7
बुङ च्यिक ताङ तोङ्डा खल ङ्यी ताङ ज्यीकी खला लज्युर ग्यपुप
1 ती ज्युक्ला देवाच्येनकी लेन क्योलुप थु मिरा ज्यी जम्बुलिङ ताङ ग्येम्छो ताङ दोङ्बुतिवाला वुर्तुक मग्यक्शी सिनी जम्बुलिङकी छो ज्यीकी वुङ्ला लानी छो ज्यी नेसुर वुङ्गुप वुर्तुकतिवा क्येक्नी देतुप ति ङे थोङ्सुङ।
2 तमा यम्बा देवाच्येनकी लेन क्योलुप थु च्यिक ङोसु वोतुप कोन्छ्योककी लज्युर खुर्नी शरकी थाका नेसुर जेनी वावु ति ङे थोङ्सुङ। तीकी जम्बुलिङ ताङ ग्येम्छोला ना तोङ्गुप ओङ वोतुप देवाच्येनकी लेन क्योलुप थु मिरा ज्यीला थोर ग्यप्नी,
3 “कोन्छ्योककी थोक्ला शब्ज्यी कितुपतिवी टलाला दाक्पी लज्युर माग्यपा सेक्ला जम्बुलिङ ताङ ग्येम्छो ताङ दोङ्बुतिवाला काङ साङ ना मातोङा!” सिनी सिक्यासुङ।
4 ते लज्युर ग्यपुपतिवा तेरी इस्राएल गिपाकी मिरिक रे रे नेसुर वावु बुङ च्यिक ताङ तोङ्डा खल ङ्यी ताङ ज्यी वोतुप ति ङे थोसुङ।
5 ती पर्ला यहूदाकी गिपा नेसुर तोङ्डा च्यिङ्ङीला लज्युर ग्यप्सुङ, रुबेनकी गिपा नेसुर तोङ्डा च्यिङ्ङीला, गादकी गिपा नेसुर तोङ्डा च्यिङ्ङीला,
6 आशेरकी गिपा नेसुर तोङ्डा च्यिङ्ङीला, नप्तालीकी गिपा नेसुर तोङ्डा च्यिङ्ङीला, मनश्शेकी गिपा नेसुर तोङ्डा च्यिङ्ङीला,
7 शिमियोनकी गिपा नेसुर तोङ्डा च्यिङ्ङीला, लेवीकी गिपा नेसुर तोङ्डा च्यिङ्ङीला, इस्साखारकी गिपा नेसुर तोङ्डा च्यिङ्ङीला,
8 जबूलूनकी गिपा नेसुर तोङ्डा च्यिङ्ङीला, योसेफकी गिपा नेसुर तोङ्डा च्यिङ्ङीला, बेन्यामीनकी गिपा नेसुर तोङ्डा च्यिङ्ङीला लज्युर ग्यप्नोक।
मज्या कर्मु कोन्दुप मी माङ्छ्योक
9 ती ज्युक्ला ङे ल्हासालेन्सिन ङोनी साङ ङो मुथुपुप मी माङ्छ्योक जोम्नी नोक। तिवा ति तेरी लुङ्बा ताङ गिपा ताङ मिरिक ताङ ग्येताम कुतुक कुतुक लपुप मी माङ्छ्योक यिनोक। तमा तिवा ग्येल्ठिक ताङ लुक रुककी दोङ्ला मज्या कर्मु कोन्नी लकला खजूरकी येल्का खुर्नी लानी देन्नोक।
10 तिवा कशेन थोर ग्यप्नी,
“थर्वा ति ग्येल्ठिकला ज्यु वोतुप दाक्पी चोवो कोन्छ्योक ताङ लुक रुक नेसुर गिवी।”
सिनी वोरु तेन्सुङ।
11 तमा देवाच्येनकी लेन क्योलुपतिवा तेरी ग्येल्ठिक ताङ गोमा कितुप मी छ्येतिवा ताङ सेन्बु वोतुप सेम्ज्येन ज्यीतिवी गारी गुरीला लासुङ। तमा ग्येल्ठिककी चिप्ला खवुतुङ्मा देनी दुक सिनी कोन्छ्योकला सोवा तेक्सुङ,
12 “आमिन!
सोवा ताङ मोवा ताङ रिक्पा ताङ थुचिछे ताङ ताङ्देन ताङ ओङ ताङ ङार ति
नरीकी नरी ज्युवु दाक्पी कोन्छ्योककी तिराङ यिन।
आमिन!”
13 ते वोतुप गोमा कितुप मी छ्येतिवी पर्ला मिरा च्यिककी “दी मज्या कर्मु कोन्दुपतिवा सु यिन? कनी नेसुर वावु यिन?” सिनी ङला टिसुङ।
14 तमा ङे तीला दुक सिक्यायी, “चोवो, ख्युरुङला राङ छ्या वे।” तमा तीकी दुक सिक्यासुङ, “दिवा ति छेटाङ ग्येर्पु ने थर्नी वावु यिन। दिवी कोन्दुप मज्यातिवा लुक रुककी ठकला टुनी कर्मु जोवु यिन।
15 तुक क्यानी
तिवा कोन्छ्योककी ग्येल्ठिककी चिप्ला वे।
तिवा ङ्यी ताङ नुप्ज्या खोकी ल्हङाङला देनी खोला शब्ज्यी बुल्गिवी।
तमा ग्येल्ठिकला ज्यु वोतुप तीकी तिवी मुला ज्युनी तिवाला र्होक्टे किवी।
16 तिवाला येलुङ ल्होवा ताङ कोम्बा मालाङ्गिवी,
तमा ङ्यिमा छेन्दी याङ्ना चुका छेन्दीकी साङ तिवा मिछिकिवी।
17 च्यिलासिसिन ग्येल्ठिककी पर्ला ज्यु वोतुप लुक रुक ति तिवी गोठाला च्युङ्गिवी।
तमा खोकी तिवाला मिजी तेरुप छ्यी पुङतिवाला क्योल्गिवी।
तमा कोन्छ्योककी तिवी मिककी मिक्च्युर तेरी पिनी तेर्किवी।”