Chitabu cha Kane
90
(Zabuli 90-106)
Nguluwi wa mazuwa gose na munhu chilumbigwe
(Kulanda kwa Musa, munhu wa Nguluwi.)
1 Gwa Mkulu, kulawa lulelo lweng'ha,
hegwe nakuwa kikala goya kwa hetwe.
2 Loving'hali kuwa vidunda,
louwele ung'hali kulumba isi yeng'ha,
hegwe ndo Nguluwi, kulawa mazuwa gose mbaka mazuwa gose.
3 Kwangumlonjela munhu, “Uhiluche kuli nhimbwisi.”
Naye munhu kanguhilukaga kuli nhimbwisi nakoyalawile.
4 Kwa hegwe miyaka elufu ndo kota zuwa limwe hela,
ndo kota zuwa likolile hela,
kwa hegwe ndo kota mhela uchefu wa nechilo.
5 Kwanguwajiliza wanhu kota kulota.
Munhu ndo kota misolo jilinguzuchila mitondo.
6 Mitondo janguzuchilaga na kubahula,
ila matinazo janguswinhaga na kukala.
7 Ng'halazi ya hegwe yangutudumya,
twangukabuswa na kuzudila kwa hegwe.
8 Nongwa za hetwe nakuziwika kumwando kwa hegwe,
gehile ga hetwe ga chinyele ga hazelu hali hegwe.
9 Kwa ng'halazi ya hegwe, ukomu wa hetwe wangwajilila,
wangumala kota lweselo.
10 Miyaka ja kikala ndo makumi saba,
ama wone tuwe na mong'ho, makumi nane,
ila geng'ha ndo magazo na kisinza.
Mazuwa gangupuluta himahima, natwe twangubilabila himahima.
11 Whaani yalinguvizela itunyo lya ng'halazi ya hegwe?
Kwa vila kuzudila kwa hegwe ndo kukulu,
kota kudumba kotulinguganigwa kuwa nako kwa hegwe.
12 Utulanguse kuvizela kota ukomu wa hetwe ndo uchefu,
leka tuwe na luhala.
13 Gwa Mkulu Nguluwi, uwe na isungu.
Kozudila mbaka hanili?
Utonele isungu hetwe vitumagwa wa hegwe.
14 Utugutize igano lya kwimilila lya hegwe mitondo,
tutowe luchenze na kusangalala kuli ukomu wa hetwe weng'ha.
15 Ututambichize lelo miyaka minji ja kusangalala,
kota vyoutupele miyaka minji ja magazo na kisinza.
16 Utulajile madito ga hegwe hetwe vitumagwa wa hegwe,
uwalajile walelwa wa hetwe ludali lwa hegwe lwa ukulu.
17 Uganililo wa hegwe, gwa Mkulu, Nguluwi wa hetwe,
chotulingudita uchiwiche chiwe goya,
ena, uchiwiche goya chila chotulingudita.