12
James i viraḡeni ma Peter i pani
1 Lamna maranai, gulau Herod Agrippa i raukarei da ekalesia ḡelaui i rau-iviapoapoelei.
2 James, John tuana uana sodei i bori-tuini.
3 Ma maranai Herod i ʼnanai da mai Jew wei kauana i vinuaiaiei, ma ana sorodia i egari da Peter maiteni ita pani da au pani numana ita terei. Wei kauana Palawa Bagibagina ana au torela i tupua.
4 Ma Peter i pani ma au pani numana i terei ma sorodia 16 tauna i paini. [Sorodia 16 i terei da borui 4 ma i vipaipai.] Herod i ḡoei da Peter ita vojijini da raḡona torelana au murina ma au deba ita rauetarei.
5 Ma lamna aubaina Peter au pani numana i vojijini mara aburuna. Wate ekalesia i raraupari guratana God awarina Peter aubaina.
Peter pani numanei i tere-opunei
6 Ma nai waguvaraina, ma maratomna da Peter ita rauetarei, Peter sorodia ruaḡa au poui i matamatave. Urana seinei i raḡini sorodia ruaḡa au urai, ma sorodia ḡelaui au metaeta i vipaipai.
7 Maratagogi Bada ana anela i eḡa ma pani numana i ravilalai. Ma Peter i vogugui da matana i kala ma i riwei, “Laḡilaḡina ma vomairi!” Ma sein au urana i dabarara.
8 Ma Peter i riwei, “Ma vigara ma ae uma ma oteni.” Ma nanare i kauei. Ma i egari, “Am kwama potopotona ma oteni ma ma votaḡotaḡoiu.”
9 Peter anela i votaḡotaḡoi da pani numana i opu-tawanei, wate eḡa ita aramanei anela aiwai i kaukauei, tauna i notai i rarauboni.
10 Taui, sorodia boruna ruaḡa au doa i netawanei, da i opu au metaeta iramei, wei e opuopu au taon. Metaeta ainelana i wanatawanei aubaii ma i opu. Taui etanai tagogi i ḡairani ma maratagogi anela tauna i voterei.
11 Peter ana nota i nememei ma i riwa, “Wei anina riwa kaua! Bada ana anela i paritawaneiai da Herod au urana i vaitawaneu, da mai Jew aiwai i notanotai da ita tupua lamna eḡa ita tupua.”
12 Maranai ana nota i nememei tauna i nae Mary ana au numa. (Mary lamna John alona. John wavana ḡelauna Mark). Kampa rava maḡamaḡaui i vitagogiei ma i raraupari.
13 Peter au metaeta i raupewapewa ma taunola wavana Rouda i nei da metaeta ita votawanei.
14 Ma Peter ponana i nonori ma i aramanei da tauna, ma i vinuaiai guratana da eḡa metaeta ita votawanei ma i ruba-rui da i vinolanola i pa, “Peter au metaeta e maimairi!”
15 Wate taui eḡa ita vitumaḡanei ma i riwei, “Tam ma bubua!” Wate tauna i riwa bagibagi. Ma taui i riwa, “Nai Peter ana anela.”
16 Wate Peter i rarau-pewapewa ma maranai taui metaeta i votawanei ma i ʼnanai da tauna, taui orai i auepai.
17 Peter urana i voepai da rava i genuana ma i riwei menanare Bada pani numanei i tere-opunei. Ma i riwei, “James ma ekalesia ḡelaui wei ona pariverei.” Ma Peter i nae au dobuḡela.
18 Maranai mara i tom kampa au pani numana nuabola ma vinuanaina ḡaeḡaena i peu sorodia awarii da aiwai i tupua Peter awarina
19 Herod, ana sorodia i egari da Peter i baiei wate eḡa ita nelaḡai. Lamna aubaina sorodia 16 i etarei ma i viraḡeni. Muriai Herod Judea i netawanei ma i nae au Caesarea da ita mae mara aburuna.
Herod iraḡe
20 Marina Herod amlona i ḡaiḡai kaua Taia ma Sidon ravai awarii, lamna aubaina taui ana borui i nei da Herod maiteni wei i babaniei. Taui Herod ana taunola ḡaeḡaena Blastus, i taravaini da ita voagui. Taui rom i vibaḡei Herod maiteni. Aubaina ai lam Herod ana dobuei i nenei.
21 Ma marana i ḡetai da Herod maiteni ita viboru ma tauna ana vigulau garana i vigarei ma ana au anikiala i kiala ma awarii i babani.
22 Ma patara ana babani i nonori ma i logoi i pa, “Wei lamna god e bababani ma eḡa rava!”
23 Maratagogi Bada ana anela Herod i vipeuni au doa ma motamota orana i ani da iʼraḡe, aubaina tauna rava ai voepaepa i vinuaiaiei ma eḡa rava ita riwei da Bada ita voepaepai.
24 Ma ekalesia Bada riwana i raraugugulei ma rava maḡamaḡaui i nenei Bada awarina ma ekalesia i rarata.
25 Maranai Barnabas ma Saul ai nola au Jerusalem i vikwai, taui John-Mark i taravaini da maiteni i nei au Jerusalem.