3
चर्चला गोमा कितुप मीतिवाला पावलकी टोङ्गु
1 दी ताम्ङे ति लो तेन गोवु यिन। चुका मी तीकी चर्चला गोमा कितुप नो किवे, तीकी ल्यामु राङ कितुप नो क्यावु यिन।
2 यिने तुका चर्चला गोमा कितुप मीतिवा ति क्येन मेतुप ताङ पेर्मी च्यिक राङ वोतुप ताङ काङ किसिनाङ छे क्यानी कितुप ताङ सेम थिला ज्योकुप ताङ मीतिवी ताङ्देन क्यावु ताङ डेन्बुला ताङ्देन कितुप ताङ येन्देन लोप थुपुप वुङ गोकिवी।
3 तमा छ्याङ्गेले मिकिवु ताङ टिम्बु ङ्यिर्मु मिकिवु, यिने कुसु ज्यम्बु वोतुप ताङ थमु मग्यकुप ताङ नोरला देर्पा मिकिवु ताङ
4 खोरो खाङ्बा शिङ ल्यामु कि थुपुप ताङ पेजातिवी खुरुङला ताङ्देन क्यानी खला ङ्येमु जोवु वुङ गोकिवी।
5 दोजो तीकी खोरो खाङ्बीतिवाला साङ डेकला ज्योक माथुप्सुङ सिसिन चर्चला चुक क्यानी डेकला ज्योक थुप्किवी रो?
6 तमा चर्चला गोमा कितुप मी ति मलोक तेपा क्यावु मी साङ वुङ्गुप मेवी। मिसियाङ तीकी खुरुङला ङ राङ यिन सिवी, तमा कोन्छ्योककी शैतानला ना तङ्गुप दोके क्यानी तीला पर्च्याला ख्येल्गिवी।
7 तुका मी ति येशूला तेपा माक्यावु मीतिवी थोङ्दाङला साङ ल्यामु वुङ गोकिवी। तुक क्यासिन मीतिवा तीकी तेन्दोकला मलाङ्गिवी, तमा शैतानकी ओङला साङ मेख्येल्वी।
चर्चला ल्हाटे कितुप मीतिवाला पावलकी टोङ्गु
8 तुक राङ क्यानी चर्चला ल्हाटे कितुप मीतिवा साङ नासाम ल्यामु तोङ्गुप वुङ गोकिवी। तन्दा राङ च्यिक तन्दा राङ च्यिक सिरुप ताङ छ्याङ्गेले कितुप ताङ नोरला देर्पा कितुप मिन,
9 यिने तिवा खोरो क्यावु तेपाला टेङ्बु वोतुप ल्यामो हाक्कोनी नरी सेम टेङ्बु क्यानी ज्योकुप वुङ गोकिवी।
10 तुका मी ति गोमाला ल्यामु वोतुप मेतुप ल्हो, तमा क्येन मेतुप पङ्बु वोसिन तिराङ चर्चला ल्हाटे कितुप लाका किशी।
11 तुक राङ क्यानी तिवी पेर्मीतिवा साङ किताङ नालु ल्यामु वोतुप ताङ मीला मारे मोतोङ्गुप ताङ डेकला देतुप ताङ तेरी ताम्ङेला खोङ्तेर्मु वुङ गोकिवी।
12 चर्चला ल्हाटे कितुप मी ति पेर्मी च्यिक राङ वोतुप वुङ गोकिवी। खोरो पुज्युङपुमतिवा ताङ खाङ्बा शिङ ल्यामु क्यानी च्योम च्योम कि थुपुप वुङ गोकिवी।
13 सी चर्चला ल्यामु ल्हाटे किवे, तिवाला मीतिवी साङ ताङ्देन किवी। तमा तिवी येशू ख्रीष्टला तेपा रम्बु क्यानी मीतिवाला साङ ङाडेङ क्यानी लोप थुप्किवी।
येशूला तेपा क्यावु तेन्दोक ति छासे छ्ये वे
14 ङ ख्योरो ते ङमु राङ वुङ्गुप नो वे। यिन्सिनाङ दी यिकी ति ङे ख्युरुङला टिवु यिनो।
15 ङ वुङ्गुप फिमु गल्सिनाङ दी यिकी रानी दाक्पु कोन्छ्योककी मिछाङला चुक क्यानी मिजी क्योङ गोकिवी सिरुप ति हाक्कोवा किसा। ती कोन्छ्योककी मिछाङ ति ङोसु वोतुप कोन्छ्योककी चर्च यिनो। ती चर्च ति सुङ टेङ्बुकी डम्ज्यी रम्बु ताङ कज्यु यिन।
16 वुतुङ के छ्याकला वोतुप दाक्पी क्यावु तेपाकी तेन्दोक ति छासे छ्ये वे।
“येशू ख्रीष्ट ति मी जुजमला दी जम्बुलिङला फेप्सुङ।
तमा कोन्छ्योककी थु चाङ्माकी खोला टेङ्बु वोतुप सिनी चिसुङ।
खो देवाच्येनकी लेन क्योलुप थुतिवी पर्ला थोङ्सुङ।
तमा खोकी कोर्ला लुङ्बा लुङ्बाला ख्याप्टाक क्यासुङ।
जम्बुलिङकी मीतिवी खोला तेपा क्यासुङ।
येलुङ कोन्छ्योककी खोला ताङ्देन ताङ क्यानी देवाच्येन ने तेक्नी फेप्सुङ।”