15
ख्रीष्ट टुङ्नी ङोसु लावु कोर्ला
1 अच्युनुपतिवा, ङे ख्यिराङला ख्याप्टाक क्यावु लेन ल्यामु ति ख्यिराङला येलुङ सिरिन। ख्यिराङ ती सुङ ति सेमला लानी तेपा रम्बु च्युङ्नी देन वे।
2 ख्यिरा ङे ख्याप्टाक क्यावु लेन ल्यामुकी सुङला तेपा क्यासिन ख्यिराङ दिक्पा ने थर्किवी, यिने तेपा रम्बु क्यानी मादेसुङ सिसिन ख्यिरा क्यावु तेपा ति तेर्मेला डिवी।
3 ङला थोपुप तेरी सिनाङ खक्छ्येवु सुङ ति ङे ख्यिराङला ख्याप्टाक क्यावु यिन। ती सुङगी तेन्दोक ति कोन्छ्योककी सुङला सुङ्गुप दोके ख्रीष्ट दाक्पी दिक्पी थोक्ला टुङ्गुप यिन।
4 तमा खोकी फुङ्बु कल्दोक क्यासुङ, यिने कोन्छ्योककी सुङला सुङ्गुप दोके खो टुङ्सिमा येलुङ ङ्यिमा सुमला कोन्छ्योककी खोला ङोसु लाङ्सुङ।
5 तमा खो पत्रुसकी चाला छ्यार्सुङ। ती ज्युक्ला खोकी लोमा मिरा च्यिङ्ङीतिवी चाला छ्यार्सुङ।
6 तमा ती ज्युक्ला खो थेङ्मा च्यिकला राङ तेपा कितुप मी सयी ङ सिनाङ मङ्मुकी चाला छ्यार्सुङ। तिवी पर्ला ललाइ ति शिसुङ, यिने माङ्शोक ति तन्दा सेक साङ सेन्बु वे।
7 येलुङ ती ज्युक्ला खो याकूब ताङ खोकी लोमातिवा तेरीकी चाला साङ छ्यार्सुङ।
8 तमा तेरी सिनाङ ज्युक्ला खो ङे चाला साङ छ्यार्सुङ। ङ ति ल माछेनी क्येवु आङा दोके यिन।
9 ङ ति लोमा छ्येतिवी पर्ला छासे छ्युङा यिन। ङ ति लोमा छ्ये वुङ छ्योवु साङ मे, च्यिलासिसिन कोन्छ्योकला तेपा कितुप खोकी चर्चकी मीतिवाला ङे कशेन छेटाङ बिन्दुप यिन।
10 यिन्सिनाङ ङ तन्दा दुकै च्युङ्गुप ति कोन्छ्योककी कटिन नेसुर राङ च्युङ्गुप यिन। खोकी ङला नङ्गुप कटिन ति तेर्मेला मागल। ङे याङ यम्बा लोमा छ्येतिवा सिनाङ मङ टेमु क्यायिन। ती ति ङे राङ क्यावु मिन, यिने ङे मुला वोतुप कोन्छ्योककी कटिन नेमा क्यावु यिन।
11 तुक क्यानी ङे ख्याप्टाक क्यावु यिन्सिनाङ यम्बा लोमा छ्येतिवी ख्याप्टाक क्यावु यिन्सिनाङ ती सुङ ति ङ्यिरा ख्याप्टाक क्यावु यिन। तमा ती सुङ ति ख्यिरा तेपा क्यानी सेमला ज्याक्नी वे।
शेप ने ङोसु लङ्गुप कोर्ला
12 ख्रीष्ट टुङ्नी ङोसु लावु यिन सिनी ङ्यिरा ख्याप्टाक क्यासिनाङ ख्यिरा पर्ला मी ललाइकी चुक क्यानी “शेप ने सेन्बु लङ्गुप मेङ्गिवी।” सिनी सि थुप्किवी?
13 दोजो शेपतिवा सेन्बु मलाङ्गुप यिन्सिन काङ ख्रीष्ट साङ टुङ्नी ङोसु मालावु यिन रो?
