15
Ngondo kwa Waamaleki
1 Samweli nakamlonjela Sauli, “Mkulu Nguluwi nakandajiza ndikubakalize mafuta uwe mndewa wa wanhu wa heye ako Isilaeli, lelo uhulichize usenga wa Mkulu Nguluwi.
2 Mkulu Nguluwi Yawele na Mong'ho kangulonga hino, ‘Ndowagaza Waamaleki kwa chila chowawaditile Waisilaeli, vyowalawile Misili.
3 Lelo ulute kuwatowa Waamaleki na kuwadumya ng'hatu hamwe na chila chinhu chiwele cha hewo. Uleche kuwonela isungu, uwakopole walume na wadala na wana na wana walingong'ha na misenga na ming'holo na ngamiya na midogowi.’ ”
4 Aho ndo Sauli nakawachema wanhu, nakawawaza ako Telemu, wamizi wa kujenda kwa magulu lachi mbili (200,000) hamwe na wanhu elufu kumi kulawa Yuda.
5 Sauli nakaluta kuli muji wa Amaleki na kuwabeteza kuli ibindi.
6 Hamba Sauli nakawalonjela Wakeni, “Muche, muwaleche Waamaleki leka ndeche kuwadumya hamwe na hewo, kwa vila wasekulu wa hemwe nawawaditila igano lya kwimilila wasekulu wa hetwe Waisilaeli mhela lowawele wolawa Misili.” Lelo Wakeni nawoka, nawawaleka Waamaleki.
7 Aho Sauli nakawatowa Waamaleki kulawa Havila mbaka Shuli, kolilawilaga isanya mwa isi ya Misili.
8 Nakamhola Agagi, mndewa wa Waamaleki yawele yang'hali mkomu, wanhu wa heye weng'ha nakawakopola kwa ipanga.
9 Ila Sauli na wamizi wa heye nawaleka kumkopola Agagi na ming'holo jinojile na misenga na milogota jinenehe na ming'holo myana na chila chinhu chinojile. Vinhu avi hawakundile hebu kuvisumya, ila chila chinhu chibezigwe na chiwele ng'hochele nawachidumya ng'hatu.
Mkulu Nguluwi kangumlema Sauli
10 Hamba ulonzi wa Mkulu Nguluwi naumuyila Samweli, ulonga,
11 “Ndina masinzo kwa vila ndimdita Sauli yawe mndewa, nakaleka kumbinza na kweneza malajizo ga heni.” Samweli nakadeula na kumlilila Mkulu Nguluwi nechilo yila yeng'ha.
12 Samweli nakenuka lufuku yakating'hane na Sauli, ila nakalonjelwa, “Sauli nakaluta kuli muji wa Kalimeli. Ako nakazenga chinhu chilingiwhana na ilingo lido kwa lutogo lwa heye yuye, hamba nakaluta Giligali.”
13 Samweli loyamfichile Sauli, Sauli nakamlonjela, “Mkulu Nguluwi yakutambichize. Nyeneza gala goyandajize Mkulu Nguluwi.”
14 Ila Samweli nakalonga, “Aku kulila kwa ing'holo kuna mana yachi? Aku kulila kwa isenga ndo choni?”
15 Sauli nakedichila, “Wamizi nawajigala kulawa kwa Waamaleki, nawajileka jila ming'holo na misenga jinojile leka wajilavye nhambiko kwa Mkulu Nguluwi, Nguluwi wa hegwe, ila jinji jeng'ha natujikopola.”
16 Samweli nakamlonjela Sauli, “Leka! Ndokulonjela ulonzi woyandonjele Mkulu Nguluwi lehano nechilo ayi.” Sauli nakedichila, “Ndonjele.”
17 Samweli nakalonga, “Hanga katali nawali wochijesa kota ung'hali mdodo, ndaze hauwele chilongozi wa nhanzi kumi na mbili za Isilaeli? Mkulu Nguluwi nakakubakaliza mafuta leka uwe mndewa wa Isilaeli.
18 Mkulu Nguluwi loyakulajize nakakulonjela, ‘Ulute kuwadumya wala wanhu wa Amaleki, wehile, witowe na hewo mbaka houwadumya weng'ha.’
