21
देवाच्येन सम्बा ताङ जम्बुलिङ सम्बा
1 तमा ङे देवाच्येन सम्बा ताङ जम्बुलिङ सम्बा थोङ्सुङ। ते थल्माकी देवाच्येन ताङ जम्बुलिङ ति तेरी तोर्नी गाल्नोक, ग्येम्छो साङ मोथोङ्नोक।
2 तमा चाङ्मा वोतुप यरूशलेम ग्येसा सम्बा ति देवाच्येन नेमा जम्बुलिङला पाप्नी तङ्गुप ति ङे थोङ्सुङ। ती ग्येसा ति मक्पा ठेतुपला नमा छ्यावु दोके टडिक क्यावु नोक।
3 ती ज्युक्ला ग्येल्ठिक नेमा दुक सिनी वोरु थोर ग्यपुप ति ङे थोसुङ, “ल्होसा, तफेन्ला कोन्छ्योककी देसा ति मीतिवी मुला गिवी। तमा खो मीतिवी मुला ज्युकिवी। मीतिवा खोकी गिपा च्युङ्गिवी। खो खुरुङ मीतिवी मुला ज्युकिवी, तमा खो ति तिवी कोन्छ्योक च्युङ्गिवी।
4 खोकी मीतिवी मिक नेसुर मिक्च्युर तेरी पिनी तेर्किवी। तमा तिवा येलुङ नाम्साङ मिशिवी। सेम क्योके कितुप ताङ ङोप ताङ दुङल साङ मेवी। च्यिलासिसिन ती जम्बुलिङकी ताम्ङे ङि्यङ्बातिवा तेरी तोर्नी गाल।”
5 तमा ग्येल्ठिकला ज्यु वोतुप तीकी ङला सुङ्सुङ। “ल्होसा, त याङ ङ देवाच्येन ताङ जम्बुलिङला वोतुपतिवा तेरी सम्बा जोयिनो।” येलुङ खोकी ङला सुङ्सुङ, “दी ताम्ङेतिवा टिसा। दिवा छासे खोङ्तेर्मु ताङ टेङ्बु वे।”
6 येलुङ खोकी ङला सुङ्सुङ, “त याङ तेरी छेसुङ। ङ अल्फा ताङ ओमेगा यिन। तीकी तेन्दोक ति थल्मा ताङ तिङ्मा ङ राङ यिन। सु कोम्बा लङ्गिवे, तिवाला मिजी तेरुप छ्यु दोलुप दासा नेसुर थेन्दुप छ्यु ति तुक राङ थुङ ज्यितिनो।
7 सी शैतानकी खला ग्येल्गिवे, तिवाला ती मोलाम ति तेरी थोप्कितो। तमा ङ तिवी कोन्छ्योक च्युङ्गितो। तिवा ति ङे पुज्युङपुम च्युङ्गितो।
8 यिने च्ये ङ्यिङ दोके वोतुपतिवा ताङ तेपा मिकिवुतिवा ताङ क्युक्टो लङ्गुप लाका कितुपतिवा ताङ मी सेतुपतिवा ताङ शम्डेन कितुपतिवा ताङ मो ग्यकुपतिवा ताङ ल्हलु तेन्दुपतिवा ताङ जिनोक जोपतिवा तेरी मे ताङ तुसोक बरिन वोतुप ग्येम्छोला क्युर्कितो। दी ति शेप ङ्यिवा यिन।”
यरूशलेम सम्बा
9 ती पेला तिङ्मी तुजेला ख्येलुप छेटाङ दिनकी क्येङ्गुप कोरा दिन खुरुप देवाच्येनकी लेन क्योलुप थु मिरा दिन ङे थोङ्सुङ। तिवी पर्ला मिरा च्यिक ति वानी “शोक, ङ ख्युरुङला लुक रुककी पेर्मी यिन्दुप खोकी नमा छ्या देनिन।” सिनी ङला सिक्यासुङ।
10 तमा तीकी ङला कोन्छ्योककी थु चाङ्माकी ओङला छासे री थेन्बुकी गोला टिनी कोन्छ्योक ज्यु वोतुप देवाच्येन नेमा चाङ्मा वोतुप ग्येसा यरूशलेम ति मर पपिन कितुप छ्या तेन्सुङ।
11 ती ग्येसा ति कोन्छ्योककी मोवाकी ठछ्येली गल्नी नोक। ती वोसिर ति ङ्यिमा दोके छासे वो ग्यकुप ताङ शेल दोके नाङ्ला थोङ्गुप छासे सल्वु नोक।
12 ती ग्येसाकी गारी गुरीला दोकर थेन्बु ताङ ग्यिर्पो यी ग्यप्नी नोक। ती दोकरला गो च्यिङ्ङी नोक। तमा गो रे रेला र्हेन्दुप देवाच्येनकी लेन क्योलुप थु रे रे नोक। ती गोला इस्राएलकी गिपा च्यिङ्ङीकी मिङतिवा टिनी नोक।
