24
Daudi kanguwawaza wanhu
(1 Mihela 21:1-27)
1 Kwa mala iyage, Mkulu Nguluwi nakawazudila Waisilaeli, nakamwambuza Daudi yawatunye Waisilaeli. Mkulu Nguluwi nakamlonjela, “Wawaze wanhu wa Isilaeli na wanhu wa Yuda.”
2 Ahyo, mndewa Daudi nakamlonjela Yoabu na vilongozi wa wamizi wawele hamwe na heye, “Mlute kuli nhanzi zeng'ha za isi ya Isilaeli, kulawa kuli muji wa Dani mbaka Beeli-sheba, mkawawaze wanhu leka ndivizele hisabu ya hewo.”
3 Ila Yoabu nakamlonjela mndewa, “Mkulu Nguluwi, Nguluwi wa hegwe, yawonjeze Waisilaeli mala miya kusinda vyowawele sambi, leka nagwe, mndewa wa heni wone konjezeka ako kwa meho ga hegwe baho. Ila, lekachoni hegwe mndewa wa heni nakunojezwa na mbuli ayi?”
4 Ila ulonzi wa mndewa Daudi nauwasumya Yoabu na vilongozi wa wamizi. Lelo, Yoabu na vilongozi wa wamizi nawoka hali mndewa, nawaluta kuwawaza Waisilaeli.
5 Nawaloka lwanda lwa Yolodani na kuwika kambi ya hewo kusini mwa muji wa Aloeli, muji uwele hagati ha ibindi, ako Gadi. Kulawa ako nawaluta mbaka Yaseli.
6 Hamba, nawaluta Kadeshi iwele ako Gileadi kuli isi ya Wahiti. Hamba nawafika Dani na kulawa ako nawaluta Sidoni
7 na kufika kuli ngome ya muji wa Tilo, nawenjila kuli miji jeng'ha ja Wahivi na Wakanaani. Hamba, nawalawa na kuluta ubanzi wa kusini kuli Yuda ako Beeli-sheba.
8 Lowajendile isi yeng'ha, nawahiluka Yelusalemu lojikolile myezi tisa na mazuwa makumi meli.
9 Hamba Yoabu nakamhilichila mndewa hisabu ya wanhu. Kuli isi ya Isilaeli nakwali na walume wazidahe lachi nane (800,000) wawezile kutumiya vinhu vya kitowa ngondo na kuli isi ya Yuda, nakwali na walume lachi tano (500,000).
10 Ila Daudi nakaluka kitagusa mnhumbula kulawa vyoyawawalize wanhu. Ahyo, Daudi nakamlonjela Mkulu Nguluwi, “Ndita gehile ng'hatu kwa mbuli yondiitile. Ila sambi, gwa Mkulu Nguluwi, ndangukudedeza undechele heni chitumagwa wa hegwe, kwa vila ndita mbuli ya chipoka ng'hatu.”
11 Daudi vyoyenuche mitondo, mhela awo Mkulu Nguluwi nakamha usenga Gadi, mloli wa mndewa Daudi, yolonga,
12 “Ulute ukamlonjele Daudi hino, ‘Mkulu Nguluwi kangulonga ahi. Ndina mbuli zidatu kwa chiwalo cha hegwe, lelo wihagulile mbuli imwe, nani ndokuditila.’ ”
13 Lelo Gadi nakaluta kwa Daudi na kumlonjela, “Ndaze, lulawile lufemba lwa miyaka saba kuli isi ya hegwe ama myezi jidatu ja kuwabilima wang'honyo wa hegwe howokuwinza ama mazuwa gadatu ga utamwa wa tauni kuli isi ya hegwe? Lelo wijese kwa chiwalo cha mbuli ayo na wamule ndaze vyondimwidichila ayo yanhumile.”
14 Daudi nakamwidichila Gadi, “Ndina lunhwinhwi ndogazika ng'hatu. Ila fola Mkulu Nguluwi yangaze, mina heye kana isungu lukami, kusinda kuwichigwa mmoko mwa wang'honyo.”
15 Lelo, Mkulu Nguluwi nakawegalila Waisilaeli utamwa wa tauni kulawa mitondo mbaka mhela woyamule Nguluwi. Wanhu elufu makumi saba (70,000) nawabagama kuli isi yeng'ha, kulawa Dani mbaka Beeli-sheba.
16 Ila yula mhilisi loyagolole moko wa heye kulutila muji wa Yelusalemu leka kuudumya, Mkulu Nguluwi nakagalula kunuwila kwa heye. Mkulu Nguluwi nakamlonjela yula mhilisi yawele yowadumya wanhu, “Ihega! Uhiluse moko wa hegwe.” Mhilisi wa Mkulu Nguluwi nayali yemile habehi na honhu ha kupululila nyhule ha Alauna, Myebusi.
17 Daudi loyamuwene ayo mhilisi yoyawele yowakopola wanhu, nakamlonjela Mkulu Nguluwi, “Lole, heni ndo mbele na nongwa! Nene baha ndo nditile gehile! Wanhu awa ndo waliholile, hawaditile wihe. Ndangukudedeza ng'hatu ungaze heni na ivyazi lya heni.”
Daudi kanguzenga honhu ha kulavila nhambiko
18 Zuwa lilyo Gadi nakamlutila Daudi na kumlonjela, “Ulute ukamzenjele Mkulu Nguluwi honhu ha kulavila nhambiko, kuli honhu ha kupululila nyhule ha Alauna, Myebusi.”
19 Ahyo Daudi nakaluta kota Mkulu Nguluwi vyoyalajize kwa kukolela Gadi.
20 Alauna nakalola na kumona Daudi na vitumagwa wa heye womhejelela, naye nakaluta na kitoza hanyi hali mndewa na kumfugamila.
21 Hamba Alauna nakamuuza mndewa, “Lekachoni mndewa wa heni nakoya kwa chitumagwa wa heye?” Daudi nakedichila, “Mbuya kugula honhu ha hegwe ha kupululila nyhule leka ndimzenjele Mkulu Nguluwi honhu ha kulavila nhambiko, leka utamwa wa tauni uwele hali wanhu wusigwe.”
22 Alauna nakamlonjela Daudi, “Mndewa wa heni, uhole choneche choulinguchona chinoga na ulavye nhambiko. Heni ndangujilavya mibuguma aji kwa chiwalo cha nhambiko ya kulakazwa na vinhu avi vya kupululila nyhule na ngwamo za misenga ziwe ngodi.
23 Gwa mndewa, ndangukupa vinhu avi vyeng'ha. Ndangitumbila Mkulu Nguluwi, Nguluwi wa hegwe, konojezwa na nhambiko ya hegwe.”
24 Ila mndewa Daudi nakamwidichila Alauna, “Hebu! Hegwe huweza kumha heni choneche hihi hela. Heni ndovigula kwa hegwe. Simlavila Mkulu Nguluwi, Nguluwi wa heni, nhambiko za kulakazwa ziwele heni silavile ne chinhu.” Ahyo, Daudi nakagula hala honhu ha kupululila nyhule na mibuguma kwa migwala makumi gahano ga sendi.
25 Hamba Daudi nakamzenjela Mkulu Nguluwi honhu ha kulavila nhambiko na kumlavila nhambiko za kulakazwa na za kikala goya. Lelo, Mkulu Nguluwi nakakunda kulanda kwa chiwalo cha isi. Utamwa wa tauni nawuka kuli isi ya Isilaeli.