19 Lekachoni humhulichize Mkulu Nguluwi? Lekachoni nakuhola vinhu na kudita wihe hali Mkulu Nguluwi?”
20 Sauli nakalonga, “Ndangukomya heni nanyhulichiza lizi lya Mkulu Nguluwi, nani ndimgala Agagi, mndewa wa Waamaleki, kahi ndiwakopola Waamaleki wanji weng'ha.
21 Wamizi hawajidumule singo ming'holo na misenga, mina ndo vinhu vyeng'ha vinojile ng'hatu, viwele hali viwichigwe chiuyeng'ha kudumigwa kwa Nguluwi. Ila nawajigala hano leka jilavigwe nhambiko kwa Mkulu Nguluwi, Nguluwi wa hegwe aha Giligali.”
22 Ila Samweli nakedichila.
“Ndaze, Mkulu Nguluwi kangugana lukami nhambiko za kulakazwa na nhambiko kota vila kuhulichiza lizi lya Mkulu Nguluwi?
Kuhulichiza ndo kunojile ng'hatu kusinda nhambiko,
kukunda ndo kunoga kusinda mafuta ga ing'holo ilume.
23 Kwa vila kubelenhuka ndo kota gehile ga ulaguzi,
na ujuvi ndo kota wihe wa kujifugamila jimalukolo.
Kwa vila nakuulema ulonzi wa Mkulu Nguluwi,
naye nakakulema hegwe
kulutilila kuwa mndewa.”
24 Aho ndo Sauli nakamlonjela Samweli, “Nandita gehile. Mina mbena mzilo wa Mkulu Nguluwi na malajizo ga hegwe. Nandiwadumba wamizi, ahyo nandita kota vyowaganile hewo.
25 Lelo ndangukudedeza, ulechele gehile ga heni. Uhiluche hamwe na heni leka ndimfugamile Mkulu Nguluwi.”
26 Ila Samweli nakamwidichila, “Hambe nyhiluche hamwe na hegwe. Nakuulema ulonzi wa Mkulu Nguluwi, nagwe Mkulu Nguluwi nakakulema hegwe kuwa mndewa wa wanhu wa Isilaeli.”
27 Samweli loyahinduche leka yoche, Sauli nakebata lupembo lwa ivalo lya heye, alyo ivalo nalidejeka.
28 Samweli nakamlonjela Sauli, “Lehano Mkulu Nguluwi nakaudega undewa wa Isilaeli kulawa kwa hegwe, naye nakauwika kwa Muisilaeli myago yawele yanojile kusinda hegwe.
29 Heye yawele Nguluwi wa Isilaeli wa mazuwa gose, hambe yalonje udesi ne kugalula kunuwila kwa heye, kwa vila heye hawele munhu, mbaka yagalule kunuwila kwa heye.”
30 Sauli nakedichila, “Nandita gehile. Ila dedede umhe heni lutogo hali wasekulu wa wanhu wa heni na hali Waisilaeli. Tuhiluche hamwe leka ndikamfugamile Mkulu Nguluwi, Nguluwi wa hegwe.”
31 Ahyo Samweli nakahiluka hamwe na Sauli, naye Sauli nakamfugamila Mkulu Nguluwi.
32 Aho ndo Samweli nakalonga, “Ngalile Agagi mndewa wa Waamaleki.” Agagi nakaluta kwa Samweli kuno yawele na nhumbula ikangale, kwa vila nakejesa, “Ndikomya usungu wa kubagama naukola.”
33 Ila Samweli nakamwidichila.
“Kota ipanga lya hegwe vyoliwaditile wadala wafililwe na wana wa hewo,
ndo mayako hoyowa kahela mwana hali wadala.”
Samweli nakamkopola Agagi hali Mkulu Nguluwi ako Giligali.
34 Hamba Samweli nakaluta kuli muji wa Lama, ila mndewa Sauli nakahiluka haluga ha heye ako Gibeya.
35 Samweli halutile kumona Sauli kahi, mbaka heye loyabagame hanga Samweli nayali na masinzo kwa chiwalo cha Sauli. Mkulu Nguluwi nayali na masinzo kwa kumdita Sauli kuwa mndewa wa Isilaeli.