10
Nguluwi kangulagana kuwala ulohozi
1 Mumlande Mkulu Nguluwi yawape hemwe nhonya za luhela.
Mkulu Nguluwi ndo yalingigala ng'hungugu ya nhonya,
ndo yalinguwapa wanhu nhonya ndodo,
na kujidita mizuchila jidedemche kuli migunda kwa chiwalo cha weng'ha.
2 Kwa vila jimalukolo ja hewo ja kulagulila ndo upoka hela,
walaguzi wa hewo wangulagula udesi,
wangulavya ulotezi wa uhadi,
na kuwahembuliza wanhu hela.
Ahyo wanhu wa Yuda wangulubaluba kota ing'holo,
wangugazika kwa vila wahela mdimi.
3 Mkulu Nguluwi kangulonga hino,
“Nanzudila ng'hatu kwa chiwalo cha wadimi awo,
ndowazapa awo vilongozi.
Heni Mkulu Nguluwi Mbele na Mong'ho,
ndochamila chilundo cha heni, chiwele ndo lukolo lwa Yuda.
Ndowadita wawe falasi wa heni wazidahe kuli kitowa ngondo.
4 Kulawa kuli lukolo lwa Yuda,
wolawila vilongozi wa vilivinji,
vilongozi wawele nzinzili kota iganga lya msisi,
wawele nzinzili kota chigingi cha ihema,
wawele na mong'ho kota upinde wa ngondo.
5 Wanhu wa Yuda wowa kota wazidahe kuli ngondo,
wowabiga wang'honyo wa hewo kuli nhope mnzila.
Wochitowa, kwa vila heni Mkulu Nguluwi nda hamwe na hewo,
nawo wowabasa soni mbaka walingukwina falasi.
6 “Ndowadita wanhu wa Yuda weme nzinzili,
na kuwalohola walelwa wa Yusufu.
Ndowahilula hali haluga ha hewo, kwa vila ndanguwonela isungu.
Wowa kota wanhu wawele siwalemile aho hamwande,
kwa vila heni ndo Mkulu Nguluwi, Nguluwi wa hewo, ndowedichila.
7 Wanhu wa Isilaeli wowa wanhu wazidahe kuli kitowa ngondo,
wosangalala lukami kota wanhu wanwele divai.
Wana wa hewo wogona ago na kusangalala,
womema usangalalo mnhumbula za hewo kwa chiwalo cha heni Mkulu Nguluwi.
8 “Ndowachema wanhu wa heni
na kuwakungajiza hamwe,
nanuwila kuwagombola,
nawo wowa wenji kota aho mwaluko.
9 Hanga nandiwasambalula hali wanhu wa isi,
ila wong'humbuchila howowa kuli isi za kutali.
Hewo hamwe na wana wa hewo wosulupuka,
na kuhiluka haluga ha hewo.
10 Ndowahilula kulawa kuli isi ya Misili,
na kuwakungajiza kulawa Ashulu.
Ndowegala kuli isi ya Gileadi na Lebanoni,
aho, howa haduhu honhu ha kuhega kwa chiwalo cha hewo.
11 Wokola kuli bahali ya magazo,
nani ndozitowa nhigu zake,
mazi menji ga lwanda lwa Naili gokala.
Kidaya kwa Ashulu kokusigwa,
na ng'hweku ya undewa wa Misili yokwajilila.
12 Ndowadita wanhu wa heni wawe nzinzili,
nawo wonyhulichiza na kikala kwa kunojeza heni.
Heni Mkulu Nguluwi nandonga.”