14 दोजो ख्रीष्ट टुङ्नी ङोसु मालावु यिन्सिन, दाक्पी लेन ल्यामु ख्याप्टाक क्यावु सुङ ताङ ख्यिरा तेपा क्यावु ति तेर्मेला डिवी।
15 तमा ती सिनाङ मङ दाक्पु कोन्छ्योककी थोक्ला पङ्बु मेटेङ्बु तेरुप डिवी। च्यिलासिसिन कोन्छ्योककी ख्रीष्टला शेप ने ङोसु लाङ्सुङ सिनी दाक्पी पङ्बु बिन्दुप यिन। यिने वुतुङ के शेपतिवा सेन्बु मालङ्गुप यिन्सिन खोकी ख्रीष्टला टुङ्गुप ने ङोसु मोलोङ्गुप्जा।
16 दोजो शेपतिवा सेन्बु मालावु यिन्सियाङ कोन्छ्योककी ख्रीष्टला साङ ङोसु मालङ्गुप यिन्जा।
17 दोजो ख्रीष्ट टुङ्नी ङोसु मालावु यिन्सियाङ ख्यिरा तेपा क्यावु ति तेर्मे डिवी। तमा ख्यिराङ तरोङ साङ दिक्पी ओङला राङ वोतुप ति यिन्जा।
18 तुकै यिन्सिन ख्रीष्टला तेपा क्यानी गोमाला शेपतिवा साङ तेरी ना गलुप यिन्जा।
19 दोजो दाक्पी ख्रीष्टला रेवा क्यावु ति दी जम्बुलिङला देतुप पेला तिराङ यिन सिसिन दाक्पु ति तेरी मी यम्बातिवा सिनाङ मङ दुङलला ख्येलुप्जा।
20 यिन्सिनाङ वुतुङ के ख्रीष्ट टुङ्नी ङोसु लावु यिन, तमा खो शेपतिवी नाङ ने थल्माला सेन्बु लङ्गुप तप्की मी यम्बातिवाला साङ शेप ने सेन्बु लङ्गिवी सिरुप पङ्बु छ्या तेन्सुङ।
21 मी मिरा च्यिककी दिक्पाकी जोसालेन्सिन तेरी मीतिवा शि गोसुङ। तुक राङ क्यानी मी मिरा च्यिक शेप ने ङोसु लावु तप्की मीतिवा तेरी शेप ने सेन्बु लङ्गिवी।
22 तीकी तेन्दोक ति तेरी मीतिवा आदमकी गिपा यिन्दुप तप्की शि गोसुङ। तुक राङ क्यानी ख्रीष्टला तेपा क्यावु तप्की मीतिवा तेरी शेप ने सेन्बु लङ्गिवी।
23 यिने सेन्बु लङ्गुप पेला रिम्बा क्यानी सेन्बु लङ्गिवी। तेरी सिनाङ गोमाला ख्रीष्ट टुङ्गुप ने ङोसु लावु यिन। तमा खो फेवु तुजेला खोला तेपा कितुपतिवा तेरी शेप ने सेन्बु लङ्गिवी।
24 तमा जम्बुलिङ ना डोप तिङ्मी तुजे वुङ्गिवी, ती तुजेला ख्रीष्टकी तेरी डेकी ओङ्ज्येन ताङ जम्बुलिङकी ओङ्ज्येन ताङ ङारतिवा ना तङ्नी दी जम्बुलिङकी तेरी ओङ्ज्येनतिवा पपा कोन्छ्योकला चेक तेकिवी।
25 च्यिलासिसिन ख्रीष्टकी डतिवा तेरीला फम च्यिनी तिवाला ख्रीष्टकी शापकी वोक्ला मालेपा सेक कोन्छ्योककी दी जम्बुलिङला ग्येला क्या नङ्गिवी।
26 तेरी सिनाङ ज्युक्ला खोकी ना तोङ्गुप ड ति शेप यिन।
27 च्यिलासिसिन कोन्छ्योककी सुङला “तेरी जम्बुलिङ ति खोकी ओङला ज्याङ वे।” सिनी टि वे। “तेरी ओङ्ज्येन खोकी ओङला ज्याङ वे।” सिक्यावु ति कोन्छ्योक साङ खोकी ओङला राङ ख्येल्गिवी सिनी सिक्यावु ति मिन, यिने खोकी तेरी ओङ्ज्येन ति ख्रीष्टकी ओङला ज्याङ वे सिनी सिक्यावु यिन।
28 तेरी ओङ्ज्येनतिवा ख्रीष्टकी ओङला ख्येल्सिमा तिराङ ख्रीष्ट खुरुङ ति खोला तेरी ओङ्ज्येन नङ्गुप पपा कोन्छ्योककी ओङला देकिवी। तुक क्यानी कोन्छ्योक ति जम्बुलिङ तेरीला ग्येला क्या नङ्गुप चोछ्येवु कोन्छ्योक यिन।
29 दोजो शेपतिवा सेन्बु मलङ्गुप यिन्सिन शेपतिवी थोक्ला बप्तिस्मा लावु ति काङ तेन्दोक च्युङ्सुङ रो? दोजो वुतुङ के शेपतिवा सेन्बु मलङ्गुप यिन्सिन च्यिला तिवी थोक्ला बप्तिस्मा बिन्दुप यिन?
