4
थली नेक्योक नङगी नोर
1 तुक क्यानी कोन्छ्योककी ङ्यिराङला च्यम्बा क्यानी खोला शब्ज्यी कितुप ती लाका नङ्गुप तप्की ङ्यिराङ यिछ्येता कि मोगोवी।
2 ङ्यिराङ तेरी परकी छ्याकला वोतुप ताङ ङोछा लङ्गुप लाका मेलोवातिवा नाम्साङ मिकिवी। तमा जिनोक जोप ताङ कोन्छ्योककी सुङ ति कुतुक जोप साङ मिकिवी। यिने टेङ्बु वोतुप सुङ तिराङ ख्याप्टाक क्यानी कोन्छ्योककी थोङ्दाङला तेरी मीतिवी सेमला ङ्यिराङ टेङ्बु यिन सिरुप तेन्तेन किवी।
3 ङ्यिरा ख्याप्टाक क्यावु लेन ल्यामु ति बानी ज्याक्सिन ती ति ना गल्नी पर्च्या ख्येलुपतिवी थोक्ला तिराङ यिन।
4 दी जम्बुलिङकी ल्हलु यिन्दुप शैतानकी येशूला तेपा मिकिवु मीतिवी सेम ति क्योङ्बु जोवु तप्की तिवी कोन्छ्योककी जुजमला फेवु ख्रीष्टकी मोवा यिन्दुप लेन ल्यामुकी वोसिर सल्वु ति थोङ मुथुपी।
5 ङ्यिराङ रङगी कोर्ला ख्याप्टाक मिकिवी, यिने येशू ख्रीष्ट तिराङ चोवो यिन सिरुप ताङ ङ्यिराङ ति येशूकी थोक्ला शब्ज्यी कितुप ख्यिरा योक्पु यिन सिनी ख्याप्टाक किवी।
6 “नक्तोमीला ठछ्येली डोशी।” सिनी सुङ्गुप कोन्छ्योककी दाक्पी सेमला खोकी वोसिर ति ग्यक च्यिन वे। तमा ती वोसिरकी दाक्पुला येशू ख्रीष्टकी शालला वोतुप कोन्छ्योककी मोवा हाक्को ज्यिकिवी।
7 यिने ङ्यिरा ख्याप्टाक क्यावु खक्छ्येवु लेन ल्यामु ति छ्यकुप थली नेक्योक नाङ्ला ज्याङ वे। तीकी तेन्दोक ति तेरी सिनाङ ओङ्ज्येन छ्ये ति ङ्यिरा नेसुर वावु मिन, कोन्छ्योक नेमा वावु यिन सिनी छ्या देन्दुपला यिन।
8 ङ्यिराङ नरी छो ज्यिकर नेसुर ङ्यप्च्येला ख्येल वोसिनाङ थल्दुकला मागल वे। यर्मिन मर्मिन गल्सिनाङ यिमाछ्ये वे।
9 मीतिवी ङ्यिराङला छेटाङ बिन्सिनाङ कोन्छ्योककी ङ्यिराङला क्युर्नी माज्याक वे। मीतिवी ङ्यिराङला पोप्नी तला ग्यप्सिनाङ ङ्यिराङ येलुङ लानी वे।
10 येशूकी मिजी ति ङ्यिरा मिजीला साङ वोतुप छ्या देन्दुपला ङ्यिराङ ङ्यिमी टेङ रङगी जुला खोकी थोक्ला शिराङ गोसिनाङ दुक्पा खुर्किवी।
11 वुतुङ के ङ्यिरा दी शिनी डोप मिजीला येशूकी मिजी थोङ्शी सिनी ङ्यिराङ माशिवा सेक नरी खोकी थोक्ला शेपला ख्येल्गिवी।
12 तुक क्यानी ङ्यिरा मिजीला ति शेपकी लाका किवी, यिने ख्यिराङला ति सेन्बु वोतुप मिजीकी लाका किवी।
13 कोन्छ्योककी सुङला “ङे तेपा क्यायी, तुक क्यानी ङ लपिन।,” सिरुप तीला कोन्छ्योककी थु चाङ्मा वोतुप दोके ङ्यिराङला साङ ती थु चाङ्मा वे। तुक क्यानी ङ्यिराङ साङ कोन्छ्योकला तेपा क्यानी ती ताम्ङे लप्किवी।
14 ङ्यिराङला छ्या वे, चोवो येशूला शेप ने ङोसु लोङ्गुप कोन्छ्योककी ङ्यिराङला साङ खो ताङ मुला सेन्बु लोङ्गिवी। तमा ख्यिराङ ताङ ङ्यिराङ तेरी मुला राङ खोकी चाला टिनी फेप्किवी।
15 दी तेरी ताम्ङेतिवा ख्यिरा थोक्ला राङ च्युङ्गुप यिन। तुक क्यानी कोन्छ्योककी कटिन ति मी बङीला ङ्येकिवी, तमा तिवी कोन्छ्योकला थुचिछे पुल्नी मङ खोला मोवा किवी।
16 तुक क्यानी ङ्यिराङ नाम्साङ यिछ्येता मिकिवी। ङ्यिरा जु ति काङ कि मुथुवु गल्सिनाङ ङ्यिरा सेम ति मङ मङ रम्बु डोयी वे।
17 तन्दा दाक्पी उकुर च्यिक चेयी दुक्पा खुर्सिमा ज्युक्ला नरीकी नरी लुवु कोन्छ्योककी मोवाकी कोर्ला नासाम ताङ्सिन दी दुक्पातिवा वुतुङ के काङ साङ मिन।
18 तुक क्यानी दाक्पु तन्दा मिककी थोङ्गुप च्यालकतिवाला मिन, यिने मिककी मोथोङ्गुप ज्युककी च्यालकतिवाला ङ्यम्ले किवी। च्यिलासिसिन मिककी थोङ्गुप च्यालकतिवा चेयी पर सेक तिराङ यिन, यिने मिककी मोथोङ्गुप च्यालकतिवा ति नरीकी नरी थोक्ला यिन।