47
Nguluwi, Mndewa wa isi zeng'ha
(Kwa yalingwaluchiza kwimba. Zabuli ya Wakola.)
Hemwe wanhu weng'ha mtowe vimbamba.
Mumtogole Nguluwi kwa lizi lya kusangalala.
Kwa vila Mkulu Nguluwi, Nguluwi Yawele Kuchanya, kangukabusa.
Heye ndo Mndewa mkulu kuli isi zeng'ha.
Nakatudita tuwasumye wanhu wa isi,
nakawawika wanhu wa isi hanyi, hali magulu ga hetwe.
Nakatuhagulila isi ayi iwe uhalizi wa hetwe,
iwele ndo lutogo lwa walelwa wa Yakobo yalingumgana.
 
Nguluwi nakenuka kuchanya hali walingutowa luchenze,
Mkulu Nguluwi hali walingutowa mhalamanda.
Mumwimbile Nguluwi lutogo, mumwimbile.
Mumwimbile lutogo mndewa wa hetwe, mumwimbile.
Mumwimbile Nguluwi lwimbo lwa lutogo,
kwa vila heye ndo mndewa wa isi zeng'ha.
 
Nguluwi yalinguwalongoza wanhu wa isi zeng'ha,
nakekala kuli chigoda cha heye cha undewa chelile.
Vilongozi wa wanhu wa isi wangikungajiza,
wangilumba na wanhu wa Nguluwi wa Abulahamu,
kwa vila ludali lweng'ha lwa muisi ndo lwa Nguluwi,
heye kana ukulu ng'hatu.