwe ndo kota mgati ng'hatu mwa bahali.
Gwa Mkulu Nguluwi, kwanguwamila wanhu na migongolo.
7 Gwa Nguluwi, ndaze vyoliwele linojile igano lya hegwe lya kwimilila?
Wanhu wangubilimilaga kuli lubehelo lwa mbawa za hegwe.
8 Kwanguwagutiza kwa lufufu lwa ng'handa ya hegwe,
kwanguwanweza kulawa kuli lwanda lwa kunoga kwa hegwe.
9 Hegwe ndo mwaluko wa ukomu,
kwa lumuli lwa hegwe, twangona lumuli.
10 Ulutilile kuwa na igano lya kwimilila kwa walingukuzela,
ulutilile kuwa wa hachi kwa wagoloche nhumbula.
11 Uleche kukunda walingidaya wavabe heni,
ne wanhu wehile wambilimise heni.
12 Hambi walingudita wihe nawagwa,
nawagwiswa hasi hawoweza kwinuka.