95
Lwimbo lwa kumtogola Nguluwi
1 Muye tumwimbile Mkulu Nguluwi,
tumtowele luchenze italawe lya ulohozi wa hetwe.
2 Tulute hali heye na kulonga malumbo,
tumtowele luchenze na nzimbo za lutogo.
3 Kwa vila Mkulu Nguluwi, ndo Nguluwi mkulu,
heye ndo Mndewa mkulu hali milungu jeng'ha.
4 Mgati ng'hatu mwa isi kwa mmoko mwa heye,
mbaka kuli vinhembenhembe vya vidunda ndo vya heye.
5 Bahali ndo ya heye, ndo yaiditile,
kwa moko ga heye nakalumba isi ng'havu.
6 Muye tinamize na kumfugamila,
tufugame hali Mkulu Nguluwi, yatulumbile hetwe.
7 Kwa vila heye ndo Nguluwi wa hetwe,
natwe twa wanhu wa heye,
ndo ming'holo ja heye yalingujidima.
Wone lehano mohulika lizi lya heye,
8 “Mleche kuzidita nhumbula za hemwe ziwe zigagadale kota kula Meliba,
kota vyowawele kula kuchiwala Masa.
9 Wasekulu wa hemwe lowanjezile na kupima majesa ga heni,
hanga nawajona mijito ja heni.
10 Kwa miyaka makumi gane nanzudizwa ng'hatu na hewo,
nandonga, ‘Ndikomya, wanhu wano nawajilila mnhumbula za hewo.
Nawo hawazizelele nzila za heni.’
11 Lelo nanzudila ng'hatu, nandilaha,
‘Hawokwinjila hali honhu hangu ha kwesela.’ ”