4
ख्रीष्टकी लोमा छ्येतिवी लाका
1 तुक क्यानी ङ्यिराङ ति येशू ख्रीष्टकी लावातिवा यिन्दुप ताङ छ्याकला वोतुप कोन्छ्योककी ग्येल्खापकी कोर्ला शब्ज्यी कितुप मी यिन सिरुप ति मीतिवी हाक्को गोकिवी।
2 तोजो तिराङ मिन, कोन्छ्योककी ग्येल्खापकी कोर्ला शब्ज्यी कितुप मीतिवा ति खोङ्तेर्मु वुङ गोकिवी।
3 तमा ख्यिरा ङला क्येन बिन्सिनाङ, याङ्ना सी ङला ठिम्खाङला क्यल्सिनाङ ती ति ङे थोक्ला काङ साङ मिन। ङ राङला साङ क्येन फोकुप लाका मिकी।
4 ङ टेङ्बु वे सिरुप ति ङला छ्या वे, यिन्सिनाङ कोन्छ्योककी थोङ्दाङला ति ङ टेङ्बु मे। ङला ठिम क्या नङ्गुप याङ कोन्छ्योक राङ यिन।
5 तुक क्यानी ख्यिराङ कोन्छ्योककी ठिम क्या नङ्गुप सिनाङ गोमाला के सुला साङ ठिम माकी। चोवो येशू फेपुप पर सेक गुसा। दाक्पी सी साङ हाक्माकोवा क्यानी क्यावु लाका ल्यामु मेलोवा ति तेरी खोकी ठछ्येली थोङ्गिवी। मी सेमगी नोवातिवा साङ ठछ्येली छ्या देन्गिवी। ती पेला मीतिवा रे रेला कोन्छ्योककी “ख्यिरा छासे को छ्येसुङ।” सिनी सुङ्गिवी।
6 अच्युनुपतिवा, ख्यिराङला ल्यामु वुङ्शी सिनी ङ ताङ अपोल्लोसकी कोर्ला पङ्बु बिन्नी दी ताम्ङेतिवा ङे ख्यिराङला टिवु यिन। ङ्यिरा तुक क्यावु ति ख्यिराङ कोन्छ्योककी सुङला सुङ्गुप दोके क्यानी मिजी क्योङ्शी सिनी यिन। तुक क्यानी ख्यिराङ सु साङ “ती मी ति छ्ये यिन।”, “ती मी ति छ्युङा यिन।” सिनी ताम्ङे माकी।
7 सी ख्यिराङला मी यम्बा सिनाङ छ्ये यिन सिनी सिक्यासुङ? ख्यिरा मुला वोतुप तेरी मोलामतिवा कोन्छ्योककी ख्यिराङला नङ्गुप मिन रो? यिन्सिनाङ ख्यिराङ च्यिला तेके किवी?
