49
Nanga mel ningo ningo se nanip biya te me ira sanamanakko sinar den
(Korah ko kuriang alo nunga wur bo)
1 Kariimet suen la mu nedegawa gurugal
ale den ani balsam ewere ikialko.
2 Nina kariimet ninip ago ta, se kariimet ninip mena ta,
kariimet mel suen biya karogo, se ningimik mel mena ta,
den imi ninguru ikialko.
3 Aninga agiring te ikia sinar ko den balikko;
aninga angamang motam ningi den
ningo mu balik se ikia ningo ningarukko.
4 Ani den sinar bo angamin te taiso,
se aga gita te kola se, ko duap ninga manikko:
5 Ani anape ko tom memek aga irok mu ko ani nguanga se lagarikko?
Kari memek nunga kawel te aga laturmon, bare ani me ta nguangarikko.
6 Nuna nunga mel suen biya wore te ira sanamasan,
ale nunga manga bibiya wore te nunumi patawusan.
7 Bare ali kari bo ta, bo ko dora kumik dia taukko me terong;
agi nu kota numi manga te Kaem kote dia taukko me terong tala.
8 Mu awuk, kariimet bo ko dora diara mu ko koma kalel aromemek;
manga ta, anapeya ta te, wore me terong la.
9 Kari bo ikiok numi manga te diaruk ale me kua iwi namaruk,
marak pempem bagarukko i mauk wore ko, mu mena.
10 Ana ikisan, kariimet ikia sinar karogo ta wore kuesan tala;
se kariimet ikia sinar mena se ngualara mu koma suanta kuesan,
ale nunga manga se mel ningo ningo mu betesan se kariimet saki no maguwusan.
11 Mungkala mu nuna nunga ali bibiya karogo,
bare aitak mu nononga ali motam gotek
te aniwasan umutang nunga ali sor ko pempem anirukko.
12 Kariimet nunup biya mel suen biya
karogo ta, wore me marak baga lagasan;
nuna buruk kausik kua iwi namasan uwutatala, kua iwi namasan.
13 Aninga sinar den imi ikialko:
Kariimet nongota nunga ikia ningo masan ale te ira sanamasan,
se kariimet saki nunga ikia umu karo tui gilingisan,
14 mu nuna sipsip iwita,
se kuera mateng mu nunga bitua kari iwita
nunga bitarso, ale nongorak mutim ningi kapa naguso,
se nunga kawam digo mel ningo ningo betesan ale kua iwi namasan;
se kariimet ningo diram mu turomola nunga ira kalakumu nama taisan.
15 Bare Kaem ani kuera mutim ningi aga
sangaru tauk, se ani nu ilak pempem marak bagarikko.
16 Buta se, awiriya kumik manga mel suen biya,
se ko kawam ningi bala mel suen biya,
bare bo bo karogo am giwuruk se arik,
mu ni me ko gemang dagulokko.
17 Mu awuk, maingte nu kueruk mu mel bo giok ale karogo me namarukko;
noko mel ningo ningo mu giok ale karogo mutim ningi me kaparukko tala.
18 Tom nu marak baga se mu, nu ko melmasak mu ko amilmil bitakaso,
se kariimet balukasan nu kari yawara makasan.
19 Bare nu kuera ko sor, ko nuet nongotak te kapaman, mu te kaparukko,
ale sor nikim me arigokko.
20 Ikialko. Awiriya kumik mel suen biya
karogo, bare nu kumik ikia sinar ningo mena,
mu nu mel diwang bo iwita kua iwi namarukko.