3
Nsãn nawee- tããfua kayar
(Mat 3.1-12; Mar 1.1-8; Nsãn 1.19-28)
1 Dyɛ lii kãntrɛ fãngafa byɛ yĩŋfua Tyibɛre fãnga wãma- ke ba nɔ dyɛ- sẽnsye bua na, koo cãã kẽ fãngafua Pɔ̃syi Pilati u pye Yudɛ kãntraha kur byɛ yĩŋ na. Yɛrɔte u pye Galɛlɛ kui yahaseefua, u nampyesey Filipe pye Lityire kui yahaseefua ma suhu Trakũhũ kui ne. Lesãhã u -sẽ pye Labyile kui yahaseefua.
2 Yana tesẽ Kayifu ne, poo pe pye Yãhã yũndefa yĩŋfa.
Loo dyɛ Dyakaridya dya Nsãn tuu pye drawaha fla wo, ma Yãhã yɛ̃ kapãn luhu.
3 Loo na, u n yir ma Yurdane lafeŋ tũntũn kui tay n klaha, ma nii le gble nawee- ye ma yee: «-Ye le sya ye cã ye kapee- wãpyeŋ sẽ yɔ̃ ye, -ye ke miy yaha! -Tee pa, ta n ba ye tãã yi loho wo. Yãhã -sẽ ga ye kapee- laha kãã ye yĩŋ na.»
4 Faale Yãhã kaplãŋ tɔ̃rfua Yisa, tuu bii lii cãã yrũhũ ta Yãhã sabangbãŋ wo Nsãn wĩĩ na, loo ne le nii n pye loo yale wo. Loo ne nde:
«Naa waa yĩmbui ne le n yir
drawaha fla wo ma yee:
-Ye Yĩŋfua Yãhã wãpaŋ kãnde gbihi yaha ke kẽ,
-ye ke kãmbɛhɛ ta ke n sroŋ yɔ̃!
5 Teelii fla ma pye nfaha, ke fla ke yĩĩ.
Yãygbãy ma suhu te wãsyĩmbir ne,
te byɛ te traha kãã.
Kãmbɛhɛ nkãy ke kuãy klaha, ke byɛ ke sroŋ.
Kãmbɛhɛ nkãy ke pee, ke byɛ ke gbihi,
ke nii diidii.
6 Yãhã ke lii pye ma ga wo sya yaha,
kãntrahafa byɛ ga ba le yãã pe yĩnde ne.»
Nsãn lii tɔ̃r naa n yar nawee- na
7 Nabuar naa n gaha Nsãn ye wãtãã yĩmbui ne. U naa pe pye ma yee: «Nwoho terfa mii! Yoo ye yar ma yee tee ga waha wloho yi kãã te Yãhã kasãhã laam wo, tii te n pai?
8 -Ye naa kayũhũ pye mii katyiyũhũ dyaŋ ke piiyɔ̃m sa. Loo na, le ga cã tee yi kãã kapee- wãpyeŋ kãnde wo, ma kayũhũ wãpyeŋ kãnde gbe. Ye tee le ga ye laam wo, a ye ma wo faale wãdyaha Brama kur, loo nde wĩĩ na, Yãhã ga ta ye n wlohoyisaha yãã. Ye sẽ yãã, Yãhã ga waha ntẽmbar nde ta te n wã klaha nii naweeyɔ̃m, pe n ye draha gbe, pe nii Brama kur.
9 Ta n ye yar: Mbaapuai gbihi cai ta nii wa, ma ga katyir cããr te nnen fla na. Katyigi gii ma yee ke sẽ sa yɔ̃ ye, ke ga gbã cɛr le naa wo.»
10 Pe nabuar n u yey ma yee: «Wo yai wo naa n pye mii wo nii naweeyɔ̃m?»
11 Nsãn n pe yɛ̃ wãã sya ma yee: «Nayrɛ sĩĩ ma pye wii ye, u neŋ wãã waa kẽ, wii ruu wee kaa ne ye. Digi ma yãã mboo wii ye, ke la fããfa ne.»
12 Kufar wããfa mpãy n pa Nsãn fla na tããsaha wo, ma ba u yey ma yee: «Yĩŋfua, wii yai wo naa n pye mii?»
13 U n pe yɛ̃ wãã sya ma yee: «Yɛ̃ gii pe tɔ̃r yar ye na, ye ma syi ye kufar wale sya le n ta naa n tɛr koo yaha ye!»
14 Seraasyi mpãy n pa pe ya ndoŋ, ma ba u Nsãn yey loo nen ya ne ma yee: «Ah wii, wo yai wo naa n pye mii?» U n pe yɛ̃ wãã sya ma yee: «Ye ma syi ye naa wale sya fãnga na nawee- ye ye! Ye ma syi ye maha kawar fua naa n taha nawee- na ye naa war sya pe ye ye. Ye yĩŋfa pe ye dãã war mpãy ne, -ye naa n kuee poo ya ne!»
15 Nawee- mpãy pe pye ke fla na, ma naa u Yãhã Yĩndefua wãpaŋ yɛhɛ, pe naa le ga ma naa n yee, a laa na Nsãn kẽ u ne.
16 Loo na, Nsãn n pe byɛ pye ma yee: «Ndoo, n ye tãã n yi loho wo. Waa ter -sẽ ma tuu n pai, woo cɛr yaha ra kẽ mahamaha. Ta syi gɛ sẽ yai u ntãn sale wãfɛr ne u trɛ na ye. Woo ga ba naa ye tãã Yãhã Yrã Fãnga ne, tesẽ naa ne.
17 U ma mii nawee dyaŋ tuu ma sẽncrihi ne u koho wo. U ga sẽmuhu fua yi pua wo. Loo kur ye, u ga u pua le mploho wo, tuu naa le te sẽmuhu na, naa gii wãfege yãã wee ke na ye.»
