27
Daudi na Wafilisti
1 Daudi nakalonga mnhumbula ya heye, “Zuwa limwe Sauli kong'hopola kwa moko wa heye yuye. Haduhu mbuli inojile kwa heni kusinda kubilimila isi ya Wafilisti. Naye Sauli kogozola kumhala kuli mbaka jeng'ha ja isi ya Isilaeli, nani ndochilohola kulawa kuli moko ga heye.”
2 Daudi na wanhu wa heye miya sita nawaluta kwa Akishi, mwana wa Maoki, mndewa wa Gati.
3 Daudi na wanhu wa heye na wang'holozawo nawekala na Akishi ako Gati. Daudi nayali na wache weli, Ahinoamu kulawa Yesileeli na Abigaili yawele aho hamwande nayali mche wa Nabali kulawa Kalimeli.
4 Sauli loyahuliche kota Daudi nakabilimila Gati, hampalile kahi.
5 Zuwa limwe Daudi nakamlonjela Akishi, “Wone nandikunojeza, umhe heni honhu ha muji kuli isi, leka ndikale ako. Haduhu chinhu cha kundita ndikale na hegwe hano kuli muji wa chiundewa.”
6 Zuwa lila Akishi nakamha Daudi muji wa Sikilagi. Kwa chiwalo acho, kulawa mhela wula, muji awo wa Sikilagi ndo wa mndewa wa Yuda.
7 Daudi nakekala ako kuli isi ya Wafilisti kwa mwaka umwe na myezi jine.
8 Kwa mhela awo Daudi na wanhu wa heye nawaluta kuwatowa Wageshuli na Wagilisi na Waamaleki walingikala kuli isi ayo kulawa katali. Naketowa mbaka Shuli habehi na Misili.
9 Daudi nakaitowa isi ayo ne kumleka munhu yoneche yawele mkomu, hawele mlume ne mdala. Nakahola ming'holo na misenga na midogowi na ngamiya na mivalo, hamba nakahiluka kwa Akishi.
10 Akishi nakamuuza Daudi, “Ndaze, lehano nakitowa mbaka kohi?” Daudi nakamwidichila kwa udesi kota ubanzi wa Negebu ya Yuda ama ubanzi wa Negebu ya Wayelameeli ama ubanzi wa Negebu ya Wakeni.
11 Daudi hamlechile munhu yoneche yawele mkomu ne mlume ne mdala leka yegaligwe Gati. Nakejesa mnhumbula ya heye, “Waleche kutulonjeleza na kulonga, ‘Daudi ndo yaditile ahyo.’ ” Nayali yodita hihyo mhela loyawele yochikala kuli isi ya Wafilisti.
12 Lelo Akishi nakakunda kota Daudi nakawatowa Waisilaeli, nakalonga, “Nakazudilwa ng'hatu na wang'holoze Waisilaeli. Lelo kowa chitumagwa wa heni mazuwa geng'ha.”