4
सेन देपुप पे
(मत्ती १३:१-२३; लूका ८:४-१५)
1 येलुङ येशूकी ग्येम्छो गारीला सुङ लाप नाङ्सुङ। ते मी मङ्मु खोकी चाला जोम्बुप तप्की खो टुला जेनी ती टी नाङ्ला ज्युनी ग्येम्छो नेवा फेचेक फेप्सुङ। ती पेला मीतिवा तेरी ग्येम्छो गारीकी स कम्बुला देन्नोक।
2 तमा खोकी तिवाला पे नेसुर सुङ मङ्मु लाप नाङ्सुङ। खोकी तिवाला दुक सुङ्सुङ,
3 “ङ्येना! सेन देपुप मी यी सेन देपुपला पाङ्ला थेन्सुङ।
4 तीकी सेन देप्सालेन्सिन ललाइ सेन ति लामला ख्येल्सुङ, तमा च्यच्युमतिवा वानी ती सेन ति थुनी सोसुङ।
5 ललाइ सेन ति थला अला मेतुप दोप्रोक खला ख्येल्सुङ, तमा ते थला अला मेतुप तप्की ती सेन ति ङमु राङ क्येसुङ।
6 यिन्सिनाङ ङ्यिमा शर्सिमा ती ति ङ्यिमी छिक्सुङ, तमा तीकी मर मेतुप तप्की रेर्पा गल्नी काम्सुङ।
7 ललाइ सेन ति छेर्माङ दोङ्बी पर्ला ख्येल्सुङ। तमा छेर्माङ दोङ्बु ग्या वानी तीला सेप्नी डुमा ग्यक माथुप।
8 ललाइ सेन ति स ल्यामुला ख्येल्सुङ। तमा ती ति क्येनी ग्यासिमा ललाइला दोम्बा खल सुम ताङ ललाइला दोम्बा खाल टुक ताङ ललाइला दोम्बा सयी डुमा ग्यप्सुङ।”
9 तमा येशूकी सुङ्सुङ, “सी ति ङ्येन्दुप नम्ज्योक नोके, तीकी ङ्येन्शी।”
येशूकी ती पेकी तेन्दोक सुङ्गुप
10 ती ज्युक्ला येशू च्यिक राङ ज्यु वोतुप पेला खोकी सुङ थोवु मीतिवा ति लोमा च्यिङ्ङीतिवी मुला खोकी चाला वानी ती पेकी तेन्दोक ति काङ यिन सिनी टिसुङ।
11 तमा खोकी तिवाला सुङ्सुङ, “ख्यिराङला ति कोन्छ्योककी ग्येल्खापकी छ्याककी ताम्ङे बिन वे। यिने कोन्छ्योककी ग्येल्खापकी मी मिन्दुपतिवाला ति तेरी ताम्ङे पेतिवा नेसुर राङ लप्किवी।
12 ती ति ‘तिवी ल्हाप याङ ल्हेवी, यिने मोथोङ्गिवी। थोवु याङ थोकिवी, यिने हाक्मोकोवी। तुक क्यानी तिवी सेम ग्युर्नी दिक्पा ने माफ ङ्ये मिज्यिवुला यिन।’ ”
13 लोङ येशूकी तिवाला सुङ्सुङ, “काङ ख्यिरा दी पेकी तेन्दोक हाक्मोकोसिन चुक क्यानी तेरी पेतिवा हाक्कोकिवी रो?
14 सेन देपुप मी ति कोन्छ्योककी सुङ ख्याप्टाक कितुप यिन।
15 तमा लामला ख्येलुप सेन ति दुका मीतिवा दोके यिन। तिवाला कोन्छ्योककी सुङ ख्याप्टाक कितुप पेला तिवी थोवु ति थोसुङ, यिने शैतान शार्क्येक वानी तीकी थोवु सुङ ति ठोनी डिवी।
16 तमा दोप्रोक खला ख्येलुप सेन ति दुका मीतिवा दोके यिन। तिवी सुङ थोसिमा शार्क्येक गा लानी ती सुङ ति सेमला लिङ्गिवी।
17 यिने ती सुङ ति तिवी सेमगी दिङ्ला माज्यकुप तप्की चेयी पर सेक तिराङ लुकिवी, सुङगी थोक्ला कले ताङ छेटाङ ख्येल वासिन शार्क्येक तेपा क्युर्नी ज्योकिवी।
18 लोङ छेर्माङ दोङ्बी पर्ला ख्येलुप सेन ति दुका मीतिवा दोके यिन। तिवी सुङ ङ्येन्गिवी,
19 यिने जम्बुलिङकी पप ताङ टोङ्बाकी नासाम ताङ यम्बा ताम्ङेकी देर्पाकी ती सुङला क्येक्नी डेलु मोगोर्वी।
20 यिने स ल्यामुला ख्येलुप सेन ति दुका मीतिवा दोके यिन। तीकी सुङ थोनी सेमला ज्याक्नी ललाइला दोम्बा खल सुम ताङ ललाइला दोम्बा खाल टुक ताङ ललाइला दोम्बा सयी डुमा ग्यकिवी।”
दिप्लीकी पे
(लूका ८:१६-१८)
21 तमा येशूकी तिवाला सुङ्सुङ, “सी दिप्ली च्येनी शोमकी वोक्ला याङ्ना ठीकी वोक्ला ज्योकिवी रो? काङ ती ति च्योक्ची खला मोज्योकिवी रो?
