2
Kulanda kwa Hana
1 Hamba Hana nakalanda na kulonga.
“Ndangusangalala mnhumbula ya heni kwa chiwalo cha Mkulu Nguluwi.
Ndangusumya kwa utanzi wa Mkulu Nguluwi.
Ndanguwaseka wang'honyo wa heni,
mina ndangusangalalila ulohozi wa hegwe.
2 “Haduhu munhu yawele yelile kota Mkulu Nguluwi,
haduhu munhu yawele kota heye,
haduhu yawele italawe kota Nguluwi wa hetwe.
3 Mleche kitogola,
mleche kulonga kwa kidaya.
Mina yavizelele ndo Mkulu Nguluwi.
Heye kangutagusa madito geng'ha.
4 Mipinde ja wanhu wawele na mong'ho najibeneka.
Ila wanhu ng'hochele nawapegwa mong'ho.
5 Wala wawele nawali na chilyo chinji,
sambi wangupegwa mijito leka wawe na chilyo.
Ila wawele na nzala,
sambi wahela nzala kahi.
Mdala yawele mhende nakaponda wana saba.
Ila mdala yawele na wana wenji,
sambi nakalechigwa ne wana.
6 Mkulu Nguluwi kangukopolaga na kanguzilipulaga,
heye kanguwadulisaga kuli isi ya wabagame,
na kanguwahilusaga kahi.
7 Mkulu Nguluwi kanguwaditaga wamwe wawe wazunwa,
na wamwe wawe na lufufu.
Wanji kanguwadulisaga,
na wanji kanguwakwinizaga.
8 Kanguwenulaga wazunwa kulawa kuli nhimbwisi,
kanguwenulaga walingugana kulawa kuli vilundo vya mivu,
nakawawika hamwe na wakulu,
na kuwahaliza vigoda vya ukulu.
Mina, misisi ja isi ndo ja Mkulu Nguluwi,
heye nakaiwika isi ayi mchanya mwa misisi jake.
9 Kikala kwa welile wa heye kangwamilaga,
ila kikala kwa wanhu wehile kangukutozelaga kutali kuli jiza.
Mina munhu hambe yasumye kwa mong'ho wa heye.
10 Wang'honyo wa Mkulu Nguluwi wobenigwa vihandevihande,
kowabumila hewo kota limlungu kilanga.
Mkulu Nguluwi koitagusa isi yeng'ha,
komha mong'ho mndewa wa heye
na kolwinula ludali lwa yabakalizwe mafuta wa heye.”
11 Hamba Elikana nakahiluka kaye Lama, ila mwana wa heye Samweli nakapona Shilo kumkolela mijito Mkulu Nguluwi hali ulongozi wa mtambika Eli.
Wana walume wa Eli
12 Wana wa walume wa Eli nawali wanhu wohambe watanze chinhu. Hawamhulichize Mkulu Nguluwi.
13 Nachali chihendo cha watambika hamwe na wanhu kota chila mhela yoneche hoyolavya nhambiko kuno iwunde liwe lihemswa, chitumagwa wa mtambika nailapigwa yoye na uma uwele na mizino jidatu mmoko mwake.
14 Kangwinjiza uma awo mchiya na iwunde lyoneche lyolilawa liwaga lya mtambika. Wanhu weng'ha wa Isilaeli walutile kulavya nhambiko ako Shilo, nawaditilwa hihyo.
15 Ila kung'hali mafuta gang'hali kusomigwa, chitumagwa wa mtambika koyaga na kumlonjela yula munhu yalingulavya nhambiko, “Mlavile mtambika miwunde midodi mina heye hobochela miwunde ja hegwe jihemsigwe, ila ja kusoma.”
16 Wone munhu ayo yamwidichile, “Tandi gasomigwe mafuta nagwe kohola miwunde joulingugana,” ayo chitumagwa wa mtambika kangumlonjela, “Hebu! Umhe sambi, ama ndohola kwa lupichi.”
17 Ago gehile ga awo wasongolo wa Eli nagali makulu ng'hatu hali Mkulu Nguluwi. Mina, wasongolo awo nawabeza nhambiko za Mkulu Nguluwi.
Samweli ako Shilo
18 Mhela awo, msongolo Samweli nakalutilila kumkolela mijito Mkulu Nguluwi, yawele yavalile chizibao cha kitani.
19 Chila mwaka mayake kangumhonelaga ikanzu lido na kumgalila loyowa yoluta hamwe na mlume wa heye kulavya nhambiko ya mwaka.
