16
कोन्छ्योककी ङ्यिर्मुकी कोरा दिन
1 तमा येलुङ कोन्छ्योककी ल्हङाङ नेमा कशेन थोर ग्यप्नी “ख्यिराङ ग्युक, तमा कोन्छ्योककी ङ्यिर्मुकी कोरा दिनतिवा लानी जम्बुलिङला पु।” सिनी देवाच्येनकी लेन क्योलुप थु मिरा दिनतिवाला सिक्यावु ति ङे थोसुङ।
2 तमा देवाच्येनकी लेन क्योलुप थु तङ्बु ति लानी खोरो कोरा ति जम्बुलिङला पुसुङ। तीकी जोसालेन्सिन सेम्ज्येनकी लज्युर वोतुप ताङ तीकी कुला तेन्दुप मीतिवा तेरीकी जुला छासे सुक मेलोवा वोतुप कुर्मुतिवा थेन्सुङ।
3 ती ज्युक्ला येलुङ देवाच्येनकी लेन क्योलुप थु ङ्यिवा तीकी खोरो कोरा ति ग्येम्छो नाङ्ला पुसुङ। तमा ती ग्येम्छो ति शेप मी ठक दोके गाल्सुङ। तमा ग्येम्छो नाङ्ला सेन्बु वोतुप सेम्ज्येनतिवा तेरी शिसुङ।
4 येलुङ देवाच्येनकी लेन क्योलुप थु सुम्बा तीकी खोरो कोरा ति चङ्बु ताङ छ्यी पुङतिवी खला पुसुङ। तमा ती चङ्बु ताङ छ्यी पुङतिवा तेरी ठकला गाल्सुङ।
5 तुक राङ क्यानी छ्युला ओङ्ज्येन कितुप लेन क्योलुप थु तीकी दुक सिक्यावु ति ङे थोसुङ।
“ओ थल्माला ज्यु वोतुप ताङ तन्दा सेक नरी लुवु चाङ्मा वोतुप चोवो कोन्छ्योक,
चोवोकी दी ठिम क्या नङ्गुप ति छासे टेके यिन।
6 च्यिलासिसिन ती दुक्टातिवी चोवोला तेपा कितुप मीतिवा ताङ चोवोकी सुङ शेतुप लुङ्तेम्बातिवाला सेनी ठक तेन्सुङ।
ती ठक ति चोवोकी तिवाला थुङ च्यिसुङ।
ती ति तिवाला ङ्ये गोवु छ्येर्पा यिन।”
7 तमा छोठी नेमा दुक सिक्यावु ति ङे थोसुङ।
“यिन, ङार छ्येवु चोवो कोन्छ्योक।
कोन्छ्योककी ठिम क्या नङ्गुप ति वुतुङ के टेङ्बु ताङ टेके यिन।”
8 ती ज्युक्ला देवाच्येनकी लेन क्योलुप थु ज्यिवा तीकी खोरो कोरा ति ङ्यिमी खला पुसुङ। तमा ङ्यिमाला मीतिवा छिकुप ङार ङ्येसुङ।
9 तमा ङ्यिमा छेन्दीकी मीतिवा कशेन छिक्सुङ। तिवाला छेटाङ ख्येल्सिमा तिवी ती छेटाङ तेरुप ति कोन्छ्योक राङ यिन सिनी खोला मारे ताङ्सुङ। यिने सेम ग्युर्नी खोला मोवा ति माक्या।
10 येलुङ देवाच्येनकी लेन क्योलुप थु ङवा तीकी खोरो कोरा ति गोमाला ग्येम्छो ने थेन्दुप सेम्ज्येनकी ग्येल्ठिक खला पुसुङ। तमा ती सेम्ज्येनकी ग्येल्खाप ति तेरी नक्तोमी गल्नी मीतिवा कशेन छेटाङला ख्येल्नी स मुर्सुङ।
11 तिवाला कुर्मु थेन्नी कशेन सुक क्यावु तप्की देवाच्येनला ज्यु वोतुप कोन्छ्योकला मारे ताङ्सुङ। यिने तिवी खोप्राङ क्यावु लाका मेलोवा नेसुर सेम ति माग्युर।
