11
बप्तिस्मा तेरुप यूहन्नाकी खोरो लोमातिवा येशूकी ते तङ्गुप
(लूका ७:१८-३५)
1 येशूकी खोरो लोमा च्यिङ्ङीतिवाला ती तेरी ताम्ङेतिवा सुङ्सिमा तेसुर चाला वोतुप ग्येसा ग्येसाला फेप्नी तेकी मीतिवाला लोपुप ताङ लेन ल्यामु ख्याप्टाक क्यासुङ।
2 ती पेला यूहन्नाकी येशू ख्रीष्टकी क्या नङ्गुप तेरी लाकातिवी कोर्ला चोन्खाङला थोनोक। तमा तीकी खोरो लोमातिवाला खोकी चाला दुक सिनी टि ताङ्सुङ,
3 “कोन्छ्योककी तङ्गुप ख्रीष्ट ति ख्युरुङ राङ यिनाङ की, ङ्यिराङ मी यम्बाला गुनी दे गोकिवी?”
4 तमा येशूकी तिवाला सुङ्सुङ, “त ख्यिराङ लोक गल्नी ख्यिरा काङ थोवु ताङ काङ थोङ्गुप ति तीला दुक सिनी सी,
5 ‘मिक मोथोङ्गुपतिवा मिक थोङ थुप्किवी, थेङ्बातिवा युक थुप्किवी, जे ग्यपुप नेजु वोतुपतिवा टेक ज्यिकिवी, वोन्बातिवा थो थुप्किवी, शेपतिवा सेन्बु लोङ्गिवी, तमा पेराङ्बुतिवाला लेन ल्यामु ख्याप्टाक कियी वे।’
6 ङला तेपा कितुप क्युर्नी मोज्योकुप ति मोलाम थोपुप यिनो।”
7 तमा यूहन्नाकी लोमातिवा लोक्नी गल्सिमा येशूकी मी माङ्छ्योकला यूहन्नाकी कोर्ला दुक सिनी सुङ्सुङ, “ख्यिराङ दासा पाङ्थेरीला काङ ल्हापला गलुप? काङ वुर्तुककी योकुप ङ्युङ्मातिवा ल्हापला गलुप यिन?
8 मिसिन ख्यिराङ काङ ल्हापला थेन्दुप? मज्या ल्यामु ल्यामु कोन्दुप मी ल्हापला यिन? मज्या ल्यामु ल्यामु कोन्दुपतिवा याङ ग्येल्खाङ नाङ्ला राङ देकिवी।
9 मिसिन ख्यिराङ काङ ल्हापला थेन्दुप? कोन्छ्योककी लुङ्तेम्बातिवाला ल्हापला यिन? यिन, ङ ख्यिराङला सिरिन, ती ति कोन्छ्योककी लुङ्तेम्बा सिनाङ छ्ये यिन।
10 तीकी कोर्ला कोन्छ्योककी सुङगी नाङ्ला दुक सिनी टि वे,
‘ल्होसा, ङ ङे लेन क्योलुप मीला ख्योरो गोमाला तोङ्यिनो,
तीकी ख्योरो थोक्ला लाम टडिक कितो।’
11 वुतुङ के ङ ख्यिराङला सिरिन, आम्पुमकी खोक नेमा क्येवुतिवी पर्ला यूहन्ना सिनाङ छ्ये ति यम्बा सु साङ मे। यिन्सिनाङ कोन्छ्योककी ग्येल्खापला याङ सु तेरी सिनाङ छ्युङा नोके, ती ति यूहन्ना सिनाङ छ्ये यिन।
12 बप्तिस्मा तेरुप यूहन्नाकी ख्याप्टाक कितुप पे नेज्युनी तन्दा सेक कोन्छ्योककी ग्येल्खापला उर्च्युम ग्यकिन वे, तमा कशेन उर्च्युम ग्यकुपतिवाला ती ति ङ्येकिवी।
13 यूहन्ना वुङ्गुप सिनाङ गोमाला के तेरी कोन्छ्योककी लुङ्तेम्बातिवा ताङ मोशाकी ठिमला कोन्छ्योककी ग्येल्खाप वुङ्गुपकी कोर्ला नम्दर शेनी वे।
14 तिवी नम्दर शेतुप ति ख्यिरा सेमला लिङ्गुप राङ यिन्सिन वुतुङ के ती ति वुङ्गिवी सिनी सिक्यावु एलिया यिन।
15 सी ति ङ्येन्दुप नम्ज्योक नोके, तीकी ङ्येन्शी।
16 दी गिपाला ङ काङ ताङ क्यानी डिङ ल्हाप? दी गिपा याङ हाला देनी खोप्राङ दाल्जातिवी मुला दुका ताम्ङे कियी वोतुप आङ टिक्पेतिवा दोके यिन,
