97
Nguluwi chilongozi mkulu
1 Mkulu Nguluwi kangulongoza.
Usangalale hegwe isi.
Msangalale hemwe vihilwa vinji.
2 Ng'hungugu na jiza totolo vyangumzunguluta,
kutanganika na hachi ndo msisi wa chigoda cha heye cha undewa.
3 Chiluli changulongola kumwando kwa heye,
kuwalakaza wang'honyo wa heye banzi zeng'ha.
4 Lumwemwesa lwa heye lwangulangazila isi yeng'ha,
isi yanguwona na kukakama.
5 Vidunda vyangusungulumuka kota ihota hali Mkulu Nguluwi,
ena, hali Mkulu wa isi yeng'ha.
6 Ulanga wanguwikula kutanganika kwa heye,
wanhu wa isi yeng'ha wanguwona ukulu wa heye.
7 Weng'ha walingujikolela mijito jimalukolo,
ena, weng'ha walingujitogola milungu, jiwele hajilingutanza chinhu, wangubasigwa soni.
Milungu jeng'ha jangufugama hali Mkulu Nguluwi.
8 Wanhu wa Siyoni wangusangalala,
wanhu wa Yuda wangutowa luchenze,
kwa chiwalo cha nhaguso za hegwe, gwa Mkulu Nguluwi.
9 Hegwe Mkulu Nguluwi ndo Nguluwi Yawele Kuchanya, mchanya mwa isi yeng'ha,
hegwe kuna ukulu ng'hatu mchanya mwa milungu jeng'ha.
10 Wala walingumgana Mkulu Nguluwi, wauzudile wihe,
kwa vila kangwamilaga ukomu wa walingukundigwa wa heye,
kanguwaloholaga kuli ndole za wang'honyo.
11 Lumuli lwanguwamwemweselaga watanganiche,
usangalalo kwa wanhu wawele na nhumbula zigoloche.
12 Msangalale kwa chiwalo cha Mkulu Nguluwi hemwe watanganiche,
mlonje malumbo kwa chiwalo cha itagwa lya heye lyelile.