30 तमा ङ्यिराङ ति च्यिला ङ्यी ताङ नुप्ज्या दुक्पा खुर्किवी रो?
31 अच्युनुपतिवा, ख्यिरा येशू ख्रीष्टला तेपा क्यावु तप्की ङ वुतुङ के तेके क्यानी सिरिन, ङ ङ्यिमी टेङ शेयिन।
32 दोजो ङे एफिससला नाठुङ वुङगी सेम्ज्येन दोके वोतुप मीतिवी मुला थमु ग्यप्सिनाङ ङला काङ ख्येप्साङ वे रो? दोजो शेपतिवा सेन्बु मलाङ्गुप यिन्सियाङ “दाक्पु साप ताङ थुङ्गुप कितुप्जा, च्यिलासिसिन दाक्पु याङ सला शिवी।” सिनी सि थुप्किवी।
33 तुका जिनोक जोप मीतिवी ताम्ङेला ख्यिराङ माख्येल। “दाल्जा मेलोवातिवी दला शुसिन ख्यिरा किताङ नालु साङ मेलोवा डितो।”
34 च्याङ्से देता! तफेन्ला ख्यिराङ दिक्पा कितुप क्युर। च्यिलासिसिन मिरा चोला याङ कोन्छ्योककी कोर्ला छ्या राङ मे। दी ताम्ङे ति ङे ख्यिराङला ङोछा लोङ्गुपला सिक्यावु यिन।
शेप ने सेन्बु लावु जुकी कोर्ला
35 यिने मी ललाइकी “शेपतिवा चुक क्यानी सेन्बु लङ्गिवी? तिवी जु ति चुकै च्युङ्गिवी?” सिनी टि साङ थुप्किवी।
36 ओ हाक्मोकोवुतिवा, काङ ख्यिरा सेन तप्सिमा ती सेन ति माशिवा क्यानी दोङ्बु क्येवी रो?
37 दोजो ख्यिरा ट यिन्सिनाङ याङ्ना यम्बा काङ यिन्सिनाङ देपुप पेला सेन देप्किवी, यिने चुशिङ राङ मेदेपी।
38 तमा कोन्छ्योककी ख्यिरा तपुप सेन तीला खोरे नोवाला वोतुप दोके जो नङ्गिवी। तमा खोकी नम्बा तेरीकी सेनतिवाला दाक दाक्पुला पेवु चुशिङ जो नङ्गिवी।
39 ती चुशिङतिवा दोके क्यानी तेरीकी जु ति च्यिक्पा राङ मेवी। मी जु ति कुतुक गिवी, सेम्ज्येनकी जु ति कुतुक गिवी, तमा च्यच्युमतिवी जु ति कुतुक गिवी, ङ्यातिवी जु ति कुतुक गिवी।
40 तमा जु साङ देवाच्येनकी जु ताङ जम्बुलिङकी जु गिवी। देवाच्येनकी जुकी ति वोसिर कुतुक वे, जम्बुलिङकी जुकी ति वोसिर कुतुक वे।
41 ङ्यिमी वोसिर ति नम्बा कुतुक गिवी, उलाकी वोसिर ति नम्बा कुतुक गिवी, तमा कर्मातिवी वोसिर ति नम्बा कुतुक राङ गिवी। तमा कर्मा च्यिककी वोसिर ति यम्बा कर्मातिवी ति सिनाङ कुतुक गिवी।
42 शेपतिवा सेन्बु लङ्गुप साङ तुकै राङ यिन। मुक्तुम ग्यकुप पेला रुलुपला मुक्तुम ग्यकिवी, यिने सेन्बु लङ्गुप पेला नाम्साङ मुरुलुपला सेन्बु लङ्गिवी।
43 तमा मुक्तुम ग्यकुप पेला दाक्पी जु ति ताङ्देन मेतुप ताङ ङार मेतुप डिवी, यिने सेन्बु लङ्गुप पेला मोवा वोतुप ताङ ङार छ्येवु च्युङ्गिवी।
44 तमा मी जु ति मुक्तुम ग्यकुप पेला जम्बुलिङकी जुला मुक्तुम ग्यकिवी, यिने सेन्बु लङ्गुप पेला कोन्छ्योककी थु चाङ्माकी नङ्गुप जुला सेन्बु लङ्गिवी। तुक क्यानी जम्बुलिङकी जु वोतुप दोके कोन्छ्योककी थु चाङ्माकी नङ्गुप जु साङ वे।
