85
Kaem bagara yawara nangarukko guranek
(Korah ko kuriang alo nunga wur bo)
1 O Yawe, nika gemang lila ka ali tuem;
Jacob ko kariimet akingtala bagara yawara nungarem.
2 Ni ka kariimet nunga memek siwurem,
ale nunga memek beteman mu ira kaluwu saperem.
3 Nika gemang magara to beta ko beterem,
ale gemang tama ko kaniwaram mu susuru gurugu tuem.
4 O Kaem, anananga Saonga Kari, nanga gi ale akingtala nanga nunguruko,
nika gemang ikup mu bitar se mena namarukko.
5 Mu ni butata ana nago ko gemang maga se lagarukko e?
Ale nika gemang magara mu me ta menarukko e?
6 Ni akingtala sokel iru nangaru se,
ana nika kariimet amilmilanak ale nip patawunakko.
7 O Yawe, nika kua ana nangara ko munan
wore wetang sapar ale nanga sangaru toko.
8 Ani adogowa gurugek ale Kaem Yawe nu anapeya baluk wore ikiekko;
mu nu ko kariimet nu diram la karo tusan mu gomang lila balu nungarso.
Bare akingtala me pelemon ale ikia
memek bitawaman mu me ta betemonko.
9 Nunguningta, awiriya noko nguangasan
mu nu nunga sangaru taukko sinar bagoso,
mu te noko kumik nikim nanga ali imi lilim la ira saparukko.
10 Se kariimet nunumi ko kua tui se
nunumi nongomang nunguning tua ko munan betemonko;
ningo diram la bagara ko munan se
bagara lila ko munan mu te bagamonko.
11 Numi gomang tua nunguning ko munan mu ali te barasukko;
se Kaem nu ningo diram la bagara ko
munan mu duruk uningi bitiruk se tai kaparukko.
12 Yawe mu anapeya ningo ningo mu
nangaruk, ale nanga ali welang tuok se
na inang duap duap ali imi te barasukko.
13 Se ningo diram la bagara ko munan mu
girok ale noko lage te aolak iluwokko mu nungok burangarukko.