2
ख्रीष्ट नेसुर थोपुप मिजी सम्बा
1 तोङ्ला ख्यिराङ लाका मेलोक्पा ताङ दिक्पाला ख्येल्नी शिन वे।
2 ती पेला दी जम्बुलिङ ताङ शैतानकी ओङ्ज्येनला वोतुप मीतिवी दोके ख्यिरा साङ लाका मेलोक्पा क्यासुङ। ती शैतानकी राङ तन्दा साङ कोन्छ्योककी सुङ मेङ्येन्दुप तिवी खला ओङ्ज्येन किवी।
3 ती दोके तोङ्ला दाक्पी साङ सेमला शरुप तेरी लाका मेलोक्पातिवा क्यानी मिजी क्योङ्गुप ताङ रङगी जु ताङ सेमगी नोवाला युवुजा। तुक क्यानी दाक्पु साङ मी यम्बा दोके कोन्छ्योककी पर्च्या फोकुप गिपा च्युङ्गुप यिन।
4 यिने कोन्छ्योक च्यङ्च्यु सेम्बा वोतुप तप्की खोकी दाक्पु तेरीला छासे ङ्यिङ्ज्ये क्या नाङ्सुङ।
5 दाक्पु दिक्पाला शोर्नी शिसिनाङ खोकी कटिन नेमा राङ दाक्पुला दिक्पा ने थर च्यिसुङ।
6 तमा खोकी मुला राङ दाक्पुला सेन्बु लङ्नी देवाच्येनला येशू ख्रीष्टकी मुला ज्याक्नी नाङ्सुङ।
7 तुक क्यावु ति च्यम्बा वोतुप कोन्छ्योककी येशू ख्रीष्ट नेसुर दाक्पुला ग्यक्चेकी कटिन नङ्गुप ति त वुङ्गुप कल्वाला छ्या देन्दुपला यिन।
8 च्यिलासिसिन दाक्पी खोला तेपा क्यानी खोकी कटिनकी राङ दाक्पु दिक्पा ने थरुप यिन। दी ति दाक्पी ङारकी ङ्येतुप मिन, यिने कोन्छ्योक नेमा थोपुप ङ्येम्बा यिन।
9 दाक्पी लाका ल्यामु क्यानी ङ्येतुप मिन, मिसियाङ मीतिवी ङ राङ यिन सिनी सिवी।
10 दाक्पु ति कोन्छ्योककी थोक्ला लाका ल्यामु कितुपला ख्रीष्ट नेसुर खोकी छ्याककी ज्येवु यिन। दाक्पु खोकी नोवाला वोतुप दोके युक्शी सिनी खोकी दाक्पुला तोङ्ला के ज्येवु यिन।
ख्रीष्टला च्यिक्पा राङ च्युङ्गुप
11 तुक क्यानी नासाम तोङ, तोङ्ला ख्यिराङ मिरिक यम्बाकी मीतिवा यिन्दुप तप्की कोन्छ्योकला ङो माशेनोक। ती पेला यहूदी च्येतुप लुक्सु क्यावुतिवी ख्यिराङला ङ्यिङ्मर क्यानी च्येतुप लुक्सु माक्यावुतिवा यिन सिनोक।
12 ती पेला येशू ख्रीष्टला ख्यिरा ङो माशेवु तप्की इस्राएलकी गिपा माच्युङ। तमा ख्यिराङ ति कोन्छ्योककी थाक्छ्येतुप ठिम नेसुर थाक्रिङ्बु गल्नी दी जम्बुलिङला रेवा मेतुप ताङ कोन्छ्योक ङो माशेनी दे नोक।
13 तोङ्ला ख्यिराङ मिरिक यम्बा यिन्दुप तप्की कोन्छ्योक नेमा थाक्रिङ्बु गाल्नोक, यिने त याङ येशू ख्रीष्टकी ठक नेसुर ख्यिराङ कोन्छ्योक ताङ मुला थाक्ङ्यिमु गल वे।
14 दाक्पुला सेम च्यिक्पा राङ जो नङ्गुप ति येशू ख्रीष्ट यिन। खोकी राङ यहूदी ताङ यहूदी मिन्दुप मिरिक यम्बाकी मीतिवा ङ्यिकरला च्यिक राङ जो नाङ्सुङ। तमा खो टुङ्नी खोरो जु नेसुर दाक्पी पर्ला डला जोप तम्जी मेलोक्पातिवा तेरी ना ताङ्सुङ।
15 तमा यहूदीतिवी छ्यो नाङ्ला वोतुप तेरी लुक्सुतिवा ना तङ्नी खो नेसुर यहूदी ताङ यहूदी मिन्दुप मिरिक यम्बा ङ्यिकरला लोदिमु वोतुप मी सम्बा जो नाङ्सुङ।
16 तमा येशू ख्रीष्ट ग्यङ्शिङला टुङ्नी दाक्पु ङ्यिकरला डला गलुप ति च्यिक राङ जोनी कोन्छ्योक ताङ मुला थिन च्यिसुङ। तमा यहूदी ताङ मिरिक यम्बाकी मीतिवी पर्ला ङ्यिङ्मर कितुप ताम्ङेतिवा ना ताङ नाङ्सुङ।
17 तमा खो फेप्नी ख्युरुङ थाक्रिङ्बु वोतुपतिवाला ताङ थाक्ङ्यिमु वोतुपतिवाला साङ लोदिमु तेरुप सुङ ख्याप्टाक क्या नाङ्सुङ।
18 येशू नेसुर राङ दाक्पु ङ्यिकरला कोन्छ्योककी थु चाङ्मा ङ्येनी ती थु चाङ्मा नेमा राङ दाक्पु ङ्यिकर पपा कोन्छ्योककी चाला लेप थुप्किवी।
19 तुक क्यानी त याङ ख्यिराङ छ्यिग्यपकी मी ताङ मिमेलुङ्दुङ दोके साङ मिन, यिने चाङ्मा वोतुप तेपा कितुप मीतिवा ताङ मुला लुङ्बा च्यिककी ज्यिक्तेम्बा ताङ कोन्छ्योककी मिछाङतिवा यिनो।
20 ती मिछाङतिवा ति लोमा छ्येतिवा ताङ कोन्छ्योककी लुङ्तेम्बातिवी जोवु डम्ज्यी रम्बु दोके यिन। तमा येशू ख्रीष्ट ति ती डम्ज्यीकी खक्छ्येवु सुरकी दो दोके यिन।
21 येशू ख्रीष्ट ताङ मुला च्यिक्पा राङ जोनी कोन्छ्योककी मिछाङतिवा तेरी थिन्नी खोकी थोक्ला कोन्छ्योककी ल्हङाङ ति मङ मङ पोरिन डिवी।
22 येशू ख्रीष्ट नेसुर ख्यिराङ साङ थु चाङ्माकी ओङला कोन्छ्योक ज्युवु दासा च्युङ्गुपला तेरी मुला थिन्नी च्यिक्पा राङ जोयी डिवी।