4
Sadana ikai samâŋa pa Yesu
Malaka 1:12-13, Luka 4:1-13
1 Yesu ikai lââ-liliŋa lâ, ŋineŋga Koroani Sapâŋa ikai Yesu io lâ nia bilimu toŋge, ŋana koroani saka nenzi koipu ma ikai samâŋa papa.
2 Aku pa zo ŋinde Yesu indi kaika pa tamwata tu ma ika kâpwa tia, kala imo mine lee ikura kari tamâta rua (40) lâ, kala putole ipu pâta.
3 Ŋineŋga koroani saka nenzi koipu imâ pa Yesu, aku ipai tu, “Noko kutu Maro Kindeni natu, ande ara, kuporo panzi mira ŋai tu ma sipalele sipâŋga sitogo puroŋa mine.”
4 Andeta Yesu iporo taulo tu, “Maro Kindeni kawa ŋgua ikeno lâ pepa tini mine tu, ‘Kâpwa nâ ikura tu isukanzi tamâta ŋana simo vianzi kâ, ande tia; ŋgua rârâni ipâŋga lâ Maro Kindeni kawa ŋinde tona ma isukanzi tamâta’.”
5 Yesu iporo ŋgua mine lâ, ŋineŋga koroani saka nenzi koipu ikai Yesu ilâ Jerusalem lawea, aku io i kâki imandi Maro Kindeni ne luma sapâŋa mende kulu.
6 Aku ipai Yesu tu, “Noko kutu Maro Kindeni natu, ande ara, kusoŋga kundue pa tâno kulu. Ŋana tu Maro Kindeni kawa ŋgua ikeno lâ pepa tini mine tu,
‘I ma ionzi ne aŋelo tu sikatonano. Kinzi ma mbaunzi nâ sisuka noko kâki, kala mira toŋge ma ikura tu isowe noko kie, ande ma tia’.”
7 Andeta Yesu ipai tu, “Maro Kindeni kawa ŋgua ikeno lâ pepa tini mine tu, ‘Noko ma kuveta samâŋa toŋge pa noko ne Maro Ŋalae Kindeni ndimo’.”
8 Ŋineŋga koroani saka nenzi koipu ikai Yesu ikâki tuu ŋalae toŋge kulu, aku itula nia wa lawea ndoni tava nenzi siŋgâra arara papa.
9 Aku ipai Yesu tu, “Ambo noko ma kupare tuku ku kutundu kupanea naŋa, ande naŋa ma kelekele rârâni ŋine alano.”
10 Andeta Yesu itu lâ kawa tu, “Sadana, noko pwâwa kulâ! Maro Kindeni kawa ŋgua ikeno lâ pepa tini mine tu, ‘Noko ma kutundu kupanea noko ne Maro Ŋalae Kindeni, aku kuveta wurâta papa i simbo nâ’.”
11 Ŋineŋga koroani saka nenzi koipu nde ipile Yesu ilâ, aku kinzi aŋelo simâ ku sikatona Yesu.
Yesu iveta ne wurâta muŋga lâ Galilaya tâno
Malaka 1:14, Luka 4:14-15
12 Pa zo ŋinde, Yesu iloŋo ŋgua tu kinzi sio Yoane Lââ-Liliŋa Tamwata imo luma sakamao ilo. Mine kala itaulo ilâ pa Galilaya tâno kilo.
13 Ipile Nasarete lawea ku ilâ ipâŋga Kaperneam lawea, aku imo lawea ndaina. Kaperneam lawea ikeno Galilaya Lââ bwalika pwali. Nia ŋinde nde kinzi Sebulun ŋgu aŋga kinzi Naptali ŋgu nenzi tâno.
14 Mine kala Yesu iveta ikura ŋgua toŋge muŋga ŋgua-tulâŋa tamâta Aisaia iporo lâ. Aisaia muŋga ikai Maro Kindeni kawa ku iporo tu,
15 “Miki tamâta lâ Sebulun ŋgu aŋga lâ Naptali ŋgu, miki ŋinde kamo papa Galilaya Lââ bwalika, pa Jodan Lââ tini pinde, aku kamo Galilaya tâno kunzi tinikoa ŋgu, miki kaloŋo;
16 Kinzi tamâta uru simo kondoma ilo, ande kinzi ma simora sinâla ŋalae toŋge. Mao nâ, kinzi simo nia kondoma, itogo mateŋa nianzi mine. Andeta sinâla ŋinde ma isinalanzi.”
Yesu isarawanzi tamâta ŋapa tu sipono muli papa
Malaka 1:16-20, Luka 5:1-11, Yoane 1:35-42
17 Lâ zo ŋinde, Yesu imandi ŋana iveta ne wurâta ŋana itula ŋgua kâ. I uru itula ŋgua mine tu, “Miki kapalele ilomi kalomi, ŋana tu Maro Kindeni ne zo ŋana ikai maro panzi tamâta kâ nde imâ ipâŋga laiti lâ”.
18 Zo toŋge Yesu iyoka Galilaya Lââ bwalika pwali ilâ, aku mata ilâ imoranzi tai-tua rua, Saimon, i ŋa toŋge Petero, kuku i tai Andaria rua. Kinzi rua simo sitambira viâŋa lâ lââ bwalika ilo, ŋana tu rua uru sikai iŋa ŋana nenzi mbaliŋa kâ.
19 Aku Yesu ipainzi rua tu, “Miki rua kamâ kapono muli pa naŋa, aku ma apananami ŋana kakainzi tamâta kâ”.
20 Aku walele nâ kinzi rua sipile nenzi viâŋa ku soka i muli silâ.
21 Aku Yesu iyoka ilâ, ŋineŋga imoranzi tamâta rua, tai-tua rua; Yamesi, i Sebedi natu, aŋga i tai Yoane. Kinzi rua kala sisaŋona wâŋga kulu kuku tamanzi Sebedi, aku siveta nenzi viâŋa sondo. Aku Yesu isarawanzi rua,
22 aku walele nâ kinzi rua sipile tamanzi imo wâŋga kulu ku soka Yesu muli silâ.
Yesu itula ŋgua ku ivetanzi tamâta tininzi ara tava
23 Ŋineŋga Yesu iyoka ilâ ikura nia ndoni lâ Galilaya tâno. I uru ipanananzi tamâta lâ nenzi luma ŋana pasauŋa kâ ilo. Aku itula pâri ara ŋana Maro Kindeni ne mâsi ŋana ikai maro panzi tamâta kâ tava, aku ivetanzi pukoŋa tamâta rârâni tininzi ara, kinzi ŋinde muŋga simo tava pukoŋa kie-kie.
24 Aku Yesu parina nde ilâ isala nia ndoni papa Siria tâno kâ. Mine kala sikainzi tamâta rârâni ŋinde pukoŋa wa nâna kie-kie ikainzi lâ, ku simâ pa Yesu. Aku sikainzi tamâta ŋinde koroani saka sipakâe kunzi ŋinde tona, sitavanzi tamâta ŋinde uru patanzi wa tininzi ruru ŋalae wa tukanzi pââsââ wa; kinzi sikainzi tamâta ŋinde rârâni simâ pa Yesu. Aku Yesu ivetanzi tamâta ŋinde rârâni tininzi ara kilo.
25 Mine kala tamâta ŋgu ŋalae tina lâ Galilaya tâno, aŋga lâ Lawea Saŋao, aŋga lâ Jerusalem lawea, aŋga lâ Judia tâno, aŋga lâ Jodan Lââ tini pinde, kinzi ŋinde soka Yesu muli silâ.