91
God ata rawena
1 Aiai ravana e nenae Aidamo Telarana awarina agu aubaina,
lamna Vivirewapanana Kaukauana au ririvana ina mae.
2 Bada au God awarina ana riwa ana pa, “Tam au anigagalo ma au tauviḡavia.
Tam au God, a vivitumaḡanem.”
3 Aubaina tauna, ḡavia ana waro govagovaḡai
ma numa rarauabubu awarinei ina gagaloemi.
4 Tauna papenenei ina tereḡovaḡimi ma papena au gabaurina ina gagaloemi;
ana vipatutu, am rawena ma am anigagalo.
5 Waguvara kauai viʼni-rovorovoi eḡa ona rovoei,
bo ḡavia madeḡai e viviḡavia,
6 bo numa rarauabubu waguvara e viviḡavia,
bo doria madeḡai e viviraḡena.
7 Avena da rava tausan au ririvam i peu,
bo ten tausan au oiem i peu;
wate tam ita vodadana-avem.
8 Matamiei ona inana ma ona inanai
ḡoʼapoapoe ravai ai kovoḡa.
9 Aubaina Bada o vaia ami rawena; Ḡetelarana ami taugagalo.
10 Eḡa aiwai apoapoena awarimi ina tupua bo au numa ina ḡeta.
11 God ana anela ina terei da ina painimi
ma ina gagaloemi ami au babara.
12 Taui uraiei ina voepaim
da aem eḡa ḡaima au tepana ma rauei.
13 Taumi lion ma mota ona vovaiubai,
lion ḡaiḡaiawai ma mota viviwaiawai ona tugwadagwadai.
14 God i riwa i pa, “Aiai nuanuau e vaivainonoei, ana vilawani;
ma ana gagaloei, aubaina i aramana-kauei.
15 Maranai i kwatu awariu, ana paribelei.
Tau kampa ai au nuabola,
ana taravaini ma ana voepaepai.
16 Ai lawana ana vimanaini,
ma au vilawana mamae-nonoana ana viatataiei.”