12
Epetane Yominiyo Peku Lawetekomo
1 Anu oya-lawe Epetane Yominiyo peku lawetekomo wene takadene ukuno, yakamene.
2 Papete kiwi pa yatene ali-kitame Yesunomo wete yakoa moameneyake kini yoname mitikoa latikoinakeya-kitike padeya mea lodo yoai tomotoa Setanuyo lia aua pokala taneya.
3 Nitaneyake opi eya wane wene takakene uku. Epetane Yomini awinome wene takako ago odenemeka Yesu einagopa Akolaliyo wakene ago wa ikilepa toamoko. Ni Epetane Yomini awinome wene takakagome odene Yesu einagopa one Ali Muno wa amele toko.
4 Yesunole ele kule takateko pekupa odene ago Epetane Yominiyo-kama lawetekala toko.
5 Ele kule toateko peku noa teketepa odene ago Ali Munagonole-kama takakala toko.
6 Ele kule tikilepa odene ago Akolaline tele patu-kama kautakoa kakete tokala toko.
7 Epetane Yomini toto peyake tutu tutu wa awinome mekome peku lawetekilepa tone tone auapenali yomotoa tokome ni toko.
8 Nitoa panago-kiti wene muno meaneya mekome oateko peku lawetoa wa panago emo kumo pine to̱a oateko peku lawetoa toko. Enilepa odene ago Epetane Yominiyo-kama toko.
9 Ni panago-kiti Yesuke wedoa wene tugoa meateko peku lawetoa wa panago-kiti yene tane ali atoa latekateko peku lawetoa toko. Enilepa odene ago Epetane Yominiyo-kama toko.
10 Ni panago-kiti ele kule tubele toateko peku lawetoa wa panago-kiti Akolaline agale to̱awea akateko peku lawetoa toko. Ni one peku lawetekolo panagome-kiti eya wa wene toa toko. Ete-kitame ikimo yatekomepa imopa Epetane Yominiyo aka wa akene toa akedeko, imopa Epetane Yominiyo aka wa akene toa mena wa wene toa takoa eneko. Ni Epetane Yominiyopa panago-kiti agopa tane agaleke emo kumo oateko peku lawetoa wa panago-kiti enika enimo pine to̱a oateko peku lawetoa toko.
11 Ele kule toatiki peku lawetekilepa odene ago Epetane Yominiyo-kama toko. Nipa one wene litia tokome kini toatiki peku lawetekilepa odene odene wa takoa moa lawetekala toko.
Kawa Yono Eya Koukalogoapa Ali Wa Okomo
12 Anu oya neke kawa yono tobou tigini eya tutu tutu wa kawake odeneya koukalogakoya. Eina toa toto peyapa odene ago Keraisuno tigini tetepo taneya meko.
13 Nipa Yu yene pa yene kueme topo toa moa egetane yene ta pine yene toto peyake odene ago Epetane Yomini tutu tutu wa awikolokamotoa ue motokaneya. Ue eni motokakilepa kabe koukoa odene ago Keraisu-pala lipukoa taneya. Nitoapa ue epetaneya nomoai toatekota yameou toa one peku namene wa Akolaliyo one Epetane Yomini toto metaneya.
14 Tone tiginipa odene tiginike yono kawa enika eni wane kainya tutu tutu wa kako.
15 Nipa neke kawame-kiti nepala okome onepa yono menano, tigini-pala lipukoya wane mena wado okalepa pinago neke kawapa paya wane tetepo takoa waoo-pe.
16 Neke kapidime-kiti nepala okome onepa lene menano, tigini-pala lipukoya wane mena wado okalepa pinago neke kapidipa paya wane tetepo takoa waoo-pe.
17 Anu oya ne-kiti kapidi eya kawameneya lene-kama kaatapeneya meadekalepa pademo okoimo edoa yakade-pe. Nika neke timini eya kawameneya kapidi-kama kaatapeneya meadekalepa padeya ka̱lono tokoya edoa yakade-pe.
18 Akolaliyo one wene litia tokome lene kapidi timini kabunu yono kawa eya koukalogoa ali latianeya.
19 Nitameneya lenedo odene latikomepa nipa ipa ali latiku wa amele toameneya.
20 Neke lene kapidi yono kawa enika eni wane kainya mati kakoyake nepa odene ali wini kako.
21 Lenemedo yono-pala agaleme okomepa neke toatekole pade piamoko wa paya tetepo takoa wawamele toamoko. Ni lene timinimedo kawa-pala agaleme okomepa neke toatekole pade piamoko wa paya tetepo takoa wawamele toamokolo uku.
22 Eya waneka uku. Tone taba tokoya-kitido toamokalepa pa tiobali atoa meoo.
23 Ni tone paya tetepo takakoya-kitipa mama motekete wedoa kalako. Nipa leneme enamatekoya-kiti padame enekaya kekoa mamina moa kawa paigako.
24 Nitikoyake tone leneme enatekoya-kitipa koniyoya tokome maminame kaukoya mena. Enika eni peya latiane ago Akolaliyo yono kawa lene timini eya kibutukoa ali latikilepa tone paya tetepo takakoya-kiti mama motekete kalamotoa tokome taneya.
25 Nitikome enika eni peya paya tetepo takakoya-kitika koniyoya-kitika ete oto wa auapenali yomotoa tokome kibutukoa ali latianeya.
26 Nitaneyano, yonome-kiti tete motokomepa eteya-kitameka tete odeneka moa kako. Wa panagome pade wanedo takoa kei pikolopa eteya-kitika odeneka wedia kako.
27 Eina toa Akolaliyo kiwi koukalogakilepa odene ago Keraisuno yono kawa tigini eya tetepo takoa toko. Nipa onekele tatite toa takamotoa tokome toko.
28 Akolali nitiko agome tone Yesunole takatekoole tutu tutu wa tatimo tatimo taneya. Nipa namolo takoa Aposelo ali-kiti moa kakoa ni taku takoa one agale to̱awea akatekoi yene moa kakoa ni tebolo takoa onekemo olaukatekoi yene moa kakoa taneya. Ni liti padele padele tubele toatekoi yene moa kakaneya. Nititikoa eya kuya yene tane ali atoa latekatekoi yene ni ali atoa auapeatekoi yene ni one ali atoa talo toatekoi yene ni agopa tane agaleke emo kumo oatekoi yene moa kakakala taneya.
29 Eni peyapa Aposelo ali-kiti mena. Peyame Akolaline agale to̱awea akakiya mena. Peyame Akolalinemo olaukakiya mena. Peyame padele padele tubele tamele tokoya mena.
30 Peyame yene tane ali atoa latekamele tokoya mena. Peyame agopa tane agaleke amele tokoya mena. Peyame eni agopa tane agaleke akene toa pine i i wa to̱awea amele tokoya mena.
31 Padameka enika enile-kama tamele toamokoyake Akolaliyo tobou kakoa laweteko peku noada wa eni toatikileke wene piitikaneya meamene.
Eteya totono peya moa patukako totono opi i yametekuno, yakamene.