14
Abusalomu kanguhiluka Yelusalemu
1 Yoabu, mwana wa Seluiya nakavizela kota nhumbula ya Daudi naigana kumona mwanage Abusalomu,
2 lelo nakamchema munhu yumwe yakamigale mdala yawele na nyhala na yawele yochikala ako Tekoa. Yoabu nakamlonjela mdala, “Uvale nguwo za kulombocheza na uleche kinoliga kwa mafuta. Widite kota mdala yawele nayali na masinzo kwa mazuwa menji kwa chiwalo cha kufililwa.
3 Hamba ulute kwa mndewa na ulonje ulonzi awu.” Yoabu nakamlonjela yula mdala ulonzi wa kumlonjela mndewa.
4 Mdala ayo kulawa Tekoa nakaluta kwa Daudi. Naketoza chifunama hali Daudi na kumfugamila na kulonga, “Mndewa, dedede ndangulanda unhanze!”
5 Daudi nakauza, “Kuna mbuli yachi?” Mdala nakedichila, “Mlume wa heni nakabagama, sambi nda mdala fililwe.
6 Nandali na wana walume weli. Nawetowa hewo kwa hewo ako kumgunda, hakuwele na munhu wa kuwalewela, ahyo yumwe nakamtowa na kumkopola myage.
7 Lelo wang'holozangu weng'ha nawoya kwa heni na kulonga, ‘Umlavye mwanago! Twanguluta kumkopola heye kota vyoyamkopole mng'holoze.’ Ila chowalingugana ndo kumusa heye leka wahole isi ya hetwe. Dedede uleche kuwadita wose kitumbila kwa heni. Kowa kulihela munhu yopona hano muisi yohola itagwa lya mlume wa heni.”
8 Daudi nakamlonjela yula mdala, “Uhiluche kaye. Ndoidita mbuli ayi kwa chiwalo cha hegwe.”
9 Mdala yula nakalonga, “Mndewa wa heni, nongwa yeng'ha iwe kwa heni na kwa ivyazi lya mhaza wa heni. Ahyo, hali hegwe na chigoda cha undewa wa hegwe haleche kuwa na nongwa.”
10 Daudi nakalonga, “Wone munhu yoneche yokutunya kahi, umigale ayo kwa heni na hokudoliza kahi!”
11 Ayo mdala nakalonga, “Lelo, hegwe mndewa umlande Mkulu Nguluwi, Nguluwi wa hegwe leka kulemeza kuhilula chibida, leka mwana wa heni yaleche kukopoligwa.” Mndewa nakalonga, “Kukomya, kota Mkulu Nguluwi vyoyalingikala, ndangilaha kota mwanago holumizwa ne hado.”
12 Hamba nakamuuza, “Mndewa, ndoweza kulonga chinhu chimwe kahi?” Mndewa nakamwidichila, “Ena.”
13 Mdala nakalonga, “Huwalumize hebu wanhu wa Nguluwi? Mwana wa hegwe nakoka kuli isi ayi. Wone ulingutagusa mbuli ya heni kota ahi, fola umkundize mwana wa hegwe yahiluche kuli isi ya heye.
14 Hetwe tweng'ha tobagama na kwajilila kota mazi gabohoche mmisanga. Ila Nguluwi hokusa ukomu, kangupala nzila ya kumhilusa heye yabilime.
15 Mndewa, mbuya hano leka ndikulonjele mbuli yombele nayo, kwa vila nandali ndidumba munhu yoneche koweza kunditila chinhu chihile. Nyamula kuya kwa hegwe kwa vila nandali ndijesa hanji konhanza.
16 Mina nandivizela mndewa konyhulichiza na kundohola heni na mwana wa heni kulawa kwa wala wanhu walingugana kuiboka isi yatupele Nguluwi.
