109
Kau aaknga Devitda matakut, miti kap.
1 Anutu, nata gatane umanda ayatangenakgat.
Gata kuma ma yuwim.
2 Dasingge, wai aminu kem yakaing aminda nae atsapdukaing.
Sapduke nae iwana dakngake sapdut wam nanikaing.
3 Nae musiptok natake wamu wai siknga aknga moo yakaing.
Wamu wa yakainggane yapiina wena.
4 Nata waaminde take natake gatayamiakge tumuk wam yanggat.
Siwan ngana nae take dua nataaing.
5 Nata waaminde takeaknga tasiyama ngana yake waiaknga nae tasikaing.
Nata waaminde take siknga natayamukum. Siwan ngana waaminda nae take dua nataaing.
6 Unzingge gata wai aminu tapatu katewi ita iwanatane wamu wam yot gwene usanziyok.
Siwan inane iwana tapatuta wam yawikge takekuwik.
7 Sike wam yot gwene wam natapik kapata aminu waapa gutongana kaya ngang natake waapa initewan kaautde kuwik.
Sike waapata tumuk wam yanggau waiaknga siwikge nataat.
8 Siwan nata nataau tupan aminu waapa zeetgaman kupikge nataat.
Kupan aminu tapatuta ie tangge tapikge nataat.
9 Siwan aminu waapa akupan waaknga nana wena toitoit dakngawa
mingata apna wena kombakombat dakngawikge nataat.
10 Siwan waatdakana yotna bumi siwan datdai siknga yutningge nataat.
Siwan aminda yanikwasiwa yotna wai wa gwenu yuaingu teke kuning.
11 Sike aminu waapa aminu tapatutane sanga kundu moo apba pakut. Pakutna kakengu aminu waaminde sangana moo imukut tapata apu kepnaat sangaapanaat kuupbam papikge nataat.
Siwan aminu you gapmandune nana ita puya tasike sangabamu usike pekuu apu akaipakuningge nataat.
12 Aminu tapatuta waapae musip kwikwiu dua natangamikge nataat.
Itane waatdakana toitoit dakngakingge aminu tapatuta butaya natayamuningge dua nataat.
13 Nata waapatane waaknga asiknga kumningge nataat.
Kupan aminu masan aatningga waapatane umanae dua natapning.
14 Buyambam tapata waiaknga itane bapunata tupa tasikingge natayuwikge nataat.
Siwan ita mingatane waiakngana ma sandekngaman.
15 Buyambam tapata waakwakgane waiaknganae asinggan natayamik.
Natayamuke tasiwan aminda itane dongae gatukande botaningge nataat.
16 Dasingge, aminu waapata notnaapae musip kwikwiu dua natayamukut. Wena.
Ita aminu sangana wena gatu sangaapae dapmakaing amin gatu meya pakaing aminde ngangu iwana dakngakut.
Dakngake atzipan kumbing.
17 Ita tupa wamu waiaknga aminu kunduta meya paningge yakut.
Siwan ngana ina meya papikge nataat.
Sike ita Anutu inikwaiwan aminu kundu take gatayamikge dua natapbut.
Unzingge, aminu waapa Anututane kwikwiknga aknga dua siknga papikge nataat.
18 Tapdukbamu ita wamu yanggau aminu kunduta meya paningge yanggak.
Siwan wamu waaknga tauknga pasinggak binga singgak.
Siwan wamu waaknga inane gupna apaatang yanggata binga pukukut. Pukuke itane kwatai atang kaana akngata binga kukut.
19 Siwan wamu inane waakngata taukga usikwatanggak binga siwikge nataat.
Siwan musipna simbu akngata wamanggak binga siwikge nataat.
20 Unzingge Buyambam tapata aminu nae temapa nanikaingge meya yamikge nataat.
Dasingge, wamu wai siknga waaknga nae nanikaing.
21 Siwan Anutu, Buyambam tapana, gata na gatangamiakge nataat. Unzing gika gwa yawi kekekakut saak.
Gatane umanda takeaknga siwan gata nae butaya asinggan nataayak.
Unzingge gata na asiknga tapso.
22 Dasingge, na sangana wena siknga yuke moo siknga yuat.
Moo yuke natapa wai siknga singgak.
23 Na bangee gunzitda apukunangge siwawan weenata kunggak binga kunangge singgat.
Na unzing gwakgwau got takngata apu puyatakunggak binga.
24 Sike nanam nanangge nina ayandakngawa muna kekekngana wena singgak.
Na gupmaapa apatdewan kwatana gatukande atuyukaing.
25 Unzing siwa kake aminbamda nae atemapa nanikaing.
Nanike waaminda gwapaknga makaiyuuk atnanimikaing.
26 Anutu, Buyambam tapana, gata nae butaya asinggan natangamunggayak.
Natake gatangamuke gata na gatuka tapso.
27 Sike gata na take gatangaminu natane iwanata atnatdetningge yeuyamuyo.
Yeuyami Anutu akgatangamunggak kapanin ngang natapning.
28 Waaminda “Anututa aminu waapa atasiwan maiyok,” ngangu apba yaning. Yawan ngana gata nae takekan tasiya.
Gata aminu nae wai wa tasikaingu ayaipakepi maakanong.
Siwan na gikane puya aminda, musip gwaang natapit.
29 Sike natane iwanata nae atemapa yakaingge maaknga buyambam paningge nataat. Maaknga waakngata aminu gatukande usikwatapik.
Usikwatapan aminbamda maaknga waaknga natapningu aanggaman take kaning.
30 Siwan ngana nata asainggamatake Buyambamtapa gaak wam inimbakngawit.
Sike aminbamu unekan yuke mun puke ininangge tasiwawa nakaya itane umana ayatangenawit.
31 Dasingge, ita sangana wena waamin gatayamuke kakuya pasinggak.
Kakuya pasiwan aminda wam yot gwene yaningge dua yanipakoke akumningge wamu dua yaning.