18 Nsãn maha ba naa kai- busãã yar nawee- na, ma naa le Yãhã kapãyĩĩ tɔ̃r pe ye.
19 U n ba yãã Galɛlɛ kui yahaseefua Yɛrɔte tuu yir, ma u ya lɛfuasey cɔɔ Yɛrɔtyade tyĩn sya u ye ma u ta u cɔɔ, u n le kuãn u ne, ma suhu kai- nkãy byɛ ne tuu tee naa n pye.
20 U Yɛrɔte sẽ luhu u ye ye, u ga cã lii pye le taha kapee, ma ta pe n u Nsãn yigi le nwompihi wo.
Yesu u tẽn koho yigi
(Mat 1.1-17; 3.13-17; Mar 1.9-11)
21 Nawee- mpãy pe ba pa Nsãn fla na tããsaha wo, Yesu pye pe laam wo. Nsãn n Yesu tãã u ya ndoŋ. Loo kur ye, Yesu tuu naa n pãã Yãhã ne, yãhãyĩŋ n fe yãr,
22 Yãhã Yrã Fãnga n tege ba Yesu na. Le n le ya klaha mii kãnsyã waa ter dyaŋ. Yĩmbui laa ter n yir yãhãyĩŋ kuɛ ye ma yee: «Ta Dya kẽ ma ne, ma ntãŋ dye gboho ra tãy, ma ra laam yĩn yalebyɛ.»
23 Yesu tuu ba dyɛ- gbey sẽnsye syi kua, tuu see ba lii wãpyeŋ myaha ne, u n le wãpyeŋ koho yigi.
Nawee- ye Yesu pye Yosɛfe dya.
Yosɛfe -sẽ pye Yeli dya.
24 Yeli pye Matar dya,
Matar -sẽ pye Lewi dya,
Lewi -sẽ pye Melsyi dya,
Melsyi -sẽ pye Yanay dya,
Yanay -sẽ pye Yosɛfe dya,
25 Yosɛfe -sẽ pye Matetya dya,
Matetya -sẽ pye Amose dya,
Amose -sẽ pye Namuhu dya,
Namuhu -sẽ pye Yesele dya,
Yesele -sẽ pye Nagaa dya,
Nagaa -sẽ pye Mataha dya,
Mataha -sẽ pye Matetya dya,
26 Matetya -sẽ pye Semii dya,
Semii -sẽ pye Yosenge dya,
Yosenge -sẽ pye Yoda dya,
27 Yoda -sẽ pye Yɔnaa dya,
Yɔnaa -sẽ pye Yarsa dya,
Yarsa -sẽ pye Dyɛrbaha dya,
Dyɛrbaha -sẽ pye Syalatye dya,
Syalatye -sẽ pye Naari dya,
28 Naari -sẽ pye Marki dya,
Marki -sẽ pye Yaadii dya,
Yaadii -sẽ pye Kuasãhã dya,
Kuasãhã -sẽ pye Lemada dya,
Lemada -sẽ pye Yɛr dya,
29 Yɛr -sẽ pye Yosya dya,
Yosya -sẽ pye Yelidye dya,
Yelidye -sẽ pye Yɔɔri dya,
Yɔɔri -sẽ pye Matar dya,
Matar -sẽ pye Lewi dya,
Lewi -sẽ pye Syimɔ̃ dya,
30 Syimɔ̃ -sẽ pye Yuda dya,
Yuda -sẽ pye Yosɛfe dya,
Yosɛfe -sẽ pye Yɔnaha dya,
Yɔnaha -sẽ pye Yelaake dya,
Yelaake -sẽ pye Melaa dya,
31 Melaa -sẽ pye Menaa dya,
Menaa -sẽ pye Matataa dya,
Matataa -sẽ pye Natã dya,
Natã -sẽ pye Dawide dya,
Dawide -sẽ pye Yisay dya,
32 Yisay -sẽ pye Yobɛde dya,
Yobɛde -sẽ pye Buase dya,
Buase -sẽ pye Sala dya,
Sala -sẽ pye Naasũhũ dya,
Naasũhũ -sẽ pye Aminada dya,
33 Aminada -sẽ pye Adamen dya,
Adamen -sẽ pye Yarne dya,
Yarne -sẽ pye Yesrũhũ dya,
Yesrũhũ -sẽ pye Parase dya,
Parase -sẽ pye Yuda dya,
34 Yuda -sẽ pye Dyakuba dya,
Dyakuba -sẽ pye Yisyake dya,
Yisyake -sẽ pye Brama dya,
Brama -sẽ pye Tyera dya,
Tyera -sẽ pye Nasyɔɔ dya,
35 Nasyɔɔ -sẽ pye Seru dya,
Seru -sẽ pye Yarwuhu dya,
Yarwuhu -sẽ pye Pege dya,
Pege -sẽ pye Yebɛr dya,
Yebɛr -sẽ pye Sala dya,
Sala -sẽ pye Kanaa dya,
36 Kanaa -sẽ pye Yarpasye dya,
Yarpasye -sẽ pye Syam dya,
Syam -sẽ pye Nuwɛ dya,
Nuwɛ -sẽ pye Lemeke dya,
Lemeke -sẽ pye Matesyela dya,
37 Matesyela -sẽ pye Yɛnake dya,
Yɛnake -sẽ pye Yaare dya,
Yaare -sẽ pye Malɛlɛ dya,
Malɛlɛ -sẽ pye Kɛna dya,
Kɛna -sẽ pye Yenose dya,
38 Yenose -sẽ pye Sɛte dya,
Sɛte -sẽ pye Dama dya.
U Dama kadye -sẽ pye Yãhã dya.