45 ती तप्की कोन्छ्योककी सुङला “थल्माकी मी आदम ति सेन्बु वोतुप मी च्युङ्सुङ।” सिनी टि वे, यिने तिङ्मी आदम यिन्दुप ख्रीष्ट ति मिजी नङ्गुप थु च्युङ्सुङ।
46 थल्माला वावु जु ति थु नेमा वावु जु मिन, तसाम पेलाकी दोके जु यिन। तमा ती ज्युक्ला वावु जु ति कोन्छ्योककी थु चाङ्मा नेमा वावु जु यिन।
47 थल्माकी मी आदम ति जम्बुलिङकी थला नेसुर जोवु यिन। तमा ती ज्युक्ला वावु मी येशू ख्रीष्ट ति देवाच्येन नेमा वावु यिन।
48 आदमकी गिपा नेमा वावु मीतिवी जु ति आदम दोके राङ डिवी। येशू ख्रीष्टला तेपा क्यानी देवाच्येनला डोप मीतिवी जु ति येशू ख्रीष्ट दोके राङ डिवी।
49 तुक क्यानी दाक्पु ति थला नेसुर जोवु मी आदमकी जुजमला वे। ज्युक्ला ति दाक्पु देवाच्येनकी मी यिन्दुप येशू ख्रीष्टकी जुजमला मिजी सम्बा च्युङ्गिवी।
50 अच्युनुपतिवा, ङ ख्यिराङला दी ताम्ङे ति सिरिन। श ताङ ठकला वोतुप दाक्पी जु ति कोन्छ्योककी ग्येल्खापला डो मुथुपी। तमा शिनी रुल डोप जु तीकी नाम्साङ मिशिवु मिजी ङ्ये मुथुपी।
51 ङ्येना, ङ ख्यिराङला छ्याकला वोतुप ताम्ङे यी सिरिन। दाक्पु तेरी मिशिवी, यिने तेरी सिनाङ तिङ्माला सङ्दुङकी वोरु तेन्लुङ्मे कोन्छ्योककी दाक्पी जु ति तेरी फो ज्यिकितो।
52 ती पेला शेपतिवा येलुङ नाम्साङ मिशिवु च्युङ्नी सेन्बु लङ्गितो। तमा कोन्छ्योककी दाक्पी जु साङ फो ज्यिकितो।
53 च्यिलासिसिन कोन्छ्योककी ना डोप जुतिवाला ति ना डो मिज्यिवी, शिनी डोपतिवाला ति मिशिवु मिजीला फो ज्यिकिवी।
54 तुक क्यानी ना डोपतिवा नाम्साङ ना मोडोवु ताङ शिनी डोपतिवा नरीकी थोक्ला लुवु पेला कोन्छ्योककी सुङला दुक सिनी टि वोतुप ति तेरी छेकिवी,
“चोवो कोन्छ्योककी नरीकी थोक्ला शेपकी खला ग्येल वे।”
55 “त याङ शेपकी सुला ग्येला कि थुप्किवी रो?
शेपकी ना तोङ्गुप ओङ ति कनी गाल?”
56 शेपकी ना तोङ्गुप ओङ ति दिक्पा यिन। तमा दिक्पाकी ओङ ति मोशाकी बिन्दुप ठिम यिन।
57 यिने कोन्छ्योकला थुचिछे बुलिन, खोकी दाक्पुला चोवो येशू ख्रीष्ट नेसुर शेप ताङ दिक्पाकी खला ग्येलुप ओङ नङ्गिवी।
58 तुक क्यानी ङे ङ्यिङ्ज्येवु अच्युनुपतिवा, ख्यिराङ हम क्या देता। सी साङ ख्यिराङला येर मर कितुप मोजोशिता। ख्यिराङ ति चोवो येशूकी थोक्ला शब्ज्यी कितुला नरी फरिन ग्युका। च्यिलासिसिन ख्यिराङला छ्या वे, ख्यिरा चोवोकी थोक्ला टेमु क्यावु ति नाम्साङ तेर्मेला मोडोवी।