5
शुकी बिटप ताङ लुक रुककी कोर्ला
1 येलुङ ग्येल्ठिकला ज्यु वोतुप तीकी छ्याक यावाला ति फिला नाङ्ला यिकी टिवु शुकी बिटप च्यिक वोतुप ति ङे थोङ्सुङ। ती शुकी बिटप ति लज्युर दिन ग्यप्नी ज्याक्नोक।
2 तमा ङे देवाच्येनकी लेन क्योलुप थु रम्बु मिरा च्यिक थोङ्सुङ। तीकी कशेन वोरु थोर ग्यप्नी “दी लज्युरतिवा तोल्नी शुकी बिटप डोल थुपुप ति सु वे?” सिनी सिक्यासुङ।
3 यिने देवाच्येनला ताङ जम्बुलिङला ताङ जम्बुलिङकी वोक्ला ती शुकी बिटप डोलुप ताङ ती नाङ्ला ल्ह थुपुप ति सु साङ मिन्दुक।
4 ती शुकी बिटप डोलुप ताङ ती नाङ्ला ल्ह थुप छ्योवु ति सु साङ माथेन्दुप तप्की ङ कशेन ङुयिन।
5 तमा ते ग्येल्ठिकला देन वोतुप गोमा कितुप मी छ्ये मिरा खल्ज्यिक ताङ ज्यीकी पर नेमा मिरा च्यिककी ङला “ख्युरुङ माङु। ल्होसा, यहूदाकी गिपा नेमा ग्येल्वु दाऊदकी गिपाला क्येवु सेङ्गी सिरुप मिरा च्यिक ग्येल वे। खोकी दी लज्युर दिनतिवा तोल्नी शुकी बिटप बे थुप्किवी।” सिनी सिक्यासुङ।
6 तमा ते ग्येल्ठिककी दोङ्ला लुक रुक च्यिक लानी नोक। ती ति गोमाला के सेतुप दोके थोङ्गिनोक, यिन्सिनाङ तन्दा ति सेन्बु राङ नोक। तीकी गारी गुरीला सेम्ज्येन ज्यी चोके नोक, तमा सेम्ज्येन ज्यीतिवी गारी गुरीला गोमा कितुप मी छ्ये मिरा खल्ज्यिक ताङ ज्यी नोक। ती लुक रुक तीकी ति अर्क्योक दिन ताङ मिक दिन नोक। ती मिक दिन ति तेरी जम्बुलिङला तङ्गुप कोन्छ्योककी थु दिन यिनोक।
7 तमा ती लुक रुक ति वानी ग्येल्ठिकला ज्यु वोतुप तीकी छ्याक यावा नेसुर ती शुकी बिटप ति लासुङ।
8 ती बिटप ति लासिमा सेन्बु वोतुप सेम्ज्येन ज्यी ताङ गोमा कितुप मी छ्ये खल्ज्यिक ताङ ज्यीतिवा लुक रुककी चिप्ला वानी खवुतुङ्मा देसुङ। तिवा तेरीकी लकला डम्ङ्याङ ताङ पो क्येङ्गुप सेरकी पोकेतिवा खुर्नी नोक। ती पो ति कोन्छ्योकला तेपा कितुपतिवी क्यावु मोपोर यिनोक।
9 तिवा दुक सियी लु सम्बा यी लङ्गिनोक,
“ख्युरुङ दी शुकी बिटप लङ्गुप ताङ तीकी लज्युरतिवा तोल छ्योवु वे।
ख्युरुङ सेतुप यिन,
यिन्सिनाङ शेप ने ङोसु लानी ख्योरे ठककी गोङ तेनी कोन्छ्योककी थोक्ला तेरी गिपा ताङ ग्येताम ताङ मिरिककी मीतिवा ताङ लुङ्बाला ङ्योसुङ।
10 तमा ख्योरे तिवाला खोरो मुला राङ ग्येला कितुप ताङ कोन्छ्योककी थोक्ला शब्ज्यी कितुप कोङ्यार जो नाङ्सुङ।
तिवी दी जम्बुलिङला ग्येला किवी।”
11 ती पेला बुङ छेबुङ चोयी देवाच्येनकी लेन क्योलुप थुतिवा ङे थोङ्सुङ। तिवा ग्येल्ठिक ताङ सेन्बु वोतुप सेम्ज्येनतिवा ताङ गोमा कितुप मी छ्येतिवी गारी गुरीला लानी थोर ग्यप्नी दुक सिनी लु लावु ति ङे थोसुङ,
12 “सेतुप लुक रुक ति ओङ छ्येवु ताङ छ्युक्पु वोतुप ताङ रिक्पा वोतुप ताङ ङार वोतुप ताङ ताङ्देन वोतुप ताङ मोवा वोतुप ताङ सोवा लङ छ्योवु वे।”
13 तमा देवाच्येनला वोतुप तेरी ताङ जम्बुलिङला वोतुप तेरी ताङ जम्बुलिङकी वोक्ला वोतुप तेरी ताङ ग्येम्छोला वोतुप उ वोतुप सेम्ज्येन थम्ज्येनतिवी दुक सिक्यावु ति ङे थोसुङ,
“ग्येल्ठिकला ज्यु वोतुप कोन्छ्योक ताङ लुक रुकला सोवा ताङ ताङ्देन ताङ मोवा ताङ ओङ्ज्येन ति नरीकी नरी वुङ्शी।”
14 ती ज्युक्ला ग्येल्ठिककी गारी गुरीला वोतुप सेम्ज्येन ज्यिकरकी “आमिन” सिक्यासुङ। तमा गोमा कितुप मी छ्येतिवा ति पुमुङ सला चुनी सोवा तेक्सुङ।