13 तमा शरकी थाकाला गो सुम ताङ ल्होकी थाकाला गो सुम ताङ च्याङगी थाकाला गो सुम ताङ नुपकी थाकाला गो सुम नोक।
14 ती ग्येसाकी दोकरला डम्ज्यी च्यिङ्ङी नोक। तमा ती खला लुक रुककी लोमा छ्ये मिरा च्यिङ्ङीकी मिङ टिनी नोक।
15 तमा ङे मुला ताम्ङे कितुप तीकी लकला ग्येसा ताङ तीकी गोतिवा ताङ दोकर ति तपुपला सेरकी थिक्शिङ यी खुर्नी नोक।
16 ती ग्येसा ति सुर ज्यी नोक। तमा शाङ ताङ रिङ्दुङ ति च्यिक्पा राङ नोक। ती देवाच्येनकी लेन क्योलुप थु तीकी ती ग्येसा ति ताप्नी ल्हासियाङ तीकी शाङ ताङ रिङ्दुङ ताङ थुचे ति च्यिक्पा राङ किलो मिटर तोङ्डा ङ्यी ताङ सयी ज्यी नोक।
17 येलुङ ती देवाच्येनकी लेन क्योलुप थु तीकी दोकर ति ताप्सुङ। तमा ती दोकर ति मी ताप्नी ल्हावु दोके मिटर खल टुक ताङ ङ थेन्बु नोक।
18 ती दोकर ती बिल्लौर सिरुप यु थ्वोनी जोवु नोक। तमा ग्येसा ति शेल दोके सल्वु थोङ्गुप सेर ङोमा थ्वोनी जोवु नोक।
19 ती दोकरकी डम्ज्यीतिवा गोङ नावु यु नम्बा बङी थ्वोनी जोवु नोक। थल्माकी डम्ज्यी ति बिल्लौर सिरुप यु नेसुर जोवु नोक। डम्ज्यी ङ्यिवा ति नीर सिरुप यु नेसुर जोवु नोक। डम्ज्यी सुम्बा ति हरित सिरुप यु नेसुर जोवु नोक। डम्ज्यी ज्यिवा ति पन्ना सिरुप यु नेसुर जोवु नोक।
20 डम्ज्यी ङवा ति आनिक्सा सिरुप यु नेसुर जोवु नोक। डम्ज्यी टुक्पा ति लालमणि सिरुप यु नेसुर जोवु नोक। डम्ज्यी दिन्बा ति पीतमणि सिरुप यु नेसुर जोवु नोक, डम्ज्यी ग्येवा ति बेरूज सिरुप यु नेसुर जोवु नोक। डम्ज्यी गुवा ति पुष्पराज सिरुप यु नेसुर जोवु नोक। डम्ज्यी च्युवा ति लसुने सिरुप यु नेसुर जोवु नोक। डम्ज्यी च्युच्यिक ति नीलमणि सिरुप यु नेसुर जोवु नोक। डम्ज्यी च्यिङ्ङी ति कटेला सिरुप यु नेसुर जोवु नोक।
21 ती गो च्यिङ्ङीतिवा ति मोती च्यिङ्ङी नेसुर जोवु नोक। तमा गो रे रेला मोती रे रे जोनी नोक। ती ग्येसाकी लामतिवा ति शेल दोके सल्वु थोङ्गुप सेर ङोमा थ्वोनी जोवु नोक।
22 ती ग्येसाला कनी साङ ल्हङाङ माथोङ। च्यिलासिसिन तेकी ल्हङाङ ति ङार छ्येवु चोवो कोन्छ्योक ताङ खोकी सेवु लुक रुक राङ यिनोक।
23 ती ग्येसा ति ठछ्येली जोपला ङ्यिमा उला काङ साङ मोगोनोक। च्यिलासिसिन कोन्छ्योककी मोवाकी राङ तेकी ग्येसा ति ठछ्येली डिनोक। तमा ते ठछ्येली जोप दिप्ली ति लुक रुक राङ यिनोक।
24 जम्बुलिङला वोतुप मिरिक कुतुक कुतुककी मीतिवा ती ठछ्येलीला युकिवी। तमा जम्बुलिङकी ग्येल्वुतिवी साङ खोप्रे मोवा ति ते खुर्नी वुङ्गिवी।
25 ती ग्येसाकी गोतिवा ङ्यिमा काङ नाम्साङ मेच्येवी। च्यिलासिसिन ते नाम्साङ नाम मोल्होवी।
26 मिरिक कुतुककी मीतिवी खोप्रे मोवा ताङ ताङ्देन ति ती ग्येसाला खुर्नी गिनोक।
27 यिने लुक रुककी मिजीकी थेपला मिङ टिवुतिवा मिसिन यम्बा चाङ्मा मेतुप ताङ क्युक्टो लङ्गुप ताम्ङे कितुप ताङ जिनोक जोपतिवा ती ग्येसाला नाम्साङ शुक मुथुप्नोक।