8
Mai Israel Gulau i vibaḡei
1-2 Samuel natunatuna ruaḡa, natuevou wavana Joel ma umauna Abijah. Maranai Samuel i magura ma natunatuna i vinei taurauetara au Israel ma i terei da au Beersheba i nola.
3 Wate taui eḡa amai ana kaua ita vaia ma ai nuavaina mane ma lamna aubaina manelei i gwalai ma rauetara i vibarai.
4 Ma lamna aubaina Israel babadai i riei Samuel awarina au Ramah.
5 Ma i riwei, “Ma rautaniḡana bada! Tam u magura ma natunatum eḡa am kaua ita ḡovaivaitei. Ma lamna aubaina tauai a ḡoei da gulau ma verelai da ina raveniai, me dobu ḡelaui ravai e kaukauei nanare.”
6 Wate maranai wenanare i riwa Samuel eḡa ita vinuaiai dadana, ma i raupari Bada awarina.
7 Bada i paribelei i pa, “Aiwai anatapuna ravai e ririwem ma kauei, taui eḡa tam ita geduaiem wate Tau ai gulau i geduaieu.
8 Maranai Egyptei a teretere-opunei da wei paratana, taui marana patapatana i mae-puputeu ma god ḡelaui i raraudunelei; marina nanare tam awarim e kaukauei.
9 Ai ḡoana ma verei wate riwa bagibaginei ma riwei menanare gulau ina kauanei taui awari.”
10 Samuel Bada ana babani anatapuna taui gulau i vivibaḡei i riwei
11 i pa, “Maranai gulau ina vibademi lamna awarimi wenanare ina kauei. Tauna natunatumi ina tama-naiei sorodia da ana chariot ma ana horse ina gerui ma ḡelaui ana chariot au naona ina ruba.
12 Ḡelaui sorodia 1,000 ma ḡelaui 50 ina vibadei. Ḡelaui ana wapu ina ipiei ma ana lam ina tuarui. Ḡelaui ḡavia apiai iramei ma chariot iramai ina kaukauei.
13 Gulau, natunatumi guguinii ina egari da ana monamona ḡabuḡabui ina kaukauei ma ḡelaui ana palawa ina apuapui ma ana taulauvoa.
14 Am wapu ma grape wapui ma nanare olive wapui aiaii avavai ina vaia da ana gabemani babadai ina verei.
15 Ma maranai ami witi ma grape ma olive o tuarui ma ḡuta 10 ona terei ma tauna ḡuta tagogi ina vaia ma ana gabemani babadai ina ḡutei.
16 Ami laraga nelarai ma guguini ma am bulumakau ma donkey vinevinei ina vaia tauna aubaina.
17 Ma ami sipu ma gote ḡuta 10 o terei ma tauna ḡuta tagogi ina vaia tauna aubaina, ma taumi ina vainimi ana taunola.
18 Maranai wei kauai i tupua ma ona tou guratana Bada awarina da gulau taumi o tereterei awarimi ina vaitawanei, wate Bada eḡa ina voaguimi.”
19 Wate rava Samuel ana babani bagibagina eḡa ita rautaniḡanei. Taui i riwa, “Tauai anatapuiai a ḡoei da gulau ina vibadelai,
20 da tauai me dobu ḡelaui ravai nanare ma ai gulau ina raveniai ma ana opu viḡavia aubaina.”
21 Anina ma Samuel Bada i riwei aiwai ravai i ririweia
22 ma Bada i paribelei i pa, “Ai ḡoana ma kauei, gulau ma verei.”
Ma Samuel ravai i paritawanei ai au numa.