116
1 Siakande siknga Buyambamtapa nata yanggat taknga atnatangamukut. Unzing tasinggakge nata ie take siknga nataat.
Siakan siknga, nata tumuk wam yake ita butaya natangamikge iniwa ita atnatangamukut.
2 Ngan, natane tumuk wamu kuupbam ininggau atnatangamunggak.
Unzingge nata kayuk yuwit komune asinggan ininggamatawit.
3 Sike tupa kungwak kakngata napda binga wamanapmanggut.
Wamanapmamban natdetdetna tewa aminu gwa kumbingga yuaing komde kukut.
Kuwan wa natapbum takngata tasiwan na kumzang siknga gwauke nangaakan natapbum.
4 Unzingge nata Buyambam tapae anzing inikum,
“Buyambam tapa, nata gae yanggawanggatde gata na gatuka atapso. Na kupsat,” ngang inikum.
5 Buyambam tapata ninde musip kwikwik natake ninde take pasinggak.
Anutuninu ninde butaya natanimunggak.
6 Buyambam tapata aminu kundu kekekake yutnanga dua aminu ita akgatayamunggak.
Ina unzakan, tupa nata upeeke yuwawa na ita gatuna takut.
7 Ge apmanu nata musipma kwikwiknga natake yuwatakawikge nataat.
Dasingge? Buyambam tapata na take siknga nanduyuak.
8 Dasingge? Buyambam tapa,
gata na gatuka tapi nata dua kumbum.
Ngan, gata natane kai yanggana pasiwi kuwa
gata na nanduyuwi nata dua pimakum.
9 Unzingge nata aminu kayuk yuaingkat gatake sukunim.
Siwan na Buyambam tapae kaine sukuwitde nanduyak.
10 Siwan nata banip sike anzing yakum, “Meya buyambam siknga akngata na usikwatapmanggak.”
Unzing yakum ngana nata Anutue banip sikum.
11 Na usikwatapan akgwauke nata gatuna anzing yakum,
Aminu kuupbamda kem wam asinggan yakaing.
12 Siwan Buyambam tapata nae take siknga tasinggak.
Siwan ngana sanga nata yake ie mina binga imit?
13 Anututa na gwa takut takngae take siknga natake sanga waakngae yatangenawit.
Buyambam tapata na gwa takutde gaak wam iniwit.
14 Sike tapduu itane aminabamda unekan pakapu yutning komune
nata yawa kekekakut taknga atasining.
15 Siwan Anututane aminu tapatu akupan kakengu ita sanga mooi ngangu dua nataak.
Aho. Ita inane aminde butaya siknga natayamunggak.
16 Buyambam tapa, siakande siknga na gatane puya aminda dakngake puya gatane akngaka apasinggat.
Unzing tupa mingata pasikut binga.
Gata nau na wambingu waikngami take yuat.
17 Siwan nata gae musip gwaang natanggamunggat taknga ofana binga gamunggat.
Gamuke nata gae tumuk wam ganiwit.
18 Siwan nata wamu tupa gae yawa kekekakut taknga
nata apmanu gatane amindabamde kaine sanga waaknga atasiwit.
19 Ngan, Anututane yotbam gwekatang yuke sanga waaknga atasiwit,
you Jerusalem yuak gwekatangun.
Siakan. Buyambam tapatane umana yatangenatnim.