17 Lelo nandijesa, ‘Ulonzi wa mndewa wa heni umhe heni kwesela,’ kwa vila mndewa wa heni ndo kota mhilisi wa Nguluwi kuli kuvizela linojile na lihile. Mkulu Nguluwi, Nguluwi wa hegwe yawe hamwe na hegwe.”
18 Hamba Daudi nakamlonjela yula mdala, “Lelo ndokuuza chinhu na uleche kuvisa choneche!” Yula mdala nakedichila, “Dedede, umbuze mndewa.”
19 Daudi nakamuuza, “Yoabu kakuwika hegwe kuli mbuli ayi?” Mdala nakedichila nakalonga, “Mndewa, ndangilaha kwa ukomu wa hegwe kota kuduhu ne yumwe yovisa chinhu kwa hegwe. Ena, Yoabu nakandangusa cha kulonga,
20 ila Yoabu nakadita ahyo leka kugalula mbuli ya ilingumuwala Abusalomu. Hegwe, mkulu wa heni kuna luhala kota mhilisi wa Nguluwi mbaka kwanguvizela mbuli zeng'ha ziwele muisi.”
21 Daudi nakamgalamchila Yoabu na kulonga, “Goya, ndoidita mbuli ayi. Umhiluse haluga yula msongolo Abusalomu.”
22 Yoabu nakagwa chifunama, nakafugama na kumtambichiza mndewa na kulonga, “Lehano, heni chitumagwa wa hegwe, mndewa wa heni, ndivizela kota nakunojezwa na heni, kwa kukunda kulanda kwa heni.”
23 Yoabu nakaluta Geshuli kumhola Abusalomu, ila lowahiluche Yelusalemu,
24 Daudi nakamlonjela Yoabu, “Silingugana kumona mwanangu Abusalomu. Umlonjele yekale kutali na heni.” Ahyo, Abusalomu nakaluta kikala kuli ng'handa ya heye ne kumona mhaza wa heye.
Abusalomu na Daudi wangihanyisa
25 Kuduhu msongolo ne yumwe hali Isilaeli yawele yanojile kota Abusalomu. Kulawa kumeho kwa heye mbaka kuli uzayo wa heye, Abusalomu hawele na nongwa yoneche.
26 Chila kuli kuduma kwa mwaka nayali yobeya mnvili za heye. Loyabeyile mnvili azo, nazali na itunyo lya kilo mbili kwa vipimilo vya undewa.
27 Abusalomu nayali na wana walume wadatu. Nayali kahi na mhinza nayachemigwe Tamali, yawele yanojile lukami.
28 Abusalomu nakekala Yelusalemu kwa mhela wa miyaka mili ne kiwona na mhaza wa heye, Daudi.
29 Nakagana Yoabu yalonje na Daudi honhu ha heye. Ahyo, zuwa limwe nakamlajiza msenga kumlajiza Yoabu yoye kwa heye, ila Yoabu nakalema. Abusalomu nakamlajiza msenga yunji, ila Yoabu nakalema kahi.
30 Hamba Abusalomu nakawalonjela vitumagwa wa heye, “Mgunda wa shayili wa Yoabu wangilola na wa heni. Mlute mkausome!” Hewo nawadita kota vyowalonjelwe.
31 Yoabu nakaluta mbaka kuli ng'handa ya Abusalomu na kumlonjela, “Lekachoni vitumagwa wa hegwe nawasoma mgunda wa heni?”
32 Abusalomu nakedichila, “Hung'hundile hondikulajize. Ndangugana ulute ukamuuze mhaza wa heni, lekachoni yandonjele nyhiluche kulawa Geshuli? Nandali ndikale goya kula. Ndangugana ndimone mhaza. Wone ndina nongwa, lelo yang'hopole.”
33 Yoabu nakaluta kwa Daudi na kumlonjela geng'ha goyalonjile Abusalomu. Daudi nakamchema Abusalomu, naye nakoya na kitoza chifunama, Daudi nakamnonela Abusalomu.