9
कोन्छ्योककी इस्राएलला पेन नङ्गुप
1 ङ येशू ख्रीष्टकी मी यिन्दुप तप्की ख्यिराङला जिनोक माजोनी टेङ्बो सिरिन। दी ताम्ङे ति कोन्छ्योककी थु चाङ्मा नेमा ङे सेमगी पङ्बु तेर्किवी।
2 ती काङ यिन सिसिन ङे सेमला छासे दुङल ताङ सेम्दुक नरी वे।
3 ङरा यहूदी अच्युनुपतिवी थोक्ला यिन्सिन ङला काङ मोताप तप्सिनाङ, ख्रीष्ट नेसुर क्युन ज्याक्सिनाङ ङला गा लङ्गिवी।
4 तिवा ति इस्राएलकी मीतिवा यिन। कोन्छ्योककी तिवाला खोरो पुज्युङ जो नाङ्सुङ, खोकी तिवाला खोरे मोवा छ्या तेन्सुङ, खोकी तिवी मुला थाक्छ्येवु ताम्ङे जो नाङ्सुङ, मोशा नेसुर ठिम साङ जो नाङ्सुङ, खोकी तिवाला यहूदी ल्हङाङला सोवा देकुप ताङ थाक्छ्येन नङ्गुप ताम्ङे साङ तिवाला राङ नाङ्सुङ।
5 ती तिराङ मिन, तिवा ति अब्राहाम ताङ इसहाक ताङ याकूबकी गिपातिवा यिन। येशू ख्रीष्ट साङ तिवी गिपा नेमा राङ क्येवु यिन। ती येशू ख्रीष्ट ति जम्बुलिङ तेरीकी खला चोछ्ये वोतुप कोन्छ्योक यिन। खोला राङ नरी सोवा वुङ्शी, आमिन।
6 यिने इस्राएलकी मीतिवाला कोन्छ्योककी थाक्छ्येन नङ्गुप सुङ ति लम्सुला मागलुप मिन। च्यिलासिसिन इस्राएलला क्येवुतिवा तेरी इस्राएलकी मी मिन,
7 अब्राहामकी गिपातिवा साङ तेरी वुतुङ के कोन्छ्योककी पुज्युङ पुम मिन। च्यिलासिसिन कोन्छ्योककी सुङला “इसहाक नेमा च्युङ्गुपतिवा तिराङ ख्योरो गिपा यिन सिनी सिवी।” सिनी सुङ्सुङ।
8 तीकी तेन्दोक ति अब्राहाम नेसुर च्युङ्गुपतिवा कोन्छ्योककी पुज्युङ पुम मिन, यिने कोन्छ्योककी थाक्छ्येन नङ्सिमा क्येवुतिवा तिराङ अब्राहामकी गिपा यिन।
9 ती कोन्छ्योककी थाक्छ्येन नङ्गुप सुङ ति दुकै वे, “त वुङ्गुप लो खोर्मा यीला ङ लोक्नी वुङ्गुप पेला साराकी पुज्युङ यी क्येकितो।”
10 तोजो तिराङ मिन, सारा नेमा क्येवु पुज्युङ इसहाककी पेर्मी रिबेकाला साङ पुज्युङ छेमा क्येसुङ।
11-12 यिने पुज्युङ छेमा क्येप सिनाङ गोमाला कोन्छ्योककी रिबेकाला “ख्योरो पुज्युङ छ्ये तीकी छ्युङा तीला शब्ज्यी कितुप डितो।” सिनी थाक्छ्येन नाङ्सुङ। तीकी तेन्दोक ति तिवी लाका ल्यामु मेलोवा काङ साङ माक्यावु पेला मीतिवी लाका ल्यामु नेमा मिन, कोन्छ्योककी नोवाला वोतुप तीला तिराङ पेतुप ति छ्या देन्दुपला खोकी रिबेकाला तुक सिनी सुङ्गुप यिन।
13 कोन्छ्योककी सुङला साङ तीकी कोर्ला दुक सिनी टि वे, “याकूबला ति ङे ङ्यिङ्ज्ये क्यायी, एसावला ति ङ्यिङ्मर क्यायी।”
14 त दाक्पु तीकी कोर्ला काङ सिरुप? काङ कोन्छ्योक ति मीला ख्ये बेतुप कोन्छ्योक यिन रो? तुकै मिन।
15 खोकी मोशाला दुक सुङ्नी वे,
“सुला ङे ङ्यिङ्ज्ये कितुप नो वे,
तीला ङ ङ्यिङ्ज्ये कितिन।
सुला ङे च्यम्बा कितुप नो वे,
तीला ङ च्यम्बा कितिन।”
16 तुक क्यानी मी नोवा ताङ टेमु क्यानी मिन, यिने कोन्छ्योककी खोरे नोवा नेमा तिराङ च्यम्बा गिवी।
17 च्यिलासिसिन कोन्छ्योककी सुङला मिश्रकी ग्येल्वु फारोकी कोर्ला साङ दुक सिन टि वे, “ङे ङार ति ख्युरुङला छ्या देन्दुप ताङ जम्बुलिङकी मीतिवा तेरीला ङे मिङकी थोक्ला सुङ ख्याप्टाक कितुला ङे ख्युरुङला ग्येल्वु च्युङ च्यितुप यिन।”
18 तुक क्यानी कोन्छ्योककी खोरे च्यम्बा नङ्गुप नोक्यावुतिवी खला च्यम्बा नङ्गिवी, तमा सेम क्योङ्बु जोप नोक्यावुतिवाला सेम क्योङ्बु जो नङ्गिवी।
कोन्छ्योककी नङ्गुप पर्च्या ताङ च्यम्बा
19 तुकै यिन्सिन “कोन्छ्योककी च्यिला ङला क्येन ग्यकिताङ? खोकी नोवाला सी मेलोवा सि थुप्किवी?” सिनी ख्यिरा सिवी।
20 यिने, ओ मीतिवा, कोन्छ्योकला ख लोकुप ति ख्युरुङ सु यिन? ख्युरुङला ज्ये नङ्गुप तीला ख्योरो “ङला च्यिला तुक राङ जोवु यिन?” सिनी टि मुथुपी।
21 काङ थली नेक्योक जोप मी तीला थला नुपुप दम्बक नेसुर थली नेक्योक च्यिक ति खक्छ्येवु ताङ यम्बा ति अला खक्छ्येवु मेतुप जोप ओङ मे रो?
