71
Kulanda kwa wasekulu
1 Gwa Mkulu Nguluwi, kwa hegwe ndangubilimila kikala goya,
uleche kundeka ne hado mbasigwe soni.
2 Kwa kutanganika kwa hegwe undohole,
uwiche goya ikutu lya hegwe na kundohola.
3 Uwe kwa heni italawe lya kikala goya,
honhu hondibilimila chila mhela,
kwa vila hegwe ndo italawe na ngome ya heni.
4 Gwa Nguluwi wa heni, undohole kulawa mmoko mwa wehile,
kulawa kuli ndole za walinguleka hachi na wang'hang'hale.
5 Kwa vila hegwe Mkulu ndo kitumbila kwa heni,
kitumbila kwa heni gwa Mkulu Nguluwi, kulawa kuli usongolo wa heni,
6 nandikutumbila hegwe kulawila lomhondigwe,
ndo hegwe undavile mmunda mwa mayangu.
Ndokutogola mazuwa gose.
7 Nandiwa munhu wa kububuwaza kwa wenji,
ila hegwe ndo honhu ha heni ha kubilimila hemile nzinzili.
8 Mlomo wa heni umema lutogo lwa hegwe,
na ukulu wa hegwe nemisi yeng'ha.
9 Mhela wa kulala uleche kunhoza,
uleche kundeka mong'ho wa heni houmala,
10 kwa vila wang'honyo wa heni wangulonga vibi kwa heni,
nawo walingugana kung'hopola wangiwika goya,
11 wolonga, “Nguluwi nakamleka,
mumuwinze na kumibata,
kwa vila haduhu wa kumlohola.”
12 Gwa Nguluwi, uleche kuwa kutali na heni,
gwa Nguluwi wa heni, uye himahima kunhanza.
13 Weng'ha walingundonjeleza wabasigwe soni na kudumigwa,
walingugana kundumiza wabasigwe soni na kudeula.
14 Ila heni ndowa na kitumbila mazuwa gose,
ndokutogola lukami.
15 Mlomo wa heni wolonga madito ga hegwe ga hachi,
ndowikula nemisi yeng'ha madito ga hegwe ga ulohozi,
hanga ago ndo mzidi wa nyhala za heni.
16 Ndolonga madito ga hegwe makulu, gwa Mkulu Nguluwi,
ndowakumbusa kota hegwe uliyeka ndo utanganiche.
17 Gwa Nguluwi, hegwe nakundangusa kulawa usongolo wa heni,
ndangulutilila kuwikula madito ga hegwe ga vinduzanduza.
18 Gwa Nguluwi, uleche kundeka hondiwa ndalile ndiwele na mbuliza,
mbaka ndiluwikulile lulelo lulinguya mong'ho wa hegwe,
mong'ho wa hegwe kwa weng'ha walinguya.
19 Gwa Nguluwi, hachi ya hegwe naifika mbaka kuchanya mwa ulanga,
hegwe uwele nakudita mbuli ng'hulu ng'hatu.
Gwa Nguluwi, whaani yawele kota hegwe?
20 Nakundita mbone magazo menji ng'hatu,
ila konyhilusila kahi ukomu,
hegwe konyhilula kahi kulawa ako hasi.
21 Konyonjezela kuhulichizwa kwa heni,
na kunyhembuliza kahi.
22 Ndokutogola kahi kwa ching'weleng'wele,
kwa chiwalo cha kukundigwa kwa hegwe, gwa Nguluwi wa heni.
Ndokwimbila lutogo kwa igombogombo, hegwe Welile wa Isilaeli.
23 Ndotowa iyowe kwa kusangalala,
hondikwimbila lutogo lwa hegwe
na nhumbula ya heni yokutogola kwa vila nakungombola.
24 Ndolonga kutanganika kwa hegwe nemisi yeng'ha,
kwa vila wowaganile kundumiza nawabasigwa soni na kudeuzwa.