8 ए, त याङ ख्यिराङला गोवु च्यालकतिवा तेरी थोप्नी ख्यिराङ छ्युक्पु गाल्सुङ। ए, त याङ ङ्यिराङ मेसिनाङ ख्यिराङ ग्येल्वु दोके च्युङ्सुङ। वुतुङ के ख्यिराङ ग्येल्वु यिन्दुप यिन्सियाङ ङ्यिराङ साङ ख्यिरा मुला राङ ग्येल्वु कितुप ङ्येतुप्जा।
9 यिने ङला दुका नासाम यी शर्किनोक, ङ्यिराङ ख्रीष्टकी लेन ल्यामु ख्याप्टाक कितुप लोमा छ्येतिवाला याङ कोन्छ्योककी मी मिङ्गाला सेतुप छ्येर्पा बिन्नी तेरी सिनाङ छ्युङा जो नङ वे। ङ्यिराङ याङ देवाच्येनकी लेन क्योलुप थुतिवा ताङ जम्बुलिङकी मीतिवी दोङ्ला ल्हेर्मु छ्या देन्दुप च्युङ्सुङ।
10 ए, ङ्यिराङ याङ ख्रीष्टकी थोक्ला रिक्पा मेतुप च्युङ्सुङ, यिने ख्यिराङ ति खोकी जोसालेन्सिन रिक्पा वोतुप च्युङ्सुङ। ङ्यिराङ ङार मेतुप गल वे, यिने ख्यिराङ ति ङार वोतुप गल वे। ख्यिराङला ताङ्देन ङ्येनी वे, यिने ङ्यिराङला याङ मीतिवी मारे ताङ्सुङ।
11 तन्दा सेक ङ्यिराङ ल्होतुङ्बा ताङ कोम्बा लावु ताङ पेर्तुङ्बा सिङ वे। मीतिवी ङ्यिराङला दुङ्यिन वे, तमा ङ्यिरा खाङ्बा शिङ साङ मे।
12 साप ताङ कोन्दुपकी थोक्ला ङ्यिरा राङ लाका टेमु कियी वे। मीतिवी ङ्यिराङला मोताप तप्सिनाङ ङ्यिरा तिवाला मोलाम तेर्किवी। दुक्पा बिन्सिनाङ हम क्या देकिवी।
13 तिवी ङ्यिराङला मारे ताङ्सिनाङ तिवाला ङ्यिरा ताम्ङे ल्यामो किवी। तन्दा सेक ङ्यिराङ जम्बुलिङकी मीतिवी थोङ्दाङला ज्यरा ज्यिरा ताङ थल्दुक दोके गल वे।
14 ख्यिराङला ङोछा लोङ्गुप सिनी दी यिकी टिवु मिन, ङे ङ्यिङ्ज्येवु आङातिवाला दोके क्यानी टोङ्गु तेरुपला टिवु यिनो।
15 येशू ख्रीष्टकी कोर्ला ख्यिराङला लाम तेरुप मीतिवा याङ तोङ्डा च्यिथम्बा चोयी वोज्यिवी, यिने पपा ति च्यिक राङ वे। ङे ख्यिराङला ख्रीष्ट येशूकी थोक्ला लेन ल्यामु ख्याप्टाक क्यावु तप्की ङ ति ख्यिरा पपा दोके च्युङ वे।
16 तुक क्यानी ख्यिराङ ङे दोके लुमु सेतुप वुङ गोकिवी सिनी ङ ख्यिराङला ठाकुरे सिरिन।
17 ती तप्की तिमोथीला ङ ख्यिरा ते तोङ्यिन वोतो। ती ति येशू ख्रीष्टला तेपा कितुप छासे ङ्यिङ्ज्येवु ङे पुज्युङ यिन। दासा तेरीला वोतुप चर्चकी मीतिवाला ङे लापुप दोके ङ चुक क्यानी येशू ख्रीष्टकी कला युनी मिजी क्याङ्सुङ सिरुप ताम्ङे ति तीकी ख्यिराङला टेन्सो कि ज्यिकितो।
18 ख्यिरा पर्ला मिरा चोकी याङ ङ ख्यिरा ते मेङ्गिवी नोक्यानी छ्येजु क्यानी युकिनोक।
19 यिने कोन्छ्योककी नोवा वोसिन, ङ ख्यिरा ते टिम्बु राङ वुङ्गुप्नो। तमा छ्येजु कितुपतिवी ताम्ङे ति कोन्छ्योककी ङार नेमा वावु यिनोक मिनोक सिनी ङ हाक्कोवा कितिन।
20 च्यिलासिसिन कोन्छ्योककी ग्येल्खाप ति ताम्ङेला मिन, यिने खोकी ङारला वे।
21 ख्यिरा नासाम काङ वे? ङ ख्यिरा ते वुङ्गुप पेला ख्यिराङला वोरु देन्दुपला वुङ्गुप की, सेम बोल्मु क्यानी ङ्यिङ्ज्ये कितुपला वुङ्गुप?