6
Isanduku lya ilagano lyanguhilikwa Yelusalemu
1 Daudi nakawakungajiza kahi wanhu walume elufu makumi gadatu wa Isilaeli wahaguligwe.
2 Daudi nakoka na wanhu wa heye weng'ha wawele na heye kulawa Baala ako Yuda, kuza hola isanduku lya ilagano lilinguchemigwa kwa itagwa lya Mkulu Nguluwi Yawele na Mong'ho, yalingikala kuli chigoda cha undewa hagati ha vilumbigwe vifandile kota wahilisi.
3 Nawalihola isanduku lya ilagano lya Mkulu Nguluwi kulawa kuli ng'handa ya Abinadabu iwele kuli chidunda, nawalikwiniza kuli mutuka unyale. Usa na Ahio, wana wa Abinadabu, nawali wolongoza mibuguma jilingukwega mutuka awo,
4 uwele na isanduku lya ilagano lya Mkulu Nguluwi. Ahio nayali yojenda yawele kumwando mwa isanduku alyo.
5 Daudi na wanhu wa heye weng'ha wa Isilaeli, nawali wokwimba nzimbo na kuvina kwa mong'ho wa hewo weng'ha hali Mkulu Nguluwi. Nawatowa vinhu vya muziki vigongomanyigwe kwa igodi lya mvinje, kota ving'hweleng'hwele na igombogombo na ngoma ndodo na kayamba na matoazi.
6 Lowafichile kuli honhu ha kupulila nyhule ako Nakoni, Usa nakagolola moko wa heye na kibata isanduku lya ilagano lya Mkulu Nguluwi kwa vila jila mibuguma najikwang'hwala.
7 Baho Mkulu Nguluwi nakamzudila Usa kwa chiwalo cha nongwa ya heye. Nguluwi nakamkopola bahala. Ahyo Usa nakabagama bahala hafungo ha isanduku lya ilagano.
8 Daudi nakazudila kwa vila Mkulu Nguluwi nakamkopola Usa kwa kuzudila ng'hatu. Lelo kulawa mhela wula honhu aho nahachemigwa Pelesi-usa.
9 Zuwa alyo Daudi nakamdumba Mkulu Nguluwi nakalonga, “Lelo isanduku lya ilagano lyokuya ndaze kwa heni?”
10 Lelo Daudi hawele goya kuhilika isanduku lya ilagano lya Mkulu Nguluwi, mgati mwa muji wa Daudi. Ila Daudi nakalihilika kaye kwa Obedi-edomu, Mgiti.
11 Alyo isanduku lya ilagano nalikala kaye kwa Obedi-edomu, Mgiti kwa mhela wa myezi jidatu, Mkulu Nguluwi nakamtambichiza Obedi-edomu hamwe na wang'holoze.
12 Mndewa Daudi loyahuliche kota Mkulu Nguluwi nakalitambichiza ivyazi lya Obedi-edomu na vinhu vyeng'ha vyoyawele navyo kwa chiwalo cha isanduku lya Nguluwi, nakaluta kulihola isanduku lya ilagano kwa Obedi-edomu na kulihilika kuli muji wa Daudi kwa kusangalala.
13 Wala wanhu wapichile lila isanduku lya ilagano lya Mkulu Nguluwi lowalutile magulu sita, Daudi nakalavya nhambiko, ibuguma limwe na ilogota limwe linenehe.
14 Daudi vyoyawopile goya chizibao cha kitani mchuno cha heye, nakavina kwa mong'ho wa heye weng'ha hali Mkulu Nguluwi.
15 Lelo heye na wanhu weng'ha wa Isilaeli nawalihilika isanduku lya ilagano lya Mkulu Nguluwi mbaka kuli muji wa Daudi kwa lizi lya kusangalala na mhalamhanda.
16 Isanduku lya ilagano vyoliwele likwinjila kuli muji wa Daudi, Mikali mhinza wa Sauli nakasunjilila kuli itubuli nakamona mndewa Daudi nayali yonyozoka na kuvina hali Mkulu Nguluwi, nakambeza mnhumbula ya heye.
17 Hamba, nawalinjiza isanduku lya ilagano kuli ihema ligongomanyigwe na Daudi na kuliwika honhu hake. Daudi nakalavya nhambiko ya kulakazwa na nhambiko za kikala goya hali Mkulu Nguluwi.
18 Daudi loyalavile nhambiko za kulakazwa na za kikala goya, nakawatambichiza wanhu kwa itagwa lya Mkulu Nguluwi Yawele na Mong'ho
19 na kuwagawila ibumunda na iwunde na vizabala vya zabibu zikalile wanhu weng'ha na ikugusi lyeng'ha lya Waisilaeli, walume na wadala. Hamba chila munhu nakaluta haluga hake.
20 Daudi loyahiluche haluga hake leka yawatambichize wang'holoze, Mikali, mhinza wa Sauli, nakaluta kumbochela, nakalonga, “Kububuwaza kwa mndewa wa Isilaeli kitogola kota ahi lehano, kwa kiwika mwanzi hali wapogozi wadala wa vitumagwa wa heye kota mpoka yalingusa mivalo ja heye hali wanhu ne kona soni!”
21 Daudi nakamlonjela Mikali, “Nandali hali Mkulu Nguluwi yanyhagule heni na kumleka mhaza wa hegwe na wang'holoze, leka ndiwe mkulu wa wanhu wa Isilaeli wawele ndo wanhu wa Mkulu Nguluwi, lelo heni ndovina hali Mkulu Nguluwi.
22 Ndochidita munhu mdodo kusinda weng'ha sambi. Hegwe kombona heni siwele chinhu, ila hewo vitumagwa wadala wouwalonjele wonyhulichiza.”
23 Lelo Mikali, mhinza wa Sauli nayali hela mwana mbaka kubagama kwa heye.