22 काङ बानी ज्याक्वे, ती ति थोङ्गिवी। तमा काङ छ्याकला ज्याक्वे, ती ति ठछ्येलीला छ्या देन्गिवी।
23 सी ति ङ्येन्दुप नाम्ज्योक नोके, तीकी ङ्येन्शी।”
24 तमा खोकी सुङ्सुङ, “ख्यिरा थोवु ताम्ङे ति ल्यामु क्यानी सेमला ज्योक। ख्यिरा चुका ताप्के नेसुर मी यम्बाला ताप्नी तेर्किवे, ती ताप्के नेमा राङ कोन्छ्योककी ख्यिराङला ताप्नी नङ्गितो, तमा मङ ल्हक्पा नङ्गितो।
25 सी लोला नोके, तीला मङ ल्हक्पा थोप्कितो। तमा सी लोला मेवे, तीकी लोला वोतुप तिङ ठोकितो।”
सेन ग्यावु पे
26 येलुङ येशूकी सुङ्सुङ, “कोन्छ्योककी ग्येल्खाप ति मी मिरा च्यिककी शिङ खला तपुप सेन दोके यिन।
27 ती मी ति नुपला ङ्यिलोकुप ताङ ङ्यिमी गुङला लङ्गुप पेला ती सेन ति क्येनी ग्येर्पु गल्सिनाङ चुक क्यानी तुकै च्युङ्गुप यिन सिरुप ति ती ति हाक्मोकोवी।
28 सेन तप्सिमा थला ने राङ डुमा ग्यकिवी। गोमाला सेन क्येकिवी, ती ज्युक्ला च्यङ्बा थेन्गिवी, तमा तिङ्ला ङ्यिमा थेन्सिमा तीला डुमा ग्यकिवी।
29 ङ्यिमा छोसिमा शार्क्येक तीला ङकिवी, च्यिलासिसिन तीला ङकुप पेला लेप्सुङ।”
राय छेर्माङकी सेनकी पे
(मत्ती १३:३१-३२, ३४; लूका १३:१८-१९)
30 येलुङ येशूकी सुङ्सुङ, “कोन्छ्योककी ग्येल्खाप ति दाक्पु काङ ताङ मुला डिकिवी? तीला चुका पे नेसुर शेतुप?
31 ती ति राय छेर्माङकी सेन दोके यिन। ती ति सला देपुप पेला तेरी सेन सिनाङ ठेमे यिन।
32 यिने तप्सिमा ती ति क्येनी ग्याकिवी, तमा तेरी ङोछेलतिवा सिनाङ दोङ्बु ग्येर्पु गल्नी तीकी येल्काला नामगी च्यच्युमतिवी छाङ जेवी।”
33 येशूकी तिवी हाक्कोवा सेक तिवाला पे बङी नेसुर सुङ लाप नाङ्सुङ।
34 खोकी तिवाला पे नेसुर मिसिन काङ मासुङ, यिने खो खोरे लोमातिवी मुला कुतुक ज्युवु पेला ती तेरी पेतिवी तेन्दोक ति सुङ्गिनोक।
येशूकी लुङ छ्यर्वाला कुसुमी दे च्यितुप
(मत्ती ८:२३-२७; लूका ८:२२-२५)
35 ती छेर्मु सोर्हिपला येशूकी खोरो लोमातिवाला “दाक्पु ग्येम्छो फर्केन डोप।” सिनी सुङ्सुङ।
36 तमा लोमातिवी मी मङ्मुला क्युर ज्याक्नी येशू ज्यु वोतुप टुला जेनी खोकी मुला राङ ग्येम्छो फर्केन डोप छाल्सुङ। ती पेला यम्बा टुतिवा साङ खोतिवी मुला राङ गाल।
37 तमा ते शार्क्येक लुङ छ्यर्वा ग्येर्पु ग्यप्सुङ। तमा छ्यी बालाप ल्हानी टी नाङ्ला शुनी टु ति क्येङ्गुप छाल्सुङ।
38 तोजो पेला येशू ति टुकी तिङ्ला ङाटी ग्यप्नी ङ्यी गाल्नोक। तमा लोमातिवी खोला लोङ्यिन सिरा “गेकेन, ङ्यिराङ नुम्नी शेप छलुप ति गेकेनला पप मलङ्नोक?” सिनी सिक्यासुङ।
39 तमा येशू लानी लुङ छ्यर्वाला वोरु तेन्नी ग्येम्छोकी छ्यी बालापला “कुसुमी दे! च्यपी दे!” सिनी सुङ्सुङ। तुक सुङ्लुङ्मे लुङ छ्यर्वा छ्येनी टाक्टुक कुसुमी गाल।
40 तमा येशूकी लोमातिवाला सुङ्सुङ, “ख्यिराङ च्यिला दुका ज्यिवा किवी? ख्यिरा ङला तरोङ साङ तेपा मिकिवी?”
41 तमा तिवा ज्यिवा कियी हलेवा क्यानी खोप्राङ पर्ला दुक सिक्यासुङ, “खो चुका परकी मी यिन? लुङ छ्यर्वा ताङ छ्यी बालापकी साङ खोकी कला ङ्येन्गिनोक।”