12 तमा देवाच्येनकी लेन क्योलुप थु टुक्पा तीकी खोरो कोरा ति युफ्रेटिस सिरुप चङ्बु ग्येर्पुकी नाङ्ला पुसुङ। तमा ती चङ्बी नाङगी छ्यु ति तेरी कम्नी शरकी थाका नेसुर वुङ्गुप ग्येल्वुतिवी थोक्ला लाम टडिक क्यासुङ।
13 ती ज्युक्ला ती डुक तीकी ख नेमा ताङ ती सेम्ज्येनकी ख नेमा ताङ लुङ्तेम्बा मेटेङ्बु तीकी ख नेमा बल्वा दोके वोतुप थु मेचेङ्गा सुम चोके थेन्दुप ति ङे थोङ्सुङ।
14 तिवा ति हलेवु त छ्या देन्दुप डेकी थुतिवा यिनोक। तिवा ङार छ्येवु कोन्छ्योक ताङ मुला मक ग्यकुपला जम्बुलिङकी ग्येल्वुतिवा तेरीकी ते गल्नी दासा च्यिकला जोम्गिवी। ती मक ग्यकुप तुजे ति कोन्छ्योककी ठिम क्या नङ्गुप तुजे ग्येर्पु यिन।
15 “दी ताम्ङे ति ल्यामो ङ्येना। ङ कुर्मेन वावु दोके हाक्माकोवा क्यानी वुङ्गिनो। सु च्याङ्से क्यानी खोप्रे मज्या कोन्नी टडिक क्या देकिवे, ती ति मोलाम थोपुप यिनो। तुक क्यासिन तिवा मी मिङ्गाला पेर्तुङ्बा साङ मुलुवी, ङोछाला साङ मेख्येल्वी।”
16 ती ज्युक्ला ती थु मेचेङ्गा सुमतिवी जम्बुलिङकी ग्येल्वुतिवा तेरी दासा च्यिकला जोम च्यिसुङ। ती दासाकी मिङ ति हिब्रू ताम्ङेला आर-मागेड्डोन सिवी।
17 येलुङ देवाच्येनकी लेन क्योलुप थु दिन्बा तीकी खोरो कोरा ति नामला पुसुङ। तमा कोन्छ्योककी ल्हङाङकी ग्येल्ठिक नेमा थोर ग्यप्नी “त याङ तेरी छेसुङ।” सिरुप वोरु यी ग्यप्सुङ।
18 ती ज्युक्ला चिलाम ग्यकुप ताङ कशेन वोरु देन्दुप ताङ सम्डुक ग्यकुप ताङ सयी ग्येर्पुतिवा ग्यप्सुङ। तुका सयी ग्येर्पु ति जम्बुलिङला मी ज्येङ्गुप पे नेज्यु तन्दा सेक नाम्साङ माग्यप।
19 तीकी जोसालेन्सिन ते वोतुप चोछ्येर्मु ग्येसा बेबिलोन ति फेका सुम गाल्सुङ। तमा लुङ्बा लुङ्बाकी ग्येसातिवा साङ तेरी रम्नी ना गाल्सुङ। ती ति कोन्छ्योककी बेबिलोनकी दिक्पा क्यावु नासाम शार्नी खोकी ङ्यिर्मु लावु पर्च्या ति ती ग्येसाला ख्येल च्यितुप यिन।
20 तमा ग्येम्छो पर्ला वोतुप ग्येम्छो परकी स कम्बु दासा साङ तोर्नी गाल्सुङ, टकतिवा साङ तानी गाल।
21 ती ज्युक्ला नाम नेमा किलो खल ङ्यी चोयी वोतुप सेर बोम्बुतिवा मीतिवी गोला पाप्सुङ। तुका छेटाङ ख्येलुप तप्की मीतिवी कोन्छ्योकला मारे ताङ्सुङ। च्यिलासिसिन ती सेर ग्यकुप छेटाङ ति छासे ज्यिवा लङ्गुप नोक।