13
ओङ्ज्येन कितुपतिवी ओङला देतुप
1 तेरी मीतिवा लुङ्बाकी ओङ्ज्येन कितुपतिवी ओङला देशी। च्यिलासिसिन कोन्छ्योक नेमा वावु ओङ्ज्येन मिसिन यम्बा सी साङ ओङ्ज्येन कितुप मेङ्येवी। तिवा कोन्छ्योककी राङ पेन नङ्गुप यिन।
2 तुक क्यानी लुङ्बाला ओङ्ज्येन कितुपतिवी तेन्दोकला लङ्गुप तीकी कोन्छ्योककी पेतुप मीतिवी तेन्दोकला लङ्गुप यिन। तिवाला कोन्छ्योककी पर्च्या तोङ्गिवी।
3 च्यिलासिसिन तुका लाका टेङ्बु कितुपतिवा ओङ्ज्येन कितुपतिवाला ज्यिवा कितुप मिन, यिने लाका दुक्टा कितुपतिवा ओङ्ज्येन कितुपतिवाला ज्यिवा किवी। काङ ख्युरुङ ओङ्ज्येन कितुपतिवाला ज्यिवा किवी? तुकै यिन्सिन ख्युरुङ तिवी ओङला देनी लाका टेङ्बु की। तमा तिवी ख्युरुङला ताङ्देन किवी।
4 च्यिलासिसिन ओङ्ज्येन कितुप मीतिवा ख्युरुङला ल्यामु च्युङ्शी सिनी कोन्छ्योकला शब्ज्यी कितुप मीतिवा यिन। यिने दोजो ख्युरुङ दुक्टा किवी सिसिन ख्युरुङ तिवाला ज्यिवा कि गोकिवी। तीकी तेन्दा मेताला खुर्पा मेजेर्वी, लाका दुक्टा कितुपतिवाला पर्च्या तोङ्गुप कोन्छ्योकला शब्ज्यी कितुप मीतिवा यिन।
5 तुक क्यानी ख्यिराङ कोन्छ्योककी पर्च्या नेसुर र्होकुपला तिराङ मिन, यिने सेमगी दिङ नेज्युनी नासाम ताङ्नी ओङ्ज्येन कितुपतिवी ओङला दे गोकिवी।
6 ती तप्की ख्यिरा तिवाला से ते गोकिवी, च्यिलासिसिन तिवा तीकी थोक्ला नरी कोन्छ्योकला शब्ज्यी कितुप मीतिवा यिन।
7 ती तप्की ख्यिरा ते गोवु काङ रे च्यिक रे वोसिन ते। ते गोवु सेतिवा ते। ज्यिवा कि गोवुतिवाला ज्यिवा की। ताङ्देन कि गोवुतिवाला ताङ्देन की।
ङ्यिङ्ज्ये कितुप ति तेरी क छे ज्यितुप यिन
8 ख्यिराङ च्यिककी च्यिकला ङ्यिङ्ज्ये कितुप ति मिसिन यम्बा सी मुला साङ छ्यावा मालाङ। च्यिककी च्यिकला ङ्यिङ्ज्ये कितुप ति मोशाकी ठिमला वोतुप कला सिक्यावु तेरी छे ज्यितुप यिन।
9 ति ठिम नाङ्ला “ख्योरो शम्डेन माकी, मी मासे, कुन माकी, देर्पा माकी।” सिनी टिवु कतिवा ताङ यम्बा कतिवा तेरीकी खक्छ्येवु तेन्दोक ति “रङगी युल्वातिवाला रङला दोके ङ्यिङ्ज्ये की।” सिक्यावु क ताङ मुला च्यिक्पा राङ वे।
10 ख्योरो सेमला ङ्यिङ्ज्ये वोसिन ख्योरो युल्वातिवाला साङ मेलोवा मिकिवी। ती तप्की ङ्यिङ्ज्ये कितुप ति ठिमला वोतुप कतिवा तेरी छे ज्यितुप यिन।
11 दी ताम्ङे ति नासाम तोङ। तसाम पेला चुका तुजे यिन सिरुप ति ख्यिराङला छ्या राङ वे। त याङ ङ्यिलोकुप ने लङ्गुप तुजे यिन। च्यिलासिसिन दाक्पु गोमाला तेपा क्यावु पेला सिनाङ तसाम पेला मङ दाक्पुला दिक्पा ने थरुप ति चिप्ला राङ वे।
12 त याङ नुप गल सिन्नी नाम लङ्गुप छाल्सुङ। तुक क्यानी दाक्पु नक्तोमीला कितुप लाका दुक्टा क्युर्नी ठछ्येलीला लाका टेङ्बु कितुपला कोन्छ्योककी नङ्गुप लाक्च्ये खुर्नी यु।
13 तमा ङ्यिमी गुङला युकुप दोके मिजी टेङ्बु क्योङ्गुप। ङ्याम तोङ्गुप ताङ छ्याङ्गेले कितुप ताङ शम्डेन कितुप ताङ छ्येवु कितुप ताङ थमु ग्यकुप ताङ ठतोक कितुप माकी।
14 यिने ख्यिराङ काङ क्यासिनाङ चोवो येशू ख्रीष्टकी दोके की, तमा दिक्पा कितुप जुकी किताङ नालुला वोतुप नासाम मेलोवा मातोङ।