15
Bada Saul i geduaiei
1 Muriai Samuel Saul i riwei, “Bada tau i paritawaneu da a buloim da u vigulau Israel aubaii. Lamna aubaina Bada ana riwa ma nonora-kauei.
2 Bada Vivirewapana Kaukauana i riwa i pa, ‘Tau mai Amalek ana kovoḡi aubaina amamai mai Israel i viḡaviei maranai Egyptei i opu da i nenei.
3 Marina ona nae mai Amalek ona viḡaviei ma ona pupuni, eḡa tagogi ona voterei, nelara, waivine, roaroa melamelai, bulumakau, sipu, kamel ma donkey.”
4 Ma Saul ana sorodia ai riwa i paritawanei da ita nei. Ma anatapui au Telaim taon i vinenebelana. Sorodia 10,000 Judah ana damei i nei ma 200,000 mai Israel ḡelauiei i nei.
7 Ma Saul ana sorodia maiteni i opu ma Amalek i vunu-naiei ma i vovaiubai, i viḡavia au Havilah ma au Shur i vikwai Egypt au ḡereḡerena.
8 Agag mai Amalek ai gulau lawalawaina i vojijini wate rava anatapui i viraḡeni.
9 Wate Saul ana sorodia maiteni Agag eḡa ita viraḡeni ma ai sipu ma bulumakau vinevinei ma bulumakau ma sipu natunatui aiaii eḡa ita viraḡeni. Taui ḡamoḡamo kirakiramai ava i viraḡeni.
10 Ma Bada Samuel i riwei,
11 “Tau orau i viara kaua da Saul a terei Gulau aubaina tauna i mae-puputeu ma riwau i rau-aḡaiḡaiei.” Samuel nuanuana i bola-kauei maranai wei riwana i nonori ma Bada awarina i tou-maratom.
12 Ubaubana boiboḡi Samuel i nae da Saul ita inanai wate i riwei da Saul i nae au Carmel taon. Kampa gana i vidamni da rava ita nei weka da tauna ita voepaepai, ma i ḡaira me au Gilgal.
13 Ma Samuel i ḡeta Saul awarina, Saul, tauna i viegualauei ma i pa, “Samuel, Bada ina viaiainim. Tau Bada riwana a voteletelei.”
14 Samuel i paribelei, “Aiwai aubaina sipu ma bulumakau e vivitouana a nononori?”
15 Saul i pa, “Sorodia mai Amalek awarii i vaia, bulumakau ma sipu vinevinei i vojijini da ina puloei Bada am God awarina wate ḡelaui anatapui a viraḡena-naiei.”
16 Anina ma Samuel Saul i riwei, “Ma genuana! Waguvarai Bada awariu i babani ana riwem.”
Saul i paridadanei, “Ma riweu!”
17 Samuel i paribelei, “Avena da u nota-melem da tam rava labalababa, tam marina mai Israel ai rauetaravena. Bada i tereriem da mai Israel ai gulau.
18 Riwa bagibagina i riwem ma i paritawanem da taniḡa potapotai mai Amalek uta viḡaviei da anatapui uta pupuna-pai.
19 Aiwai aubaina Bada eḡa uta voteletelei? I riwem da eḡa purapura i ʼrairaḡe-tawanei ona tami, wate tam vipurapura u ḡoei ma u vai-labalababai da u nuanei, wei lamna kaua apoapoe Bada au matana.”
20 Saul i paribelei, “Tau, Bada a voteletelei! I egariu da ana nae, da mai Amalek ana pupuni ma ai gulau Agag a neiai.
21 Wate au sorodia sipu ma bulumakau aiaii eḡa ita viraḡeni wate i neiai weka au Gilgal da ita apui pulo Bada am God awarina.”
22 Anina ma Samuel i riwa,
“Bada metauna e vinuaiaiei?
Votelatela bo pulo ma ḡamoḡamo apuapunana.
Votelatela i ai-telara, eḡa me pulo apuapunana;
Ma rautaniḡana i ai-telara, eḡa me sipu monamonana.
23 Pariviravira Bada awarina lamna me parauma
ma mae-ḡaeḡae lamna me god ḡelaui e viviborumei
Ma tam Bada riwana u geduaiei;
lamna aubaina Bada am vigulau i geduaiei,
Tam am vigulau i vai-tawanei.”
27 Ma Samuel i mae-tavirei da ita nae ma Saul i ḡoei da ita viḡaei ma ana kwama adana i vojijini ma i sikai.
28 Samuel i riwa, “Me au ḡara u sikasikai nanare amadodo Bada am vibada mai Israel awarii i vai-tawanei ma rava ḡelauna aiaina eḡa me tam i verei.
29 Israel ai God vinualaulaunana eḡa morumoruna bo nuanuana ita viravirai. Tauna eḡa rava da nuanuana ita viravirai.”
34 Ma Samuel i nae au Ramah ma Saul i nae me ana au numa au Gibeah.
35 Samuel eḡa Saul ita inana-melei da i ʼraḡe wate Saul i vinuabolana-maelei. Ma Bada nuanuana i bola-kauei da Saul i terei mai Israel ai gulau.