18
Wonong biya Babylon dagulam ale magaram
1 Asele ani akingtala loagerem mu ani engel bo duruk wonong beteram tai kapawaram se arigem. Nu nup biya se sokel karogo. Se noko kumik nikim mu ali lilim la iramuram.
2 Nu sokel ago airam ale balam:
“Dagulam bo! Wonong biya Babylon dagulam ale magaram kueneram!
Nu aitak wit mairap duap duap nunga kuwimaram,
se inangnang memek se mel memek
karanga nama taigilingisan mu agotala te anisan.
3 Mu awuk, nu ali lilim ko sor duap duap mu noko saman katagot ko munan
yu waen iwita nungaram se naman ale nguala sapaman.
Ali imi lilim ko king alo ilak no gikasan.
Ale nu mel ningo ningo awote bagarukko ninguru ko kuakaso,
bore te se ali sor suen la ko diara guruga
kari alo mu ilak mel ninguru diakasan ale te manga biyala tokasan.”
Babylon memek taukkowo! Aninga kariimet, nina wonong sumu beteral ale aratalko!
4 Asele ani kuring bo tala duruk wonong te iwita balam se ikiem:
“Nina aninga kariimet alo, nina nu beteral ale aratalko!
Mu asele nina noko memek koma taukko mu ningi me bagaral,
ale ko ikup yaman giokko mu nina me gialko!
5 Mu awuk, noko munan memek mu duruk
tarigiram ale kalel biya nunguningkiri
se Kaem noko memek mu maingkala ari ikiam.
6 Bore te se noko munan memek saki alo
nongote bita lagaram mu uwutatala
kumik te bita se, bo bo karogo tala kumik te beteralko.
Nu ko munan memek mu waen bagun ago
iwita suanta agi langi kisukaso agi mu, ni ko koma ilagala langi tuiko.
7 Nu mel ningo ningo ninguru karogo baga se numi patawu lagaram,
uwutatala ikup yaman memek ningi ma niara tualko.
Nu ko gomang ningi iwita balso:
‘Ani ali lilim la ko imet dom, ani imet gerewa mena.
Se ani anape ko mo nia lagarikko?’ maso.
8 Bore te se, day suanta ningi ikup
memek duap duap nu ninguru ira bagurokkowo,
kuera mateng, niara ma, se karak tom.
Mu awuk, Kari Biya Kaem Sokel Garagar
mu diram la ko tutera mu nu kumik
te bitiruk se tama nu lilim la lakumokko.
Babylon dagulam ko niara ma
9 “Se ali lilim ko king alo nu ilak no gi se, bagara ningo mel ningo ningo ilak nunumi tui gurugu lagaman mu, nu tama kani malilaruk se ko bur arigimon ale ko mamon niamonko.
10 Nuna noko ikup yaman memek towoso mu arigimon ale nguangamon, ale awar biya sanamamon ale niara ma ningi balmon:
“ ‘O Babylon o! Wonong biya sokel ago yo!
Tom tukunangta hour suanta ningi ni am tairatela maga kuene namerem!’
11 “Se ali lilim ko mel diara guruga ko kari alo mu nu ko ko mamon niamonko. Mu awuk, awiriya bo aitak nononga melmasak iwita mu diaruk gurugokko mu mena:
12 gold, silver, manga mel gotektek balayam nikinang ago, se manga gotektek siraram palepalengam; se guang ningo ningo, sang purple, sang guaram, sang welak; se tam duap duap siring yawara; se mel duap duap elephant kuwas te nunga, se tam ko koma kalel biya mu te nunga, se brass, ain, se manga aora marble masan mu te kisira nunga;
13 se na te nunga burangara ko sinamon se karati mel, se sor siring yawara kaparukko ko tam kiri liliki, se myrrh se frankincense; se waen, se olive oil, se flour ningo, se wheat muguri; se bulmakau se sipsip; se horse ko karis ago; se ura dungan kariimet agotala nunga awukasan, kariimet nunga dia gimon ale aguwaya te nunga betemonko mu te nunga betemonko.
14 “Ni Babylon, ikiko! Mel ningo ningo ni
ago bagerko mu ka bita muruwuman!
Nika manga mel se mel duap duap ningo
ningo, ko nip kapa lagaram, mu mena saparam, udagi me giko!
15 “Diara guruga kari alo mel duap duap umu nu ilak dia gurugu gema lagaman mu, noko memek yaman towoso mu arigimon ale nguangamon, ale awar biya sanamamon ale niamon,
16 ale balmon:
“ ‘O wonong biya yo!
Ni guang ningo ningo purple se guaram nagukasam,
ale gold se, manga gotektek balayam ningo ningo,
se manga gotektek siraram palepalengam mu te nimi bala tuikasam.
17 Bare tom tukunangta hour suanta ningi,
ni ka mel ningo ningo duap duap
numi awote mu tom tukunang umu ningi la mena saparam!’
“Se dal ko yager iluwa ko kari suen la, se awiriya dal te namasan taisan, se dal ko ura kari, se awiriya dal te dia gurugu namasan taisan mu awar biya sanamamon
18 ale nu kaniso mu ko tama bur barasuk se arigimon ale balmon, ‘Agi wonong bo, wonong biya Babylon iwita karogo e?’ ma balmonko.
19 Ale kupkup bila nusupuling te warmon, ale mo nia se balmon:
“ ‘O wonong biya yo! Ni te awiriya suen la
nunga dal gagi te nama taiwasan mu
manga biya nunguningkiri nungurman ale terong la bagakasan!
Bare tom tukunangta hour suanta ningi,
ni memek umu am ka menawu saparam!’
20 “O kualala ko mel suen la ta, se kariimet
laili ta, se apostle alo ta se prophet alo ta, amilmilaralko!
Nu ninga bita maguwu lagaram wore ko koma, Kaem nu bita maguwuwoso!”
Babylon me ta namarukkowo, ikup memek imi arigokko nunguningkiri
21 Asele engel bo sokel ago mu manga aromemek ikup biya, wheat te ita iri batutumusan ko manga tawenangam mu iwita, mu patawuram ale gagi ningi sapa se mam:
“Daong kager ko munan ningi ni wonong
biya Babylon ka sapamon se dagul ale udagi eng am me baresko.
22 Bore te se, ka yagowom guruga kariimet
nunga harp nirung, se birak ituguma
nirung, se trumpet nirung, mu ka
wonong tuagu ningi udagi me ikimonkowo.
Kiwol ningo duap duap se ko kiwol kari
mu udagi nika ningi me nungarkamonko.
Nika ningi kaiya kamara ko naur arisira nirung udagi me ikimonkowo.
23 Nika ningi tirom lam kanira ale nikim kapara bo me anirukkowo.
Imet kari iru numi gia ko amilmil
nirung bo kaparuk se me ikimonkowo.
Nika diara guruga ko kari alo mu ali imi lilim ko kari bibiya bagakasan;
se ni ka mang sima ko munan te, ali imi
ko kariimet lage memek te nunga beterem.
24 Nika ningi prophet alo, se kariimet laili alo, se kariimet suen la
nunga moman se kueman mu nunga gue kaparam mu kiting te aniso.”