34
Ambimelekga inikwasiwan kukenga Devida kau aaknga matakut.
1 Siwan nata Anutue asinggan inimbakngawit.
Asinggan nata itane umana yatangenawit.
2 Nata Anututa gatangamukutde ie apbakngawit.
Sike aminu meya pakaingga wamu nata apbakngake yawit takngae natake musip gwaang siknga natapnong.
3 Ninda Anututane umana buyambam takngae yakapna.
Ninda itane umana yatangenatna.
4 Nata tumuk wamu Buyambamtapa iniwa ita akgatangamuke tumuk wama atnatapbut.
Ita gwaut taknga nata nataau kuupbam asandekngamukut. Unzingge nata musip kwikwik natake yuat.
5 Aminu kuupbam meyana kaya siwan ngana waaminda Buyambam tapae banip sike apbakngakaing.
Unzingge waamindane banip sikaing kakngana wai dua siwik.
6 Aminu sangana wena apaapa Buyambam tapae tumuk wam iniwa
ita natake meya wa kaking kaknga aknga kuupbam sandeyamukut.
7 Angela Buyambam tapatane tapata aminu Buyambam tapae gepbiatang yuaing aminde inengan yuak.
Yuke ita gatayamuwawan meya takngatuta dua pasiwan maining.
8 Buyambam tapata ninde take siknga tasinggak. Ginda tasiwa siwan kake Buyambam tapae take siknga natapning.
Siwan aminu tapatuta Buyambam tapae gepbiaatang koke kusopuke take yuwik.
9 Ginu aminu Buyambam tapatane, ginu kuupbam ie akgwauke yutnong.
Dasingge? Aminu Buyambam tapae akgwauke ie gepbiatang yuaing aminu sanga tapatue dua dapmakaing.
10 Sike kaap zongu laion gwengwenu kaapnae yawamba maiwanu tomnata yuke atuyukaning.
Siwan ngana waaminda Buyambam tapae tawakaingu, ita sanga take akngae dua dapmakaing.
11 Waatdakana, ginda nae siknga apuke maak gwaang pake wamu nata yawiu natapnong.
Apa nata ginu danindamumba Anutue akgwauke itane gepbiatang asinggan koyutnong.
12 Siwan gata kayuk yutnanga takngaka take siwikge nataayak?
Siwan gata kayuu mamaya siknga yuya. Yuke gatu gata take yuke apbakngnaya?
13 Sike gata unzing yutnangge natakengu, ayok. Gata wamu waiaknga dua yawim.
Siwan gatuka kem wamu dua yawim.
14 Gata waiaknga masa imuke noman takngakan tawamso.
Sike aminu kunduat musipza gwendukan teke noman takngae akekekake tawamso.
15 Buyambam tapata aminu noman yuaingu
ita akayuke tumuk wamnae maak panggak.
16 Sike wai aminde Buyambam tapata asiknga bitanggak.
Apbitake ita atzipan kupa aminda waaminde apbotaning.
17 Siwan aminu noman yuaingga Buyambam tapae tumuk wam iniwanu ita atnataak.
Natake ita gatayaman waaminu meyata dua yapbikgak.
18 Anututa aminu musiaatang meya nataaing aminde inengan yuak.
Ngan, ita banip sikaing aminu meya papanu, ita akgatayamunggak.
19 Meya kwaapzangga amin nomande apba apning, ngana
Buyambam tapata gatayaman meya waakwakga pasiwan dua pimaning.
20 Siakan. Ita dua pimamban Buyambam tapata take siknga kayuak.
Kayuwawan waapatane kwatai tapatu dua puwik.
21 Sanga wai kunduta wai aminu atzipa kumning.
Siwan ngana Buyambam tapata amin nomande iwana dakngakaing aminu apasiwan maining.
22 Buyambam tapata puya aminakan papan kayuk yutning.
Siwan aminu kuupbamda ie gepbiatang koyuaingu dua ginikaning. Wena siknga.