17 ‘ङ्यिरा ख्यिरा थोक्ला लुमु पुयिन,
यिने ख्यिराङ माछ्याम।
ङ्यिराङ ङुप्राङ क्यायिन,
यिने ख्यिराङ माङु।’
18 यूहन्नाकी साप साङ मासो, तमा थुङ्गुप साङ माथुनी ङ्युङ्ने देसुङ। ती पेला मीतिवी तीला डे ग्यप्नोक सिनी सिक्यासुङ।
19 ङ मी पुज्युङ वानी साप ताङ थुङ्गुप ति मीतिवी ल्हानी ‘ती ति सज्युरे ताङ छ्याङ्गेले यिन, तमा से दुतुप ताङ दिक्छेनतिवी दाल्जा यिन।’ सिनी सिवी। यिने कोन्छ्योककी रिक्पा ति ती रिक्पा वोतुप मीकी क्यावु लाका नेसुर राङ हाक्कोकिवी।”
दिक्पा ने सेम माग्युरुप ग्येसाकी मीतिवी कोर्ला
(लूका १०:१३-१५)
20 चुका ग्येसाला येशूकी हलेवु लाकातिवा बङी क्यावे, ती ग्येसाकी मीतिवा दिक्पा ने सेम माग्युरुप तप्की खोकी तिवाला दुक सिनी वोरु तेन्सुङ,
21 “ओ, खोराजीनकी मीतिवा, ख्यिराङला मोताप सुकितो! ओ बेथसेदाकी मीतिवा, ख्यिराङला मोताप सुकितो! ख्यिरा पर्ला क्यावु हलेवु लाकातिवा टुरोस ताङ सीदोनला क्यावु यिन्सिन तेकी मीतिवा गोमाला के रा र्होक्पुकी मज्या कोन्नी खोरो गोला थल्जाम लुक्नी दिक्पा ने सेम ग्युरुप्जा।
22 यिने ङ ख्यिराङला सिरिन, कोन्छ्योककी ठिम तोङ्गुप तिङ्मी तुजेला टुरोस ताङ सीदोन ग्येसाकी मीतिवा ख्यिराङ सिनाङ मङ हम क्यानी दे थुप्किवी।
23 ओ कफर्नहुम ग्येसाकी मीतिवा, ख्यिराङ येर देवाच्येनला के देकिवी? मिन, ख्यिराङ याङ मर ङ्येलाला के लुम्गिवी। च्यिलासिसिन ख्यिरा पर्ला क्यावु हलेवु लाकातिवा सदोम ग्येसाला क्यावु यिन्सिन ती ग्येसा ति हारिङ सेक लुवुजा।
24 यिने ङ ख्यिराङला सिरिन, ठिम कितुप तिङ्मी तुजेला सदोम ग्येसाकी मीतिवाला सिनाङ ख्यिराङला मङ कोन्छ्योक नेमा पर्च्या ख्येल्गितो।”
सेमला दुक्पा खुरुपतिवा ङे चाला वानी ङासो
(लूका १०:२१-२२)
25 ती पेला येशूकी दुक सुङ्नी मोपोर क्या नाङ्सुङ, “ओ पपा, देवाच्येन ताङ जम्बुलिङकी चोवो, ङ पपाला थुचिछे बुलिन। च्यिलासिसिन पपी दी ताम्ङे ति रिक्पा वोतुप ताङ लापुप मीतिवाला छ्याकला ज्याक्नी आङा टिक्पे दोके मालापुप मीतिवाला छ्या तेन्सुङ।
26 यिन, पपा, ती ति पपाला गा लङ्गुप नोवा यिन।
27 पपी ङला तेरी चेक तेन नाङ्सुङ। पपी तिराङ पुज्युङला ङो शेकिवी। तमा पुज्युङ ताङ पुज्युङकी खुरुङ सु यिन सिनी छ्या देन्दुपला पेतुपतिवी मिसिन यम्बा सी साङ पपाला ङो मेशेवी।
28 ओ दुक्पा ताङ दुङल खुर्नी सेमला येन छ्येतुपतिवा, ख्यिराङ तेरी ङे ते शोक। तमा ङ ख्यिराङला ङप्सु तेरिन।
29 ङ सेम वोल्मु ताङ कुसु ज्यम्बु वे, ख्यिराङ ङे ङ्याशिङ खुर्नी ङे नेसुर लोप। तुक क्यासिन ख्यिरा सेमला ङप्सु ङ्येकिवी।
30 च्यिलासिसिन ङे ङ्याशिङ ति जोल्हमु ताङ ङे खुरु ति येङ्गा वे।”