51
Kulanda kulechelwa
(Kwa yalingwaluchiza kwimba. Zabuli ya Daudi loyang'hanuchilwe na mloli Natani kwa nongwa ya heye kuwala Batisheba.)
1 Gwa Nguluwi, mbonele isungu,
kwa winji wa igano lya hegwe lya kwimilila.
Kwa winji wa isungu lya hegwe,
wuse gehile ga heni.
2 Uhovuje ng'hatu nongwa ya heni,
welize gehile ga heni.
3 Kwa vila ndanguzizela nongwa za heni,
na ndangugona hazelu gehile ga heni.
4 Nandikuditila gehile gwegwe uliyeka,
nandita nongwa hali hegwe.
Lelo, uzeleche kota kuna hachi houlonga,
na haulingung'ung'utilwa kuli nhaguso za hegwe.
5 Ulole, ndina nongwa kulawa lomhondigwe,
mbele na gehile kulawa mmunda wa mayangu.
6 Hegwe kwangugana kugoloka kwa mgati,
ahyo undanguse luhala mnhumbula.
7 Welize gehile kwa heni kwa izuchila lya isopolo nani ndiwe yelile,
undite ndiwe mzelu kusinda seluji.
8 Memeze kusangalala na luchenze,
hanga nakumhonda, undite sangalale kahi.
9 Uhinduche, uleche kugalola gehile ga heni,
wuse nongwa za heni zeng'ha.
10 Gwa Nguluwi, umhe heni nhumbula yelile,
uwiche mgati mwa heni muhe unyale na uwele nzinzili.
11 Uleche kumbika kutali na hegwe,
uleche kumbusila Muhe Welile wa hegwe.
12 Nyhilulile kahi kusangalala kwa kundohola,
uwiche mgati mwa heni nhumbula ya kuhulichiza leka iwe lwega lwa heni.
13 Hamba ndowalangusa wehile nzila za hegwe,
na wawele na gehile wohiluka kwa hegwe.
14 Gwa Nguluwi, Nguluwi ulingundohola,
undohole kulawa kuli nongwa ya kukopola,
nani ndokwimba kwa lizi kutanganika kwa hegwe.
15 Undite ndonje, gwa Mkulu,
mlomo wa heni uwikule lutogo lwa hegwe.
16 Kwa vila hulingunojezwa na nhambiko,
wone wahaganile, heni ndahakulavile.
Hegwe hulingusangalazwa na nhambiko za kulakazwa.
17 Nhambiko ya heni kwa hegwe, gwa Nguluwi,
ndo nhumbula ilingunyenyetela,
hegwe, gwa Nguluwi, hambe uileme nhumbula ilingunyenyetela na ilinguhulichiza.
18 Gwa Nguluwi, ugane kuuditila ganojile muji wa Siyoni,
uzenje kahi ng'hanzi za muji wa Yelusalemu.
19 Aho ndo konojezwa na nhambiko za kukomya,
ndolendole za kulakazwa na za kulakazwa ne kugawilwa.
Mibuguma jolavigwa nhambiko hali honhu ha hegwe ha kulavila nhambiko.