62
Ndomtumbila Nguluwi kunyamila
(Kwa yalingwaluchiza kwimba. Kwa kiwhana na Yedutuni. Zabuli ya Daudi.)
1 Ndangumbeteza Nguluwi yaliyeka kwa kusindamala,
kwa heye wangulawa ulohozi wa heni.
2 Heye yaliyeka ndo italawe na ulohozi wa heni,
heye ndo ngome ya heni, sitigasika ng'o.
3 Mbaka hanili monhowa?
Mbaka hanili hemwe mweng'ha momhonda heni,
heni mbele kota lukanzi lwiname,
kota lugagala lulingwaluka kugwa?
4 Mwangugana kungwisa kulawa honhu hangu ha lutogo,
usangalalo wa hemwe ndo kulonga udesi.
Kwa ulonzi, mwangutambichiza,
ila mnhumbula mwangupanjila.
5 Gwa nhumbula ya heni, usindamale kwa Nguluwi yaliyeka,
kitumbila kwa heni kwangulawa kwa heye.
6 Heye yaliyeka ndo italawe na ulohozi wa heni,
heye ndo ngome ya heni, sitigasika.
7 Ulohozi na ukulu wa heni vyangulawa kwa Nguluwi,
italawe lya heni ikulu na honhu ha heni ha kubilimila ndo Nguluwi.
8 Hemwe wanhu, mitumbile kwa Nguluwi mazuwa gose,
mumchumulile Mkulu gawele mnhumbula za hemwe.
Nguluwi ndo honhu ha hetwe ha kubilimila.
9 Wanhu weng'ha ndo kota lweselo hela,
weng'ha, wakulu na wadodo, hawawele chinhu.
Kahi houwapima itunyo hambe wafiche kilo,
weng'ha hamwe ndo wabewe kusinda lweselo.
10 Mleche kipalila sendi kwa kubunza,
mleche kitogola kwa lufufu lwa uhizi,
wone lufufu lokonjezeka, mleche kitumbila kuli lufufu alo.
11 Mbuli imwe Nguluwi nakalonga,
mbuli mbili nandizihulika,
kota mong'ho ndo wa Nguluwi,
12 ena, igano lya kwimilila ndo lya hegwe Mkulu.
Kwangumpaga chila munhu kwa kiwhana na madito ga heye.