8
Yesu le ye timi aatotoorninkpel
1 Maah len pu na aayil le ye ke ti kpa utotoorninkpel wee aaboln. Uma le ye Yesu Kristo u ka Uwumbɔr u yeh mpɔɔn mɔmɔk na aabɔrjal aaŋangii wɔb paacham na.
2 U tun utotoorninkpel aatuln paacham aadiik ki ye kidibamɔŋ ki bi chain na ponn ni. Uwumbɔr le maa ki, naa ye binib.
3 Baah leer bitotoorninkpiib bimɔk na, bi lee bi ke bi tii Uwumbɔr ipiin, ki toor kitork tii u. Nima pu na, ni ŋan ke utotoorninkpel ngbaan mu li kpa tiwan ki tii Uwumbɔr.
4 Bitotoorninkpiib bi dulnyaa wee ni ki toor kitork tii Uwumbɔr, Juu yaab aakaal aah dii pu na la. Yesu yaa ba laa bi dulnyaa wee ni kan, waa ba ga li ye utotoor.
5 Bitotoorninkpiib ngbaan aatuln ye paacham aatuln aanaŋ la. Moses yaan mu nan bi kina la. Waah nan ban ke u ŋa libool tii Uwumbɔr na, Uwumbɔr nan bui u ke u li nyi ki ŋa tiwan mɔmɔk ke waah mɔk u laanaŋ, lijool paab pu na.
6 Tɔ, Uwumbɔr nan tii Yesu lituln li jer bitotoorninkpiib ngbaan aatuln na. Kina le tipuupɔln ti Uwumbɔr puu tii waanib Yesu pu na jer tipuukpokl na, ki mɔk ke u ga tii timi tiwan ni ŋan jer tipuukpokl ngbaan aawan na.
7 Uwumbɔr aah puu tipuur ti njan na yaa kaa ba lann nibaa kan, waa ba ga li ban ke u ki puu tipuur lelee.
8 Uwumbɔr nan kan ke waanib kpa taani, le ki bui ke,
“Lik, n‑yoonn choo, le m ga nan puu tipuupɔln
tii Israel yaab ni Juda yaab.
9 Tipuur ngbaan aan li bi ke tipuur ti m nan puu tii biyaajatiib,
buyoonn m nan chuu biŋaal ki daar nyan bi,
ki cheen bi nyan Ijipt aatiŋ ni na.
Baa nan joo tipuur ngbaan, nima le maa nan ki gar bi.
Min Uwumbɔr le len kina.
10 Maah ga puu tipuur ti tii Israel yaab
n‑yoonn mu choo na na le ye ke:
M ga di maakaal ŋa baalandak ni,
ki ŋmee mu bisui ponn ni.
M ga li ye Baawumbɔr, le bi li ye maanib.
11 Bi ponn ni ubaa aan ki bui uŋeen aatɔ ke, ‘Bee Uwumbɔr.’
Ubaa mu aan ki bui una aabo ke, ‘Bee Uwumbɔr.’
Ba pu? bi mɔmɔk ga bee mi,
biwaatiib ki ti saa bikpaam mɔmɔk ga bee mi.
12 M ga di cha pinn baatunwanbir, kaan ki teer baataani.”
13 Tɔ, Uwumbɔr aah len ke u ga puu tipuupɔln na, u ŋa njan yaan tipuukpokl la. Tiwan yaa ye tiwankpok kan, naan yunn, naan ki li bi.