86
Kulanda utanzi
(Kulanda kwa Daudi.)
1 Gwa Mkulu Nguluwi, mbichile goya ikutu lya hegwe, unyidichile,
kwa vila heni ndo mzunwa na ndilihela chinhu.
2 Uwamile ukomu wa heni kwa vila ndangukukunda hegwe Nguluwi,
undohole heni chitumagwa wa hegwe ndilingukutumbila.
3 Hegwe ndo Nguluwi wa heni,
lelo, umbonele isungu,
kwa vila ndangukuchema nemisi yeng'ha.
4 Usangalaze heni mbele chitumagwa wa hegwe,
kwa vila kulanda kwa heni ndangigala kwa hegwe Mkulu.
5 Gwa Mkulu, hegwe ndo unojile na kwanguwalechela wanhu,
kuna winji wa igano lya kwimilila kwa weng'ha walingukuchema.
6 Gwa Mkulu Nguluwi, ukuwichile goya ikutu lya hegwe kulanda kwa heni,
ukuhuliche kulila kwa isungu.
7 Mazuwa ga kugazika ndangukuchema,
kwa vila hegwe kwangunyidichila.
8 Gwa Mkulu, haduhu Nguluwi yawele kota hegwe,
haduhu yalinguweza kudita goulingudita hegwe.
9 Wanhu wa isi zeng'ha uwalumbile, wokuya kukufugamila, gwa Mkulu,
wowikula ukulu wa itagwa lya hegwe.
10 Hegwe ndo mkulu, kwangudita vinduzanduza,
hegwe uliyeka ndo Nguluwi.
11 Gwa Mkulu Nguluwi, undanguse nzila ya hegwe,
leka ndiwe wa kukundigwa kwa hegwe,
umhe nhumbula ya kukuwinza hegwe uliyeka,
leka ndikudumbe.
12 Gwa Mkulu, Nguluwi wa heni, ndokutogola kwa nhumbula yeng'ha,
ndowikula ukulu wa itagwa lya hegwe mazuwa gose.
13 Igano lya hegwe lya kwimilila kwa heni ndo linji.
Nakundohola kulawa hasi kuli isi ya wabagame.
14 Gwa Nguluwi, wanhu walingidaya wangunhowa,
chilundo cha wanhu wang'ang'ale wangugana kung'hopola,
hambe wakudumbe hegwe ne hado.
15 Ila hegwe Mkulu, ndo Nguluwi wa kunoga na isungu,
hulinguzudila himahima, kuna winji wa igano lya kwimilila na kukundigwa.
16 Unyhinduchile, umbonele isungu,
umhe heni mong'ho wa hegwe, heni chitumagwa wa hegwe,
undohole mbele mwana wa mpogozi wa hegwe.
17 Gwa Mkulu Nguluwi, undajile ulajilo wa kunoga kwa hegwe,
leka wala walingunzudila walole na kubasigwa soni,
kwa vila nakunhanza na kunyhembuliza.