22 ती दोके कोन्छ्योककी साङ खोरे ओङ नेसुर मीतिवाला ना ताङ्नी खोकी पर्च्या ताङ ङार छ्या देन्दुप नोवे, यिने खोकी पर्च्या तोङ्गुप नो क्यावु मीतिवी थोक्ला खो हम क्यानी दे मुथुवी रो?
23 तमा खोकी खोरे मोवाकी थोक्ला गोमाला के च्यम्बा नङ्गुप टडिक क्यावु मीतिवाला छासे मङ्मु वोतुप मोवा छ्या तेन नङ्सिमा दाक्पी काङ सि थुप्किवी?
24 खोकी दाक्पुला पेन नङ्गुप पेला यहूदीतिवा नेसुर तिराङ मिन, यिने यहूदी मिन्दुप मिरिक यम्बाकी मीतिवा नेसुर साङ पेन नङ्गुप यिन।
25 होशेकी थेप नाङ्ला कोन्छ्योककी दुक सुङ्नी वे,
“ङे मी मिन्दुप मीतिवाला ङ ‘ङे मीतिवा’ सिनी सिरिनो।
तमा ङे ङ्यिङ्ज्ये माक्यावु मीतिवाला ङ ‘ङे ङ्यिङ्ज्येवु मीतिवा’ सिनी सिरिनो।”
26 “कनी ख्यिराङला ‘ङे मीतिवा मिन’ सिनी सिक्यावे,
ते तिवा ‘ङोसु वोतुप कोन्छ्योककी पुज्युङ पुम यिन’ सिनी सिरिनो।”
27 तमा इस्राएलकी मीतिवी कोर्ला कोन्छ्योककी लुङ्तेम्बा यशैयाकी वोरु तेन्नी,
“इस्राएल गिपाकी मीतिवा ग्येम्छो गारीला वोतुप पेमा दोके वोसिनाङ यम्बा ते लुनी वोतुपतिवा तिराङ पर्च्या नेसुर थर्कितो।
28 दी कोन्छ्योककी सुङ्गुप सुङ ति जम्बुलिङला ङमु राङ क्यानी तेरी छेकिवी।”
सिनी सिक्यासुङ।
29 येलुङ लुङ्तेम्बा यशैयाकी,
“दोजो चोछ्येवु कोन्छ्योककी दाक्पी थोक्ला गिपा चेयी माज्यकुप यिन्सिन दाक्पु सदोम ताङ गमोराकी मीतिवा दोके ना डिवी।”
सिनी गोमाला के नम्दर शेनी वे।
इस्राएलकी मीतिवी तेपा माक्यावु कोर्ला
30 तुक क्यानी दाक्पु काङ सिरुप? यहूदी मिन्दुप मिरिक यम्बाकी मीतिवी कोन्छ्योककी ठिमला सिक्यावु दोके माक्यासिनाङ खोकी थोङ्दाङला टेङ्बु च्युङ वे। ती टेङ्बु ति तेपा क्यावु तप्की च्युङ्गुप यिन।
31 यिने इस्राएलकी मीतिवी टेङ्बुकी ठिमला सिक्यावु दोके लाका याङ क्यासिनाङ खोकी थोङ्दाङला टेङ्बु ङ्ये माथुप।
32 च्यिला माथुप्नोक सिसिन, तिवी खोकी थोङ्दाङला टेङ्बु च्युङ्गुप ति लाका ल्यामु क्यानी ङ्येकिते नो क्यानी कोन्छ्योकला ति तेपा कितुप नो माक्या। तुक क्यानी तिवा दोला नर्तुक ग्यप्नी तला ग्यप्नी वे।
33 तीकी कोर्ला कोन्छ्योककी सुङला दुक सिनी टि वे,
“ल्होसा, ङ सियोनला नर्तुक ग्यकुप दो दोके मिरा च्यिक ज्योकिनो,
मीतिवा तीला नर्तुक ग्यकितो,
यिने तीला तेपा कितुप मीतिवा ति सु साङ ङोछाला मेख्येल्तो।”