9
Devitda butaya kau aaknga matakut
1 Anutu, natane musipmaatangu gae gaak wam ganinangge take siknga nataat.
Nata aminu kuupbam gata puya kekeknga aknga aknga pasikuyakge yaninangge nataat.
2 Nata gae natake nata kau apbakngananga aknga tainggat.
Anutu kopsa sikngaapa, nata umanda kopsa siknga akngae kau taike umanda yatangenawit.
3 Dasingge, natane iwanata ga ganduke waakwakga atdatakukaing.
Datakuke kaikane pimake waakwau kuupbam kungwakaing.
4 Gata wamu noman gan usanziwi waaminda kungwakaing.
Gata natane yuyuknga usanziwi wamu yawiu natane wamu noman gan siwik.
5 Ngan, gata katum aminde kaanga wam yanikuyak. Yanike gata wai aminu gwa pasiwi maiking.
Siakan, gata waamindane umana aknga gatukande dotdonguwi aminu tapatuta waamindane umana dua siknga natapik.
6 Gata iwanu gwa pasiwi maikingu ina unzing asinggan asinggan yutning.
Anutu, gata waamindane yotbam gapma gapma gwa pasiwi maikingge
aminu kuupbamda waaminde apbotake gatu natapnanga dua.
7 Siwan Buyambamtapa Kingu asinggan asinggan yuwik.
Yuke ita wam usanzitnangge natake gwa tandakngake yuak.
8 Ita aminu kuupbam noman siknga kayuak.
Ngan, inane noman takngane aminu yuaingu kuupbam yuyuknga saak usanziwik.
9 Buyambamtapa you kekeknga gwenduta binga yuak.
Aminu kundu iwanata meya yamukaingu, waaminu ie kuke iatang koke kusopuke take yutning.
10 Buyambam tapa, gata aminu gae apukaingu masa dua yamunggayak.
Unzingge aminu gatane yapiie atnataaing ganu gae gepbiatang koyutning.
11 Buyambam tapata King siknga Saion yotbam gapmane yuakge ginu kuupbamda ie kau taike umana aknga yatangenatnong.
Yatangenake dongu kuupbamde puya buyambamu ita pasikutde yanikapnong.
12 Buyambam tapa, aminu amin zipa kungwakaing aminde yake toknga yamunggak kapata atnatanggamatanggak.
Sike kwanamu ie sikainggengu maaknga dua umukusinggak. Dua umukusiwan aminu aminda toknga aknga yamukaing aminde yake toknga yamunggak.
13 Siwan Buyambam tapa, iwanata meya nae namukaingge kayo.
Na akupitde dapaknga gwa siwan ngana gata nae musip kwikwik natangamuke na tapi take yuwit.
14 Unzingge nata sanga kuupbam gata tasikuyakge yanitakuke gatane umanda yatangenawit.
Yatangenake nata Saion yotbam gapmane gwambok gwaune yuke gata na takuyakge apbakngake yanikapit.
15 Sike katum aminda kepdakaatang gapma nin panggaganuwikge kwaiking ngana waaminda ina pimaking.
Siakan. Waaminda yapapna nin panangge kaiwan dandakaking. Kaiwan dandakawan ngana yapapnata ina pakut.
16 Anututa inane yuyuknga waaminde tapduu wam yakaing komune yeuyamunggak.
Unzingge wai aminda aminu kundu pasiwan mainingge pasikaing ngana Anututa tasiwan sanga wanda tapan tekwamban ina pasiwan maikaing.
17 Wai aminu kuupbamda gwa kumbing aminda yuaing komune paku yutning.
Ngan, aminu Anutue masa imukaingu wa kuupbam waomunekan paku yutning.
18 Siwan ngana asingganu Anututa aminu sangaapana wenae dua botawik.
Ngan, aminu wa meyambam pake yuaingga Anutue banip siwan ita gatayamikge kayutning. Kayuwawan ita moo dua kapewan yutning.
19 Siwan Anutu, ga apso. Gata aminu dua kapewi gae yamandet tasining.
Gata katum aminu pasiwi wam yananga komune yuwawa gata waamindane yuyuknga usanziyo.
20 Buyambam tapa, gata pasiwi waaminu asiknga gwautnong.
Gata pasiwi aminu kuupbam anzing natapnong, “Ninu amindakan sanga moo binga yuamang.”