69
Kulanda utanzi
(Kwa yalingwaluchiza kwimba. Kwimba kwa Yunjiyunji. Lwimbo lwa Daudi.)
1 Gwa Nguluwi, undohole,
mazi gafika msingo.
2 Ndanguzulubila mgati mwa ndidimila,
haduhu ne honhu ha kuwika magulu.
Nyinjila mgati ng'hatu mwa mazi,
ndanguholigwa na nhigu.
3 Nhoka kutowa iyowe,
na ikolomelo lya heni likala.
Meho ga heni gabilabila,
kuno ndikubeteza hegwe Nguluwi wa heni.
4 Wanhu wenji kusinda mnvili za heni ndo walingunzudila hela.
Wang'honyo walingugana kung'hopola ndo wenji,
awo walingunhowa kwa mbuli za udesi.
Ndaze, nyhilule chinhu chosihizile?
5 Gwa Nguluwi, kwanguuzela upoka wa heni,
nongwa za heni hambe zivisigwe kwa hegwe.
6 Walingitumbila kwa hegwe waleche kubasigwa soni kwa chiwalo cha heni,
gwa Mkulu Nguluwi Yawele na Mong'ho,
walingukupala waleche kudeula kwa chiwalo cha heni,
gwa Nguluwi wa Isilaeli.
7 Kwa chiwalo cha hegwe mbasigwa soni lukami,
soni igubika kumeho kwa heni.
8 Ndiwa mjenzi hali wang'holozangu,
kalumbu na lumbu zangu hambe wanzele.
9 Maya ga ng'handa ya hegwe gamema kwa heni,
mbuli zeng'ha zihile zowalingukuditila hegwe zangufika heni.
10 Vyombele ndinyenyetela kwa kwesela kulya,
wanhu nawang'ung'utila heni.
11 Vyovalile ivalo lya igunila kulombocheza,
hewo nawambeza.
12 Wanhu wanguheha heni mnzila,
wagalile ujimbi wangijesa nzimbo za kumbeza heni.
13 Ila heni ndangukulanda hegwe, gwa Mkulu Nguluwi,
ung'hundile chondilanda mhela wougana.
Gwa Nguluwi, kwa winji wa igano lya hegwe lya kwimilila unyidichile,
unyidichile kwa ulohozi wa kukundigwa.
14 Undohole kulawa kuli ndidimila,
uleche kundeka nzibile,
undohole na awo walingunzudila,
umbiche kutali kulawa mgati ng'hatu mwa mazi.
15 Uleche kundeka fichigwe na mazi tendema,
ama nzibile mgati ng'hatu mwa mazi,
ama fichigwe na chilaga.
16 Gwa Mkulu Nguluwi, unyidichile,
kwa kunoga kwa igano lya hegwe lya kwimilila,
umbuyile kwa winji wa isungu lya hegwe.
17 Uleche kumvisa heni, chitumagwa wa hegwe,
unyidichile himahima, kwa vila ndangutunyigwa.
18 Umbuyile habehi na kungombola,
undohole na wang'honyo wa heni wenji.
19 Hegwe kwanguvizela vyondilingulijigwa,
kwanguvizela soni na kubezigwa vyovilingufika heni,
kwa vila wang'honyo wa heni weng'ha hegwe kwanguwazela.
20 Kubezigwa nakutwegula nhumbula ya heni,
nani ngozola ng'hatu.
Nandimpala munhu wa kundajila isungu, ila nakwali haduhu,
nandimpala wa kunyhembuliza heni, ila simpatile.
21 Nawamha heni dunga iwe chilyo,
londiwele na ng'halu nawamha heni sichi.
22 Visaga vya hewo wawo hali hewo, viwagwilize,
viwe vinhu vya kuwagwiliza.
23 Meho ga hewo gawichigwe jiza leka walemwele kulola,
chila mhela uvidite vyuno vya hewo vibiniche.
24 Uwaboholele ng'halazi ya hegwe,
kuzudila kwa hegwe kuwafiche.
25 Kambi za hewo zilechigwe mahame,
yaleche kikala yoneche kuli mihema ja hewo.
26 Kwa vila hewo wanguwagaza wala uwazapile,
wangulonga kwa chiwalo cha magazo ga wala uwalumize.
27 Ukumbuchile nongwa kwa chila wihe wa hewo,
uwalemele ng'hatu kulechela kwa hegwe.
28 Uwose kuli chitabu cha wawele wakomu,
waleche kuwa amo mli matagwa ga watanganiche.
29 Ila heni ngazika na nda mtamwa,
unyinule, gwa Nguluwi, undohole.
30 Kwa lwimbo ndolitogola itagwa lya Nguluwi,
ndomha ukulu kwa kulonga malumbo.
31 Mbuli ayi yomnojeza ng'hatu Mkulu Nguluwi,
kusinda kumlavila nhambiko ya isenga,
kusinda kumlavila ibuguma lyeng'ha likomu.
32 Wazunwa wogona ago na kusangalala,
walingumpala Nguluwi wokangazwa nhumbula.
33 Mkulu Nguluwi kanguwahulichizaga walihela chinhu,
howasemwa ng'o wanhu wa heye wanweng'hwa.
34 Ulanga na isi vimtogole Nguluwi,
bahali na vyeng'ha viwele amo, vimtogole.
35 Kwa vila Nguluwi koulohola muji wa Siyoni,
na kujizenga kahi miji ja Yuda.
Wanhu wochikala amo na kuihola,
36 walelwa wa vitumagwa wa heye woihalila,
wala walingugana itagwa lya heye wochikala amo.