16
Siba na mndewa Daudi
1 Daudi nakaluka kudulika kuchidunda ubanzi wa keli wa chidunda cha mzeituni, loyating'hane na Siba, chitumagwa wa Mefibosheti. Siba yawele na midogowi mili jipapile mibumunda miya mbili na vilundo miya imwe vya zabibu zikalile na mafuza miya imwe ga tini na chihako cha igozi cha kuwichila divai.
2 Daudi nakamuuza Siba, “Vya choni vinhu avi vyeng'ha?” Siba nakamlonjela, “Idogowi ndiwagalila ivyazi lya hegwe kukwina. Mibumunda na mafuza ndiwagalila wanhu kulya na divai ndo ya kunwa lowowa kuchiwala hala howochiwona watoka.”
3 Daudi nakamuuza “Kakohi Mefibosheti?” Siba nakedichila, “Kangikala Yelusalemu, kwa vila nakejesa kota wanhu wa Isilaeli wangugana heye yalongoze undewa wa sekulu wa heye, Sauli.”
4 Hamba Daudi nakamlonjela, “Chila chinhu nachiwele cha Mefibosheti sambi ndo cha hegwe.” Siba nakalonga, “Mndewa, heni nda chitumagwa wa hegwe hela, ndangitumbila konojezwa na heni.”
Shimeyi kangumpanjila mndewa Daudi
5 Daudi nayali habehi na muji wa Bahulimu hala munhu loyalawile na kwaluka kumpanjila. Munhu ayo nayali Shimeyi, mwana wa Gela na nayali yumwe wa wang'holoze Sauli wa kutali.
6 Nakamtozela maganga Daudi na vitumagwa wa heye na kwa chila munhu yawele hamwe na heye, hanga wamizi nawali womwamila mndewa Daudi ubanzi wa kumoso na kudilo.
7 Shimeyi nayali yompanjila Daudi, “Uche hano, hegwe mkopolaji. Kwa mwihe hegwe!
8 Mkulu Nguluwi kangukuhilusila chibida kwa kuwakopola wanhu wenji kuli ivyazi lya Sauli. Nakuhiza undewa wa heye ila sambi Mkulu Nguluwi nakamha Abusalomu. Kuna magazo kwa vila hegwe kwa mkopolaji.”
9 Hamba Abishayi, mwana wa Seluiya nakamlonjela mndewa, “Lekachoni ali libwa lifile lyangumpanjila mndewa wa heni? Ng'hundize ndute kudumula mutwi wa heye.”
10 Daudi nakedichila, “Mbuli ayi hailinguwawala hemwe. Wone Shimeyi kangumhanjila heni kwa vila Mkulu Nguluwi nakamlonjela heye, lelo hemwe mwa whaani mumlonjele yaleche?”
11 Hamba Daudi nakamlonjela Abishayi na wamizi wa heye, “Mwana wa nene baha kangugana kung'hopola! Ayu Mbenjamini kahi kogana heni mbagame. Mumleche yamhanjile. Hanji Mkulu Nguluwi nakamlonjela yamhanjile.
12 Ila wone Mkulu Nguluwi yahuliche kupanjila aku na kulola nongwa yombele nayo, hanji kowa na isungu kwa heni.”
13 Daudi na wanhu wa heye nawalutilila na majendo mnzila, ila Shimeyi nayali yojenda hafungo mwa chidunda hamwe na Daudi, kuno yompanjila na kuwatozela maganga na nhimbwisi.
14 Hala Daudi na weng'ha wawele hamwe na heye lowafichile kuli lwanda lwa Yolodani, nawatoka lukami. Ila lowesele, nawawa na mong'ho kahi.
Abusalomu kangwinjila Yelusalemu
15 Mhela awo Abusalomu na wanhu weng'ha wa Isilaeli nawafika Yelusalemu, naye Ahitofeli nayali hamwe na heye.
16 Aho ndo Hushayi, Mualiki, goloko wa Daudi, nakoya kwa Abusalomu na kulonga, “Wikale mndewa! Wikale mndewa!”
17 Ila Abusalomu nakamuuza Hushayi, “Ahi ndo vyoulingulajila igano lya kwimilila kwa goloko wa hegwe Daudi? Lekachoni hulutile hamwe na heye?”
18 Hushayi nakedichila, “Mkulu Nguluwi na wanhu weng'ha wa Isilaeli nawakuhagula hegwe uwe mndewa. Sikuka hebu. Ndopona baha na kuwa chitumagwa wa yula wamhagule.
19 Mzidi wa ago, ndomkolela mijito whaani? Ndaze, hawele mwana wa goloko wa heni? Lelo, kota vyondimkolele mijito mhaza wa hegwe, ahyo ndo vyondikukolela mijito hegwe.”
20 Abusalomu nakahinduka kwa Ahitofeli na kulonga, “Utulonjele, tudite choni?”
21 Ahitofeli nakedichila, “Wamwe wa waha wa mhaza wa hegwe nawapona aha kulolela ng'handa ya mndewa. Uwase na hewo. Hamba chila yumwe kuli isi ya Isilaeli kovizela kota hegwe kwa izudizo kwa mhaza wa hegwe. Ayi yowadita wanhu walingukuwinza wawe wekangaze, kwa vila wokona hegwe hulingudumba chinhu choneche.”
22 Ahyo, wanhu nawamwichila ihema Abusalomu kuchinduwiko cha ng'handa ya mndewa, Waisilaeli weng'ha nawali wolola yokwinjila na waha wa mhaza wa heye kwa chiwalo cha kuwasa nawo.
23 Mazuwa ago, ulonzi woneche woyalavile Ahitofeli nawali kota naulawa kwa Nguluwi, ahyo nawali uhulichizwa na Daudi na Abusalomu.