20 Eli nakawatambichiza Elikana na mchewake, yolonga, “Mkulu Nguluwi yakupe wana wanji kwa mdala ayu wahalile honhu ha yula umpele Nguluwi.” Hamba nawahiluka kaye.
21 Mkulu Nguluwi nakamtambichiza Hana naye nakaponda wana walume wadatu na wahinza weli. Msongolo Samweli kalutilila kukula hali Mkulu Nguluwi.
Eli na wanage walume
22 Mhela awo Eli nayali sekulu ng'hatu, loyahuliche geng'ha wana wa heye walume gowawaditile Waisilaeli, vyowawele wowasa na wadala wawele wakola mijito hali lwizi lwa ihema lya Nguluwi,
23 nakawauza, “Lekachoni mwangudita mbuli azi? Ndanguhulika kulawa kwa wanhu weng'ha kuwala wihe womlingudita.
24 Haiwele ahyo wana wa heni! Ayi mbuli yondilinguhulika yokwenela hali wanhu wa Mkulu Nguluwi, hainojile.
25 Wone munhu yamditile gehile myage, Nguluwi koweza kumlechela. Ila wone munhu yamditile gehile Mkulu Nguluwi, whaani yowahanyisa?” Ila wanage hawahulichize makanyo ga mhaza wa hewo, kwa vila Mkulu Nguluwi nakagana kuwakopola.
26 Msongolo Samweli kalutilila kukula, yomnojeza Mkulu Nguluwi na wanhu.
Uloli kwa ivyazi lya Eli
27 Zuwa limwe munhu wa Nguluwi nakamlutila Eli, nakamlonjela, “Mkulu Nguluwi kangulonga hino, ‘Nandilajila hazelu kwa ivyazi lya mhaza wa hegwe mhela lowawele ako Misili hali ulongozi wa Falao.
28 Kuli nhanzi zeng'ha za Isilaeli nandimhagula Aluni na walelwa wa heye wawe watambika wa heni wakole mijito kuli honhu ha kulavila nhambiko, wafunyize ubani na kuvala chizibao hali heni. Kahi ndiwapa hachi ya kuhola honhu ha miwunde ja nhambiko zeng'ha zilavigwe kwa chiluli na Waisilaeli.
29 Lekachoni kwangubeza nhambiko za heni na ndolendole zila zilajizwe kwa chiwalo cha wanhu wa heni? Lekachoni kwanguwahulichiza wanago kusinda heni kwa kineneheza mwemwe kwa kulya hala honhu hanojile ha chila nhambiko zilavigwe na wanhu wa Isilaeli?
30 Ahyo, heni Mkulu Nguluwi, Nguluwi wa Isilaeli nandilaha kota ivyazi lya hegwe na lya wasekulu wa hegwe mokuya kumwando kwa heni mazuwa geng'ha. Ila lelo silingugana mbuli ayi ilutilile kwa heni! Wala walingunyhulichiza ndowahulichiza na walingumbeza nani ndolema kuwahulichiza.
31 Mhela wanguya hondipungula mong'ho wa hemwe na wa ivyazi lya wasekulu wa hemwe, leka hawe haduhu munhu wa hemwe yawele yochikala mbaka kuwa sekulu.
32 Namwe mowa na masinzo hali haluga ha heni. Hanga Isilaeli woditilwa kunoga, hakuwa na munhu kuli ivyazi lya hegwe yawele yochikala mbaka kuwa sekulu.
33 Munhu yumwe hela wa hegwe yawele yohambe ndimuse kulawa kuli honhu ha heni ha kulavila nhambiko, ayo kopona yolila na kulombocheza kwa chiwalo cha walelwa wa hegwe weng'ha vyowokopoligwa kwa ipanga.
34 “ ‘Chila chochilawila kwa wanago weli, Hofini na Finehasi, chowa ulajilo kwa hegwe. Weng'ha weli wobagama kuli zuwa limwe.
35 Nani ndoyinulila mtambika yunji yalingukundigwa, yawele kodita kota chila chiwele mnhumbula ya heni na kuli nyhala za heni. Ndolidita ivyazi lya heye liwe nzinzili, nawo wokola mijito hali yabakalizwe mafuta wa heni mazuwa geng'ha.
36 Hamba chila yumwe yalechigwe kwa hemwe kokuya na kufugamila hali heye kwa chiwalo cha sendi na ibumunda yolonga, “Unyhagule kuli honhu hanji ha kukolela mijito ha utambika leka ndiwe na chilyo.” ’ ”