39
Kulanda luhala na kulechelwa
(Kwa yalingwaluchiza kwimba. Kwimba kwa Yedutuni. Zabuli ya Daudi.)
1 Nandonga, “Ndozilolela nzila za heni,
ndeche kudita gehile kwa ulonzi wa heni.
Ndodinya mlomo wa heni, wehile howowa habehi na heni.”
2 Nandali kota yohambe yalonje, ne kulonga chinhu,
nandali ndinyamalile, ila siwele goya hebu.
Magazo ga heni nagalutilila kuwa gang'ang'ale,
3 kugaya kwa heni nakundumiza mnhumbula.
Vyombele ndijesa, ndo vyondutilile kugaya kwa chiluli,
hamba ulonzi awu naulawa kwa heni,
4 “Gwa Mkulu Nguluwi, unzelese kuduma kwa heni,
mazuwa ga heni ga kikala gapona galinga,
ndivizele vyoulingukola himahima ukomu wa heni.
5 “Hambi kumbichila ukomu udo ng'hatu.
Ukomu wa heni hauwele chinhu hali hegwe.
Kukomya, chila munhu ndo kota lweselo hela.
6 Ndangukomya, chila munhu kangukola kota isisila,
mijito ja heye jeng'ha ja hihi hela,
kangukungajiza lufufu ne kuvizela whaani yohola.
7 “Ila, gwa Mkulu, ndangubeteza choni?
Kitumbila kwa heni ndo kwa hegwe.
8 Undohole kulawa kuli nongwa za heni zeng'ha,
uleche kukunda wapoka waseche heni.
9 Nda kota yohambe yalonje, hambe ndonje chinhu,
kwa vila hegwe ndo unditile ahi.
10 Uleche kunzapa kahi,
ndangumala kwa magazo ga hegwe.
11 Houmgaza munhu gehile ga heye kwa kumng'hanuchila,
kwanguwifya ng'hano ya hewo kota lung'hwawa vyowalingulya mahamba.
Kukomya, chila munhu ndo kota lweselo hela.
12 “Gwa Mkulu Nguluwi, uhulichize kulanda kwa heni,
uhulichize chililo cha heni,
uleche kuwa tulu hondilila.
Kwa vila heni nda mjenzi hela yalingukola,
nda mmajendo kota wasekulu wa heni weng'ha.
13 Uleche kundola leka sangalale hado,
londing'hali bagama na kwajilila.”